ЖУМА МАВЪИЗАЛАРИ ЎЗ

--- ∽❧❧۞🍃🕌🍃۞∽❧❧∽ ---

АЛЛОҲДАН ҚЎРҚИШ
Аллоҳ жалла жалалаҳу буюради: «Эй мўминлар, Аллоҳдан қўрқинглар! Ҳар ким эртаси учун олдиндан нима ҳозирлаб қўйганига қарасин! Аллоҳдан қўрқинглар, чунки Аллоҳ чиндан ҳам қилаётган амалларингиздан хабардордир» («Ҳашр» сураси, 18-оят).
Оятнинг мазмуни мана бундай:
-    Аллоҳдан қўрқинг, унга итоат этинг. Моддий ва маънавий азоб чекаётганларга ёрдам беринг. Доимо Аллоҳ йўлида бўлинг, қиёмат куни бунинг мукофотини оласиз. Чунки Аллоҳ савоб ишингизни ҳам, гуноҳ ишингизни ҳам - нима қилган бўлсангиз ҳаммасини билади. Фаришталар, осмон, ер, кеча, кундуз... ҳамма-ҳаммаси, инсон нима қилган бўлса шу ҳақда қиёмат куни гувоҳлик беради. Ҳатто инсоннинг ўз аъзолари ўзи тўғрисида гувоҳлик қилади. Ер иймонли ва ихлосли кишиларга гувоҳ бўлади ва:
-    Менинг устимда намоз ўкиди, рўза тутди, ҳажга борди, - дейди. Раҳмлилар ичида энг раҳмли бўлган Аллоҳ қиёмат куни иймонсизлар билан осийларни ипидан игнасигача синчиклаб сўроқ қилганда уларнинг ҳолига вой бўлади!
Бутун вужуди, барча аъзолари билан Аллоҳдан қўрққан кишилар мўминлардир. Бу борада Имом Абул-Лайс шундай дейди:- Аллоҳдан қўрқишнинг аломати етти нарсада намоён бўлади:
1. Тилда:  Аллоҳдан қўрққан одам тилини ёлғондан, ғийбатдан, бошқаларга бўҳтон қилишдан ва бекорчи сўзлар айтишдан тияди. Уни Аллоҳни зикр этувчи, Қуръон ўқувчи ва илмий музокаралар билан машғул аъзо ҳолида шай тутади.
2. Қалбда:  Аллоҳдан қўрққан одам қалбида мусулмон қардошларига душманлик хис қилмайди. Ёлғон, бўҳтон ва ҳасад қилиш каби ғайриинсоний туйғуларни қалбидан йўқ қилади. Чунки ҳасад кишининг гўзал амалларини маҳв этади. Шунга кўра, Аллоҳнинг Расули с.а.в. буюради: «Олов ўтинини еб битиргани каби, ҳасад ҳам инсоннинг гўзал амалларини еб битиради». Эй ўқувчи, билки ҳасад қалбларга жойлашган ва жамият ҳаётида катта зарарларга йўл очувчи ёмон бир касалликдир. Қалблардаги хасталиклар, яъни ёмон туйғулар, ёмон феъллар фақат илм ва амал билан даволаниши мумкин.
3. Кўзда:  Аллоҳдан қўрққан одам ейишда ҳам, ичишда ҳам, кийишда ҳам ва бошқа хусусларда ҳамкўзини ҳаромдан эҳтиёт қилади. Дунёга ҳирс билан ва ҳар нарсани кўлга киритиш иштиёқи билан эмас, ибрат назари билан қарайди. Ҳалол бўлмаган нарсаларга қарашдан тийилади. Шунинг учун ҳам Аллоҳнинг Расули (с.а.в.) буюради: «Ким кўзини ҳаром нарсалар билан тўлдирса, Аллоҳ ҳам қиёмат куни унинг кўзини олов билан тўлдиради.»
4.  Меъдада:  Аллоҳдан қўрққан одам меъдасига ҳаром луқма бермайди. Чунки ҳаром луқма ейиш энг катта гуноҳлардан биридир. Шу боис Аллоҳнинг Расули (с.а.в.) буюради:
 «Инсон зотининг меъдасига бир луқма ҳаром тушганда бу луқма меъдасида қанча вақт турса, еру кўқдаги фаришталар ҳам шунча вақт унга лаънат ўқийдилар.»
5.  Қўлда:  Аллоҳдан қўрққан одам қўлини ҳаромга узатмайди, аксинча Аллоҳнинг ризосига уйғун нарсаларга узатади. Каъбдан шундай бир ривоят қолган. Аллоҳ яшил зумраддан бир бино яратган. Бу бинода етмиш минг доира ва ҳар доирада минг хона бор. Бу ерга фақатгина ўзига ҳаром нарса инъом этилганда ёлғиз Аллоҳдан қўрққани учун уни рад этган кишилар киради.
6.  Оёкда:  Аллоҳдан қўрққан одам исён йўлида эмас, Аллоҳга итоат йўлида одимлайди. Илм-маърифат ва яхши ахлоқ ўрганиш мақсадида олимлар ва солиҳ кишилар мажлисига боради.
7. Итоатда:  Аллоҳдан қўрққан одам ёлғиз Аллоҳ ризоси учун унга итоат этади. Риёдан, инсонларга ўзини ва ё ишларини кўз-кўз қилишдан ва иккиюзламачиликдан сақланади.
Шундай қилиб, бир кимсанинг олти аъзосида ва еттинчи ўлароқ ибодатида шу ҳоллар бор бўлса, демак у Аллоҳнинг: « Охират эса Раббингиз наздида тақводорлар учундир.»
 (Зухруф сураси, 35-оят.), деб марҳамат қилган кишиларидан бири бўлади.

    «Мукошафат-ул қулуб»
              китобидан
--- ∽❧❧۞🍃🕌🍃۞∽❧❧∽ ---  

🌙🕌«Жума мавъизалари Ўз»
               каналига уланинг
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

АЖИБ БИР ВОҚЕА

Бир куни Маъруф Кархий раҳматуллоҳи алайҳ билан қизиқ воқеа содир бўлди. У киши кўчадан ўтиб кетаётиб, йўлда одамларга сув ичираётган бир сув ташувчини кўрдилар. У одам: "Менинг сувимдан ичган бандага Аллоҳ таоло раҳм айласин", деб дуо қилаётган эди.

Маъруф Кархий раҳматуллоҳи алайҳ ўша сув улашаётган одамнинг олдига келиб: "Менга ҳам бир коса сув қуйиб беринг", дедилар. У қуйиб берди. Ҳазрат сувни олиб ичдилар. Бир ёш йигит ҳам Ҳазратга ҳамроҳ эди. Ўша йигит: "Ҳазрат, сиз рӯза эдингиз-ку, рўзангизни бузиб қўйдингиз-ку?!" деди. Ҳазрат шунда: "Менга бир хаёл келди: эҳтимол, Аллоҳ унинг "Аллоҳ таоло раҳм айласин", деган дуосини қабул қилар, бузиб қўйган нафл рўзамнинг эса, кейин қазосини тутиб бераман. Аммо бу банданинг дуоси менга яна насиб бўладими ёки йўқми, билмайман. Шу сабабли бу банданинг дуосини олиш учун рўзамни бузиб, сувни ичдим" дедилар.

Энди, бир ўйлаб кўринг, Аллоҳ таолонинг шундай улуғ бандаси, дӯсти, улуғ бир сўфий зот оддий сув ташувчининг дуосини олиш учун нафл рўзани буздилар. Сабаби бу зотлар Аллоҳнинг бандалари дуоларини олишга ўта ҳарис эдилар. Чунки бизнинг ҳаққимизда кимнинг дуоси қачон қабул бўлиши маълум эмас.

«НАСИҲАТЛАР ГУЛДАСТАСИ»
ҳ китобидан
--- ∽❧❧۞🍃🕌🍃۞∽❧❧∽ ---

🌙🕌«Жума мавъизалари Ўз»
       каналига уланиш учун
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---
КУННИ ДУО ИЛА БОШЛАНГ

Бомдод намозини ўқигандан кейин Аллоҳ таолога қуйидагича дуо қилинг: "Аллоҳим! денг, мана, яна бир куннинг тонги отди, мен ҳам дунёдан ўтяпман. Аллоҳим! Фазлу караминг ила бу куннинг лаҳзаларини тўғри сарфлашга тавфиқ ато қил, бирор соат беҳуда кетмасин. Куним яхши ишларга сарф бўлсин..." ва ҳоказо.
Ҳадиси шарифда келадики, ҳар қуёш чиққанида, Набий соллаллоҳу алайҳи васаллам ушбу дуони ўқир эдилар:

الحَمْدُ لِلَّهِ الَّذِي أَقَالَنَا يَوْمَنَا هَذَا وَلَمْ يُهْلِكْنَا بِذُنُوبِنَا

Яъни: "Бу кунни бизларга қайта ато қилган ва бизларни гуноҳларимиз сабабли ҳалок қилмаган Аллоҳга ҳамд бўлсин". (Имом Муслим ривояти)
Ҳар куннинг қуёши чиқар вақт Набий соллаллоҳу алайҳи васаллам шу калималарни ўқир эдилар. Бунинг маъноси шуки, "бу кун бизга насиб қилмаслиги ва бу кундан олдинроқ биз гуноҳларимиз сабабли ҳалок қилинишимиз мумкин эди. Лекин Аллоҳ таоло фазлу карами ила бизларни ҳалок қилмади ва бу кунни қайта ато қилди".
Хуллас, ҳар бир янги кун Аллоҳ таолонинг неъмати эканини қалбдан ҳис этиш лозим.
Мазкур дуо орқали Набий соллаллоҳу алайҳи васаллам ҳар бир куннинг қадрига етишни таълим бермоқдалар, кечаги гуноҳларимиз сабаб ҳалок қилинишимиз мумкинлигини, лекин Аллоҳ таоло Ўз фазлу карами ила бизга ҳаёт ато қилганини эслатмоқдалар. Демак, бизга ато этилган янги кун. янги имкон, янги фурсат эканини англаган ҳолда, уни фойдали ишларга сарф қилмоқ лозим....

«НАСИҲАТЛАР ГУЛДАСТАСИ»
китобидан
--- ∽❧❧۞🍃🕌🍃۞∽❧❧∽ ---

🌙🕌«Жума мавъизалари Ўз»
       каналига уланиш учун
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

ҚАЛБЛАРИ ДУНЁДАН ХОЛИ ЭДИ
(Ибратли ҳикоя)
Имом Аъзам раҳматуллоҳи алайҳ тижорат билан шуғуллангани, бадавлат инсон бўлгани маълум. Бу улуғ зот пешингача талабаларга дарс берар, пешиндан кейин тижорат ишлари билан машғул бўларди. Бир куни дарс пайтида масжид эшигидан кимдир овоз берди:
Ҳазрат, кемангиз чўкиб кетибди (У зотнинг мол ташийдиган кемалари ҳам бўлган)!
Имом Аъзам бир онлик тараддуддан кейин:
- Алҳамдулиллаҳ, деди.
Бироздан сўнг ҳалиги одам янги хабар келтирди:
Адашибман, ҳазрат, чўккан кема бошқасиники экан.
Имом Аъзам бунга ҳам боягидек жавоб берди. Хабар келтирган одам ҳайратга тушди:
- Ҳазрат, кемангиз чўкканини айтдим, "Алҳамдулиллаҳ", дедингиз. Чўккан кема сизники эмаслигини эшитиб ҳам шундай дедингиз. Бунинг сабаби нима?
Имом Аъзам изоҳ берди:
- Кемам чўкиб кетганини эшитганимда қалбимга назар ташладим. Унда дунё молини йўқотиш сабаб озгина бўлсаям қайғуни кўрмадим. Бунинг учун Аллоҳ таолога ҳамд айтдим. Чўккан кема меники эмаслигини билганимда ҳам шундай қилдим. Қалбимда дунё молини қўлга киритиш сабаб заррача қувонч йўқ эди. Бу сафар қалбимни дунё матосига ҳирс қўйишдан сақлагани учун Аллоҳ таолога ҳамд айтдим.

     «РИЗҚ КАЛИТЛАРИ»
              китобидан
--- ∽❧❧۞🍃🕌🍃۞∽❧❧∽ ---
      🌙🕌«Жума мавъизалари Ўз»
               каналига уланинг
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---
МАСЖИДДА ИЛМ ТАЛАБ
ҚИЛИШГА ТАРҒИБ

Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васаллам: «Ким бир мўминдан бу дунё машаққатларидан бир машаққатни аритса, Аллоҳ таоло ундан Қиёмат куни машаққатларидан бирини аритади. Ким бир камбағалнинг ишини енгиллатса, Аллоҳ унинг бу дунёю охиратидан ишларини енгиллатади. Ким бир мусулмоннинг айбини беркитса, Аллоҳ унинг айбини бу дунёю охиратда беркитади. Модомики, банда ўз биродарининг ёрдамида экан, Аллоҳ ҳам унинг ёрдамида бўлади. Ким илм талаб қилиш йўлига тушса, Аллоҳ унга жаннатнинг йўлини енгиллаштиради. Қайси бир қавм Аллоҳнинг уйларидан бирида жам бўлиб, Аллоҳнинг Китобини тиловат қилса, уни ўрганса, албатта, уларнинг устига сакина тушади, уларни раҳмат ўраб олади, фаришталарқуршаб олади ва Аллоҳ ўз ҳузуридагилар қаторида зикр қилади. Кимни амали ортга сурса, уни насаби олдга сура олмайди», дедилар» (Имом Муслим, Имом Абу Довуд ва Имом Термизий ривояти).
Ушбу ҳадисда «Аллоҳнинг уйлари»дан мурод масжидлардир. Демак, масжидлардан бирида ўтириб, Аллоҳнинг Китоби Қуръони Каримни тиловат қилган, уни ўрганган одамлар ушбу ҳадиси шарифда зикр қилинган қуйидаги тўртта буюк даражаларга эришадилар:
1. «Албатта, уларнинг устига сакина тушади».
«Сакина», яъни сокинликдан олинган бўлиб, қалб хотиржамлиги, барча тарафдан сокинлик-хотиржамликни англатади.
2. «Уларни раҳмат ўраб олади».
Масжидда Қуръони Карим тиловат қилиб, унинг маъно ва ҳукмларини ўрганаётган кишиларни Аллоҳнинг раҳмати ўраб олади.
3. «Фаришталар қуршаб олади».
Масжидда Қуръон тиловат қилаётган, уни ўрганаётган кишиларни ҳатто фаришталар ҳам қуршаб олишади.
4. «Аллоҳ Ўз ҳузуридагилар қаторида зикр қилади».
«Аллоҳнинг ҳузуридагилар» - «Малаъул аъло» «олий тоифа», яъни улуғ фаришталар. Бу энг олий мақомдир. Тўпланиб Қуръон тиловат қилган, уни ўрганиб турган қавмларни Аллоҳ таоло ўша олиймақом зотлар билан бирга зикр қилар экан.

«МАСЖИД ОДОБЛАРИ»
китобидан
--- ∽❧❧۞🍃🕌🍃۞∽❧❧∽ ---
      🌙🕌«Жума мавъизалари Ўз»
               каналига уланинг
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

ҚАРЗДАН ҚУТИЛИШ ДУОСИ

«Бир мукотаб Али розияллоҳу анҳунинг олдига келиб: «Мен келишилган маблағни топиб беришдан ожиз бўлдим. Менга ёрдам беринг», деди. «Сенга Расулуллоҳ соллаллоҳу алайҳи васаллам менга ўргатган калималарни ўргатиб қўяйми? Агар зиммангда Сабир тоғича қарз бўлса ҳам, Аллоҳ уни сендан узади. «Аллоҳумма! икфинии биҳалаалика ъан ҳаромика вағнинии бифадлика ъамман сиваак» дегин», дедилар». (Термизий ривоят қилган.)

Шарҳ:
Мукотаб хожаси билан маълум маблағ эвазига озод бўлиш учун шартнома тузган қул. Сабир Ямандаги бир тоғнинг номи.
. اللَّهُمَّ اكْفِنِي بِحَلَالِكَ عَنْ حَرَامِكَ وَأَغْنِنِي بِفَضْلِكَ عَمَّنْ سِوَاكَ
Ўқилиши:
«Аллоҳумма! икфинии биҳалаалика ъан ҳаромика вағнинии бифадлика ъамман сиваак»

Дуонинг маъноси:
«Аллоҳим! Менга ҳалолинг ила ҳаромингдан кифоя қилгин. Ўз фазлинг ила мени Ўзингдан бошқалардан беҳожат қилгин».
Ким ушбу дуони ният ва ихлос билан фарз намозлардан кейин ўқиб юрса, Аллоҳ таоло унга қарзини узишда ёрдам беради.

--- ∽❧❧۞🍃🕌🍃۞∽❧❧∽ ---

🌙🕌«Жума мавъизалари Ўз»
       каналига уланиш учун
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

МОЛИК ИБН ДИНОРНИНГ
ТАВБАСИ
Молик ибн Динордан қандай тавба қилганини сўрадилар. У киши ўзларининг тавба қиссаларини шундай ҳикоя қиладилар: «Мен миршаб эдим. Хамр ичишга берилгандим. Кейин бир қимматбаҳо жория сотиб олдим. У менга бир қиз туғиб берди. Уни жуда яхши кўрардим. У эмаклай бошлаганидан кейин унга янада қаттиқ боғланиб қолдим.
Ичкиликни олдимга қўйиб, ичмоқчи бўлсам, мендан олдин уни олиб қўярди ва кийимимга тўкиб юборарди. Аммо шодлигим узоққа чўзилмади. Кўзимнинг қувончи бўлган қизалоғим икки ёшга тўлганида вафот этди. Унинг доғи мени қаттиқ эзиб қўйди.
Шаъбон ойининг ўртасидаги кечалардан бири, жума оқшоми эди. Хуфтонни ўқимай, хамрдан маст бўлиб ухлаб қолибман. Туш кўрибман. Қарасам, Қиёмат қоим бўлибди. Сур чалинди, қабрлар очилиб, жамики одамзод тирилиб чиқиб кела бошлади. Мен ҳам уларнинг бири эдим. Бир маҳал орқамдан бир шарпанинг яқинлашиб келаётганини пайқадим. Қарасам, орқа тарафимдан жуда улкан бир аждаҳо келяпти. Кўриниши даҳшатли, катта оғзини очганча, менга тобора яқинлашарди. Мен дарҳол қочишга тушдим. Қочиб борарканман, йўлда турган тоза кийимли, хушбўй ифорлар таралиб турган чолни
кўрдим. Унга салом бериб: «Мени бу аждаҳодан қутқаринг!» дедим. Ҳалиги чол йиғлаб: «Мен заиф бир қарияман, кучим етмайди, сен тезроқ қоч, зора Аллоҳ сенга ундан нажот берса», дея ожизлигини изҳор қилди.
Қочишда давом этдим. Дўзах олови қайнаб турган тубсиз жарликлар яқинидан ўта бошладим. Аждаҳодан қўрққанимдан пастга тушиб кетишимга оз қолди. Шу пайт бир овоз «Қайт! Сен дўзах аҳлидан эмассан!» деб қичқирди. Ортимга қайтиб, ҳалиги чолнинг олдида пайдо бўлибман. Қария менга: «Мана шу тоққа қараб юр, у ерда мусулмонларнинг омонатлари бор. Агap y ерда сенинг ҳам омонатинг бўлса, у сенга албатта ёрдам беради», деб маслаҳат берди.
Жон ҳолатда тоққа қараб югурдим. Аждаҳо ҳамон ортимдан келарди. Тоққа яқинлашганимда бир фариштанинг «Пардаларни кўтаринглар, эшикларни очинглар, балки ичингизда мана бу бечоранинг омонати бордир, шояд, душманидан қутқариб қолса!» деган овози эшитилди. Қарасам, у ерда юзлари ойдек гўдаклар бор экан. Уларнинг ичида менинг вафот этган қизим ҳам ўтирарди. Менинг улар тарафга интилаётганимни кўргач, улар ҳам мен тарафга югуриб кела бошлашди. Қизим мени кўриши билан йиғлаб: «Аллоҳга қасамки, бу менинг дадам!» деди. Сўнг менга қўлини чўзди ва мен унинг қўлини ушлаб, янада юқорироқ илдамладим. Қарасам, аждаҳо ортига ўгирилиб, қочиб кетди. Кутулдим шекилли, деб енгил уҳ тортдим...
Кейин ерга ўтириб, қизимни бағримга босдим. Қизалоғим менга қараб: «Иймон келтирган зотлар учун диллари Аллоҳнинг зикрига ва нозил бўлган ҳақ, (Қуръон)га мойил бўлиш вақти келмадими?!» (Ҳадид сураси, 16-оят.) деди.
Қизим ўқиган ушбу оятдан таъсирланиб, йиғладим. Кейин: «Қизим, сизлар Қуръонни биласизларми?» деб сўрадим.
«Эй отажон, биз уни сизлардан яхшироқ биламиз», деди.
«Мени ютиб юбормоқчи бўлган аждаҳо ким эди?» деб сўрадим қизимдан.
Қизим: «У сизнинг ёмон амалларингиз эди. Сиз уни кўпайтириб юборган эдингиз. У эса сизни жаҳаннам оловига ғарқ қилишни хоҳлади!» деди. «Йўлда учраган қария-чи?» деб сўрадим.
«У сизнинг солиҳ амалингиз эди. Сиз уни заифлаштириб қўйган эдингиз, шунинг учун ёмон амалингизга бас келолмади», деди қизим.
«Эй қизалоғим, бу тоғда нима қиласизлар?» дея савол беришда давом этдим.
Қизим: «Биз ҳаммамиз мусулмонларнинг фарзандларимиз, биз шу ерда Қиёмат қоим бўлгунча сизларни кутиб ўтирамиз, сизлар бизнинг олдимизга келганингизда сизларни шафоат қиламиз», деб ширингина табассум қилиб қўйди.....
Шу тобда қўрқиб уйғондим. Тонг отгач, кўзим уйда турган хамрга тушди. Уни кўришим биланоқ олиб, ирғитдим, идишларини синдирдим. Аллоҳ азза ва жаллага қаттиқ, тавба қилдим. Мана шу тушим менинг тавбамга сабаб бўлди».

«Тавба қилувчилар» китобидан
--- ∽❧❧۞🍃🕌🍃۞∽❧❧∽ ---

🌙🕌«Жума мавъизалари Ўз»
       каналига уланиш учун
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

11. АВФ ТИЛАШ ДУОСИ

اللهم مغفرتك أوسع من ذنوبي ورحمتك أرجي عندي من عملي

Аллоҳумма мағфиротука авсаъу мин зунубий ва роҳматука аржа ъиндий мин ъамалий.

Маъноси
Расулуллоҳ (соллаллоҳу алайҳи ва саллам)нинг гуноҳидан кўп нолиган аъробийга ўргатган машҳур дуоларининг маъноси бундай: «Ё Аллоҳ, Maғфиратинг гуноҳларимдан кенгдир. Менинг умидим амалимдан эмас. Сенинг раҳматингдандир».

Шарҳ:
Бир куни Расулуллоҳ (соллаллоҳу алайҳи васаллам)нинг ёнларига бир аъробий келди ва гуноҳининг кўплигини айтиб йиғлади. Расулуллоҳ (соллаллоҳу алайҳи ва саллам) унга юқоридаги муборак дуони ўргатдилар. Аъробий уни жону дилдан уч марта ўқиди. Шундан кейин Расулуллоҳ (соллаллоҳу алайҳи ва саллам): «Тур ўрнингдан, Аллоҳ сенинг барча гуноҳларингни афв қилди», дедилар. Шу боис барча саҳобалар ва авлиёлар Расулуллоҳ (соллаллоҳу алайҳи ва саллам) ўргатган бу дуони ҳар куни тонгда ва оқшом уч мартадан ўқиганлар. Унда Аллоҳнинг чексиз раҳмати илоҳийси зикр қилиниб, гуноҳларни кечириши сўралмоқда. Гарчи банданинг гуноҳи жуда кўп бўлса ҳам, Аллоҳнинг раҳмати уни ўраб олади. Дуода «Мағфиротука авсаъу мин зунубий» бирикмаси келади. Яъни, Аллоҳнинг мағфирати банданинг гуноҳларидан жуда кенглиги айтилади. Олдин баён қилинган ҳадиси шариф ва аҳдномадаги дуода ҳам Аллоҳнинг кенг марҳаматига юкуниш таъкидланган эди. Банда доимо солиҳ, амал қилиш билан бирга Аллоҳнинг бу чексиз раҳматига суяниб, гуноҳларининг афвини тилаши керак. Зеро, бу муборак дуо ҳам ҳар бир мусулмон киши ҳар доим ўкиши керак бўлган нодир ва қимматли дуолардандир.

«ПАЙҒАМБАРИМИЗ соллаллоҳу алайҳи васалламнинг МУБОРАК 101 ДУОЛАРИ» китобидан
--- ∽❧❧۞🍃🕌🍃۞∽❧❧∽ ---

🌙🕌«Жума мавъизалари Ўз»
       каналига уланиш учун
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ --

ЖУМА КУНИ ЁМҒИР ДУОСИ
Расулуллоҳ саллаллоҳу алайҳи васаллам жанобимиз минбарда хутба ўқир эдилар. Мўминлар бошига қуш қўнган инсонлардай қимир этмай қулоқ солишарди. Шу пайт ҳовлиқиб бир одам кириб келди.
— Эй Оллоҳнинг пайғамбари! — дея овоз берди ўтирмасиданоқ.
Масжиддагилар унга ўгирилиб қарашди. Расулуллоҳ ҳам сўзларини кесдилар.
— Молларимиз, ҳайвонларимиз паришон бўлди. Чорасиз қолдик. Оллоҳга дуо қилинг, бизларга ёмғир берсин!— деди ҳалиги киши.
Ҳамманинг кўнглидаги гапни айтган эди у. Жанобимиз бир сўз демасдан, юзларини кўкка чевирдилар, қўлларини кўтардилар. Бу вазиятнинг гувоҳлари кейинчалик Расулуллоҳни таърифлашаркан, қўлларини шу даражада кўтардиларки, қўлтиқларининг остидаги оқликни кўрса бўларди, дейишган.
— Оллоҳим, бизларга ёрдам қил, ёмғир юбор!.. Оллоҳим, бизларга ёрдам қил, ёмғир юбор!.. Оллоҳим, бизларга ёрдам қил, ёмғир юбор!.. Оллоҳим, қулларингни сувга қондир, ҳайвонларга сув бер, раҳматингни атрофга ёй, ўлик ҳолига келган бу шаҳрингга ҳаёт эҳсон эт!..
Севикли Пайғамбаримиз дуо қиларканлар, неча ҳафталардан бери ёмғир кутиб, кўзларини кўк юзидан узмаган инсонлар жону дилдан омин деб туришарди.
Кейин Расулуллоҳ хутбани тугатдилар. Минбардан тушиб келиб, намоз ўқиб бердилар.
Ўша куни жума намозига кираётганда охирги марта яна осмонни кўздан кечирганлар ёмғирдан дарак берадиган кичкинагина ҳам аломат топмай афсус ила бош чайқашган эди. Расули акрам саллоллоҳу жанобимиз дуоларининг ортидан кўк юзида булутлар бирдан ҳаракатга тушиб қолди. Ҳатто бир булут худди ортидан биров қувлаётгандай шошиб кела бошлади. Келгани сари катталашар, катталашгани сайин Мадина устини қоплаб борар эди.
Ниҳоят, масжиддан чиққан мўминлар ҳавода бир шабада исини туйишди. Бу шабада ёмғирнинг муждачиси эди. Юзларига севинч балқди, кўнгиллар нашъага тўлди. Тасир-тусир ёға бошлаган ёмғир бир онда ҳавони ўзгартириб юборди.
Ўша пайтда ўн саккиз ёшли тиғдай бир йигит бўлган Анас (р.а.) у кунни эслаб: «Уйларимизга шалаббо бўлиб кириб борганмиз», деган. Бу билан ўша ёмғир селдай келганини билдирган эди. Хутба чоғи бир одамнинг масжидга кириб айтган гапию Пайғамбаримизнинг дуолари ўша куни хонадонларда роса суҳбатга мавзу бўлди.
У кун ўтди, эртаси ҳам ўтди, тўла бир ҳафта ҳам ўтди, аммо ёмғир на тинди, на суръати камайди. Томлардан оқиб кетди, йўллар юриб бўлмайдиган ҳолга келди. Атроф балчиққа тўлди.
Мўминлар яна жума намозига йиғилишди. Хутба бошланди. Шу пайт яна аввалги эшикдан, эҳтимол яна ўша киши кириб келди.
— Эй Оллоҳнинг пайғамбари!.. — дея хитоб қилди.
Жанобимиэ яна суҳбатдан тўхтаб, у одамга қарадилар. Бошқалар ҳам ўгирилишди. У сўзида давом этди:
— Уйларимиз қулади, молларимиз ўлди, йўллар абгор ҳолга келди. Парвардигорингизга дуо этинг, ёмғирни тўхтатсин!
Расулуллоҳ қўлларини кўтардилар.
— Оллоҳим, атрофимизга ёғдир, устимизга эмас! Оллоҳим, тепаликларга, тоғларга, яйловларга, ўтлоқларга ёғдир!.. — дея дуо қилдилар.
Дуодан тўхтаган заҳотлари тепадаги булутлар тешилиб, худди кийимдек чок-чокидан сўкила бошлади. Салдан кейин қуёш кўринди.
Булутлар Мадинани айланасига қуршаб олган, очилиб қолган кўк юзи мовий тусли бир тожга ўхшаб қолган эди.
Шу ҳодиса ҳақида хабар берганлар осмоннинг у ҳолини «...ка-аннаҳу иклилун» (худди бир тождай) деб таъриф қилишган.
Шаҳар атрофида ёмғир суръатини камайтирмай давом этарди. Тоғларга, водийларга, яйловларга... челаклаб қуярди. Қачондан бери сувсизлиги билан машҳур бўлган Қанот водийида ҳам бир ой сув шарқираб оқди.

«Саодат асри қиссалари» дан
--- ∽❧❧۞🍃🕌🍃۞∽❧❧∽ ---

🌙🕌«Жума мавъизалари Ўз»
       каналига уланиш учун
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

ҒАЗАБ ҚИЛМА ЖАННАТИЙ
БЎЛАСАН.

Абу Ҳурайра разияллоҳу анҳудан ривоят: “Бир киши Набий соллаллоҳу алайҳи ва салламга: “Менга насиҳат қилинг”, деди.
- Ғазаб қилма! - дедилар Пайғамбар соллаллоҳу алайҳи ва саллам. Ҳалиги одам илтимосини бир неча бор такрорлади.
- Ғазаб қилма! - дедилар Расулуллоҳ соллаллоҳу алайҳи ва саллам”. (Бухорий ривоятлари).

Ҳадисдан олинадиган сабоқлардан баъзилари.

• Ғазаб барча ёмонликнинг бошидир
Насиҳат сўровчи саҳобий Расулуллоҳ соллаллоҳу алайҳи ва салламдан: “Ғазаб қилма!” деган каломни эшитди ва қабул қилди. Бироқ шу лўндагина ҳикматли сўз билан кифояланмасдан яна ва яна насиҳат сўради. Улуғ саҳобий жаннатга киришдек улуғ мақсади учун бундан-да етукроқ ва фойдалироқ кўрсатма олмоқчи бўлган эди. Бироқ у ҳар гал “Насиҳат қилинг”, - деганида, Пайғамбар соллаллоҳу алайҳи ва салламдан бир хилда “Ғазаб қилма!” насиҳатини эшитарди. Набий соллаллоҳу алайҳи ва саллам мазкур насиҳатни такрор-такрор қайтаришлари билан агар тўлиқ идрок этиб амал қилинса, шунинг ўзи етарли эканини таъкидладилар.
Оқил мўмин Расулуллоҳ соллаллоҳу алайҳи ва саллам таъкидлари таъсирида у зотнинг мақсадларини англади. Расулуллоҳ соллаллоҳу алайҳи ва салламдан насиҳат сўраган саҳобий айтадилар: “Мен Расулуллоҳ соллаллоҳу алайҳи ва саллам сўзларини фикр қилиб, шундай хулосага келдим: ғазаб дунёдаги жамики ёмонликни ўзида жамлар экан”. (Аҳмад ривоятлари).
Яъни ғазабини енга олган киши барча ёмонликни тарк этган бўлади. Барча ёмонликларни тарк этган киши эса жамики яхшиликка эришган ҳисобланади.
Сизга Аллоҳнинг салавоти ва саломи бўлсин, Ё Расулуллоҳ! Пок Парвардигор сизни энг гўзал мукофотлар билан тақдирласин! Сиз бизга ҳусни хулқни ўргатдингиз. Барча ёмонликнинг калити бўлмиш хавфли хислатдан огоҳ этдингиз...

• Ғазабнинг ҳалокатли оқибатлари
Жиззакилик бемаза хулқ, ёмон табиат ва ҳалокат келтирувчи қуролдир. Ғазабга қул бўлган банда, унинг хунук оқибатларидан қочиб қутулолмайди. Бу кўнгилсиз оқибатлар аввало унинг ўзига, иккинчидан эса жамиятга зарар келтиради.
     Ғазабнинг кишига етказадиган зарарлари жисмий-моддий, хулқий-маънавий ва руҳий-диний йўқотишлардан иборат.
Сиз дарғазаб кимсанинг ҳолатини кузатсангиз, бунинг моҳиятини тўла-тўкис англаб етасиз. Унинг ранги ўзгаради, қони қайнайди, томирлари бўртади, бармоқлари калтирай бошлайди, ҳарақатларидан маъно кетиб, оғзидан боди кириб, шоди чиқади. Ғазабдан ўзини йўқотиб қўйган одамнинг тилидан хунук ҳақоратлар ёғилади. Баъзан оғзидан куфр сўзлари ҳам чиқиб кетади. Устига-устак, унинг жоҳилона ҳатти-ҳаракати туфайли молу жонига зиён-заҳматлар етади.
     Ғазабнинг жамиятга зарари: ғазаб қалбларда нафрат уйғотади, ғаламисликка ундайди. Охир-оқибат у ўзига қул бўлган кишини бошқалардан ажратиб олади. Ғазабу нафратга тўлган қалб ўзгалар мусибатидан қувонади. Пировардида, одамлар орасига зулм оралайди. Яқинлар алоқаси узилади, ёру-дўст ораси бузилади. Ҳаёт издан чиқади.

• Инсон ғазаб устида қилиб қўйган ишларига ҳам жавоб беради.
Киши ғазаб ҳолатида бировнинг қийматли нарсасига зиён етказиб қўйса, тўлайди. Ғазаб пайтида бир жонни қасддан ўлдирса, қасосга рўбарў қилинади. Оғзидан куфр калимаси чиқиб кетса, муртад бўлади. У тавба-тазарру қилмоғи шарт. Ичган қасами ҳам, айтган талоғи ҳам ўтади. Яъни дарғазаблиги унга тўсиқ бўла олмайди.

Ал-Вофий фий шарҳил арбаийн ан-нававийя китобидан олинди

--- ∽❧❧۞🍃🕌🍃۞∽❧❧∽ ---

🌙🕌«Жума мавъизалари Ўз»
       каналига уланиш учун
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

10. МАҒФИРАТ ВА РАҲМАТ
СЎРАШ ДУОСИ

اللهم إني ظلمت نفسي ظلمًا كَثِيرًا وَلَا يَغْفِرُ الذُّنُوبَ إلا أنتَ فَاغْفِرْ لِي مَغْفِرَةً مِنْ عِندِكَ وَارْحَمْنِي إِنَّكَ أَنت الغفور الرحيم

Аллоҳумма инний золамту нафсий зулман касийрон вала ягфируз зунуба илла анта, фағфирлий мағфиротан минъиндика, варҳамний, иннака антал ғофурур роҳийм.

Маъноси
Расулуллоҳ (соллаллоҳу алайҳи ва саллам) ҳазрат Абу Бакр (розияллоҳу анҳу)га бу муборак дуони ўргатганлар ва уни намоздан сўнг ўқишини тавсия қилганлар.
«Ё Аллоҳ! Нафсимга (ўзимга) кўп зулм қилдим. Гуноҳларни мағфират қилувчи фақат Сенсан. Ўзинг мени кечир ва менга раҳм айла. Сен Ғофур ва Рохиймсан».

Шарҳ:
Имом Бухорий ривоят қилган бу дуо уч буюк сирни ўзида тўплаган: ундаги «мағфиротан» сўзи Аллоҳнинг мағфирати чексизлигини англатади. «Минъин дика» калимаси Аллоҳнинг буюклиги ва чексизлигини билдиради. Шу тарзда банда Аллоҳнинг чексиз раҳмати илоҳийсини баён қилиб, Аллоҳдан афв ва мағфират тилайди. Чунки Қуръони карим Аъроф сураси 156-оятда:

ورحمتي وسعت كل شيء

«Ва роҳмати васиъат кулла шайъин», дейилади. Яъни, Аллоҳ таолонинг раҳмати ҳар нарсани ўраб олгани билдирилган. юқоридаги муборак дуода «Мағфиротан мин ъиндика» бирикмаси ила Аллоҳнинг чексиз мағфирати билдирилди. Ўз нафсига қилган зулмлари эътироф этилиб, Аллоҳдан чексиз раҳмати ила ўша гуноҳларини кечириши сўралмоқда. Шоир айтганидек: «Мени афв этишга Аллоҳ таолонинг чексиз раҳмати, фазли илоҳийси кифоядир». Кейин эса Аллоҳнинг Ғофур ва Роҳийм экани таъкидланиб, дуонинг мукаммаллиги кўрсатилади. Шу сабаб бу муборак дуони солиҳлар доимо намоздан сўнг ўқишган ва Аллоҳнинг чексиз раҳматига юкунишган.

«ПАЙҒАМБАРИМИЗ соллаллоҳу алайҳи васалламнинг МУБОРАК 101 ДУОЛАРИ» китобидан
--- ∽❧❧۞🍃🕌🍃۞∽❧❧∽ ---

🌙🕌«Жума мавъизалари Ўз»
       каналига уланиш учун
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

ПАЙҒАМБАР ЧЕЧАГИ

Бир куни…
Пайғамбар алайҳиссалом оламни нурлантирган кўзлари билан ҳазрат Алига боқиб дедилар:
– Ё Али!
– Лаббай, ё Расулуллоҳ!
– Аллоҳ таолони севасанми?
– Ҳа, Расулуллоҳ!
– Аллоҳнинг расулини севасанми?
– Ҳа, Расулуллоҳ!
– Қизим Фотимани севасанми?
– Ҳа, севаман, – бироз юзи қизариб деди ҳазрат Али.
– Ҳасан билан Ҳусайнни ҳам севасанми?
– Ҳа, Расулуллоҳ, севаман.
– Ё Али! Кўнгил битта, севги тўртта… битта кўнгилга шунча севгини қандай сиғдиряпсан?
– !..
Ҳозиржавоб Али нима дейишини билмай қолди. Аллоҳ таолонинг расулига жавоб бера олмай, рухсат сўраб уйга қайтди. Шу қадар маҳзун эдики, ҳазрат Фотима кўрар-кўрмас нима бўлганини сўради. Ҳазрат Али бўлган воқеани дона-дона сўзлаб берди. Фикрини сўради. Пайғамбар чечаги қуёшдай кулимсираб деди:
– Эй болаларимнинг отаси! Бориб набийлар набийига «Инсоннинг олд-орқаси, ўнг-чапи, ост-усти бўлгани каби кўнгилнинг шундай ёнлари бор. Мен ҳам Азиз ва Жалил Аллоҳни ақл ва иймоним-ла, Аллоҳ таолонинг расулини руҳим ила, Фотимани инсоний нафсим билан, Ҳасан ва Ҳусайнни оталик шафқат ва марҳаматим-ла севаман. Кўнглимнинг ҳар жиҳатида бошқа бир севги яшайди», денг.
Ҳазрат Али дарҳол ортга қайтиб, Пайғамбар алайҳиссаломга шуни сўзладилар. Расулуллоҳ соллаллоҳу алайҳи васаллам кулимсираб:
– Бу сенинг эмас, пайғамбар шохидан узилган чечак сўзидир!
– Тўғри, эй Аллоҳнинг расули!

«ГУЛНИНГ ГУЛЛАРИ» китобидан
--- ∽❧❧۞🍃🕌🍃۞∽❧❧∽ ---

🌙🕌«Жума мавъизалари Ўз»
       каналига уланиш учун
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

БАНДАСИ УЧУН АЛЛОҲНИНГ УЯЛИШИ

Аллоҳнинг ўз бандаларидан уялиши нима эканини биласизми?
Тавротда айтилган: "Гуноҳ қилишдан уялгин, дарҳақиқат, сени жазолашдан Мен ҳам уяламан".
Шунингдек, яна илоҳий китобларнинг бирида шундай дейилган: "Бандам Менга бўлган муносабатда адолатсиздир: Мен унинг сўраган нарсасини рад қилишга уяламан, ҳолбуки, у итоатсизлик қилганида Мендан уялмайди ҳам".
Ҳазрат Пайғамбаримиз соллаллоҳу алайҳи ва саллам марҳамат қиладилар:
"Ҳақиқатда, Аллоҳ энг ҳаёли, энг саховатлидир. Қачонки бандаси недир сўраб илтижо билан қўл очиб дуо қилса, Аллоҳ бу дуога жавоб қилмасликдан уялади" (Баззор ривояти).

«АХЛОҚУС СОЛИҲИЙН» китобидан
--- ∽❧❧۞🍃🕌🍃۞∽❧❧∽ ---

🌙🕌«Жума мавъизалари Ўз»
       каналига уланиш учун
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

"ЭЙ АЛЛОҲ!"

"Осмонлар ва Ердаги (барча) жонзот (ҳожатларини) Ундан сўрар. Ҳар куни У (тинимсиз) фаолиятдадир.

Агар денгиз қутурса, бўронаар авжига чиқса, кемадаги кишилар "Эй Аллоҳ!" дерлар.

Агар саҳродаги киши адашиб қолса, карвон йўлини йўқотса, туядагилар йўлда саросимага тушса, "Эй Аллоҳ!" дерлар.

Агар бахтсизлик рўй бериб, фалокат содир бўлса, мусибатга дучор бўлган бечоралар "Эй Аллоҳ!" дерлар.

Агар талабгорлар қаршисида эшиклар ёпилса, тиланчилар юзларига парда тўсилиб, унут бўлиб кетсалар, "Эй Аллоҳ!" дерлар.

Агар ҳийлалар иш бермаса, йўллар торайган бўлса, орзулар тугаб қолса, арқонлар узилиб кетса, "Эй Аллоҳ!" дерлар.

Агар шу кенг ер сиз учун торайиб кетса, нафсингиз машаққатларни кўтара олмай қолса, сиз ҳам "Эй Аллоҳ!" денг.

Шеър:

Замон гажиб сўнгакларимни
Замин юзин қопласа ғубор,
Муножотим бўлдинг дилимда,
Муножотга айландим хушҳол.
Субҳидамда номингни айтиб,
Истар бўлсам Сени телбавор,
Яна тонгга келурман қайтиб,
Табассумга айланар изҳор.

Яхши сўзлар, самимий дуолар, юракдан чиққан нидолар, айбсиз кўзёшлар, ғамли зорланишлар Унга кўтарилади.

Саҳар вақти очилган кафтлар, ҳожат пайти кўтарилган қўллар, зулм кўргач йиғлаган кўзлар, мусибат чоғи сўраган қалблар Унга интилур.

Тиллар Унинг номи ила куйлайди, сўзлайди, ёрдам сўрайди, нидо қилади. Қалблар Унинг номи ила хотиржам бўлади, кўнгиллар таскин
топади, ҳислар сокин бўлади, асаблар тинчланади, эс-ҳуш ўзига келади, ишонч қарор топади. "Аллоҳ бандаларига меҳрибондир". Шуро сураси 19-оят

"Аллоҳ " исмларнинг энг гўзали, ҳарфларнинг энг чиройлиси, сўзларнинг энг тўғриси, калималарнинг энг бебаҳосидир. "Унга тенг бирор зотни билурмисиз?! ( Марям сураси 65-оят).

"Аллоҳ " беҳожатлик, боқийлик, қувват, нусрат, азизлик, қудрат, ҳикмат демакдир. "Бугун подшоҳлик кимникидир?" Воҳид (ягона) ва Қаҳҳор (ғолиб) Аллоҳникидир.(Ғофир сураси 16-оят)

"Аллоҳ " лутф, иноят, ёрдам, мадад, муҳаббат, эҳсон демакдир. "Сизларда қайси бир неъмат бор бўлса, албатта, у Аллоҳдандир. (Наҳл сураси 53- оят).
Аллоҳ жалолат, азамат, ҳайбат ва куч-қудрат эгасидир.

Шеър:

Саҳар чоғи тўкиламан сажжодага Бир пок ҳарфинг илинжида титрар қалам.
Оқиб кирар зикрларинг дил хонага
Оразинадан нур эммоққа маҳтал мен ҳам...

Аё Раббим!!! Қудратингга йўқдир тараф,
Йўқ тирик жон остонангга чўкмаган тиз
Бир бор раҳмат нигоҳила боқсанг қараб,
Минг йил қуриб ётса, тирик яна илдиз

Эй Аллоҳ, изтироб вақтида тасалли бер, ғамнинг мукофоти қилиб сурур юбор, хавф пайти омонлик етказ.

Эй Аллоҳ, қалб оташини ишонч музи билан совит, кўнгил чўғини имон суви билан ўчир.

Эй Раббим, бедор кўзларга уйқу, изтиробли қалбларга сукунат бер. Уларга мадад бер. Эй Раббим, саросимага тушганларни Нуринг тамонга, йўлдан адашганларни Йўлинг томонга, ҳидоятдан тойганларни ҳидоятингга бошла.

Эй Аллоҳ, васвасаларни чин тонг нури билан кетказ, қалб хатоларини ҳақиқат қўшини ила мағлуб эт, шайтон ҳийлаларини фаришталаринг жамоаси ёрдамида қайтар.

Эй Аллоҳ, биздан ўкинч ва ташвишни, нафсларимиздан изтиробни кетказ.

Хавфдан паноҳ сўрасак, фақат Сендан сўраймиз, фақат Сенга суянамиз. Сенгагина таваккал қилиб, ёрдамни фақат Ўзингдан тилаймиз. Сен бизнинг дўстимизсан.

ДОКТОР ОИЗ ҚАРНИЙ
«ЎКИНМА» китобидан

--- ∽❧❧۞🍃🕌🍃۞∽❧❧∽ ---

🌙🕌«Жума мавъизалари Ўз»
       каналига уланинг
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

УЧ МАСЖИД
Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васаллам: «Кўч боғлаб бориш фақат уч масжидгагина бўлади: менинг ушбу масжидимга, Масжидул Ҳаромга ва Масжидул Ақсога», дедилар» (Бешовлари ривоят қилган).
Ҳадисда келган «кўч боғлаб бориш» жумласини уламолар Аллоҳга қурбат ҳосил қилиш учун тайёргарлик кўриб, кўч-кўронини олиб сафар қилиш деб шарҳлаганлар. Демак, мусулмон инсон савоб умидида сафар қилиши мумкин бўлган учта масжид бор экан. Улар Мадинаи Мунавварадаги Пайғамбаримиз соллаллоҳу алайҳи васалламнинг масжидлари, Маккаи Мукаррамадаги Масжидул Ҳаром, Қуддуси шарифдаги Масжидул Ақсо.

МАСЖИДУЛ ҲАРОМДА
ЎҚИЛГАН НАМОЗ
Абдуллоҳ ибн Зубайр розияллоҳу анҳудан ривоят қилинади:
«Расулуллоҳ соллаллоҳу алайҳи васаллам: «Менинг бу масжидимда ўқилган битта намоз Масжидул Ҳаромдан ташқари бошқа масжидларда ўқилган мингта намоздан афзалдир. Масжидул Ҳаромда ўқилган битта намоз менинг бу масжидимда ўқилган юзта намоздан афзалдир», деганлар.
Демак, Масжидул Ҳаромда ўқилган битта намознинг савоби бошқа масжидларда ўқилганидан юз минг марта ортиқ. Шуни яхши билиб олиш керакки, бу қазо намозларга тегишли гап эмас.

РАСУЛУЛЛОҲНИНГ
МАСЖИДЛАРИ
Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васаллам:
«Ушбу масжиддаги намоз ундан бошқалардаги мингта намоздан афзалдир. Масжидул Ҳаром бундан мустасно», дедилар» (Имом Муслим ривояти).
Расулуллоҳ соллаллоҳу алайҳи васалламнинг масжидларида ўқилган намознинг савоби бошқа масжидларда ўқилган намоздан минг баробар кўпдир.

МАСЖИДУЛ АҚСОДА ЎҚИЛГАН БИР РАКЪАТ НАМОЗ САВОБИ
Анас ибн Молик розияллоҳу анҳудан ривоят қилинади:
«Расулуллоҳ саллаллоҳу алайҳи васаллам: «Кишининг уйидаги намози бир намозга баробардир. Қабила масжидидаги намози йигирма беш намозга баробардир ва жоме масжидидаги бир намози беш юз намозга тенгдир. Масжидул Ақсодаги бир намози эллик минг намозга тенгдир. Менинг масжидимдаги бир намози эллик минг намозга баробардир. Масжидул Ҳаромдаги бир намози юз минг намозга тенгдир», дедилар» (Имом Ибн Можа ривояти).

Музаффар Камоловнинг
«МАСЖИД ОДОБЛАРИ» китобидан

--- ∽❧❧۞🍃🕌🍃۞∽❧❧∽ ---
      🌙🕌«Жума мавъизалари Ўз»
               каналига уланинг
   👉  t.me/JUMA_MAVIZALARI

-- ∽❧❧۞🍃🕌🍃۞∽❧❧∽ ---

9. САОДАТГА ЭРИШИШ ДУОСИ

اللهم أرنا الحق حقا وارزقنا اتباعه وأرنا الباطل باطلاً والهمنا اجتنابة وأرنا الأشياء كما هي حقها

Аллоҳумма аринал ҳаққо ҳаққон варзуқнат тибаъаҳу ва аринал батила батилан ва алҳим нажтинабаҳу ва аринал ашя а кама ҳия ҳаққуҳа.

Маъноси:

«Ё Аллоҳ! Бизга тўғрини тўғри қилиб кўрсат ва унга эргашишни насиб эт. Эгрини эгри қилиб кўрсат, ундан қочишни бизга илҳом айла ва нарсаларнинг ҳақиқатини асли каби кўрсат».

Шарҳ:

Бу имтиҳон дунёсида барча хатолар бор нарсани ўз ҳолича кўролмаслик сабабли содир бўлади. Инсон тўғрини тўғри деб кўрса, ҳеч бир вақт хато қилмайди. Эгрини ҳам эгри деб кўрса, ҳеч бир замон унинг ортидан кетмайди. У ҳолда бу муборак дуо барча ютуқларнинг асосини ташкил этади. Ҳақни ҳақ, ботилни ботил деб кўрмоқ, нарсаларнинг ҳақиқатини аслидек кўрмоқ илм ва маърифат ўзагидир. Тарихда кўп инсонлар ҳақ бўлган набийларга ишонмагани сабабли хатога йўл қўйиб, куфр йўлидан кетишган.
Ҳақ аҳлини кўрмоқ ҳидоят нурига эришишнинг ифодасидир. Бу муборак дуо ҳар доим ҳар банданинг Раббисидан исташи ва кўз олдида тутиши зарур бўлган дуодир.
Инсондаги нафс, ваҳима ва шайтон васвасаси ҳақиқатни кўришдан узоқлаштиради. Моддий ва маънавий илмларнинг энг буюк бўлгани нарсаларнинг ҳақиқатини кўра олиш неъматини Аллоҳдан сўраш лозим. Шу маънода бу муборак дуо ҳаёт қадар қимматлидир. Чунки ҳақиқатни кўра олиш билан саодатга эришилади. Ҳақиқатни кўрмаган кўзлар инсонни доимо фалокатта судрайди.

«ПАЙҒАМБАРИМИЗ соллаллоҳу алайҳи васалламнинг МУБОРАК 101 ДУОЛАРИ» китобидан
--- ∽❧❧۞🍃🕌🍃۞∽❧❧∽ ---

🌙🕌«Жума мавъизалари Ўз»
       каналига уланиш учун
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

КЕНГ РИЗҚ СЎРАШ ДУОЛАРИ

اللَّهُمَّ أَكْثَرُ مَالِي ، وَوَلَدِي ، وَبَارِكْ لِي فِيمَا أَعْطَيْتَنِي وَأَطِلُّ حَيَاتِي عَلَى طَاعَتِكَ، وَأَحْسِنُ عَمَلِي وَاغْفِرْ لِي

«Аллоҳумма аксир маалии ва валадии, ва баариклии фии маа аътойтани ва атил ҳаяати ъалаа тоъатика ва аҳсин ъамали вағфирлии».
Маъноси:
«Эй Аллоҳим, молимни ва фарзандимни кўпайтиргин. Менга нима берган бўлсанг, баракаси билан бергин. Тоат-ибодатингда умримни узун қилгин ва амалларимни чиройли қилгин, мени мағфират қилгин».
Шарҳ:
Аслида, бу дуо Расулуллоҳ соллаллоҳу алайҳи васалламнинг Анас розияллоҳу анҳу учун қилган дуолари. У зотнинг олдларига Анас розияллоҳу анҳуни онаси олиб келиб, «Бу Анас, хизматингиз-да», - деб айтади. Шунда Расулуллоҳ соллаллоҳу алайҳи васаллам ушбу дуони Анас розияллоҳу анҳу учун қилганлар. Дуо ижобатидан Анас розияллоҳу анҳунинг мол-мулки кўп бўлган, ҳатто хурмозорлари бир йилда икки маротаба ҳосил берган. Авлодлари фарзанд ва набиралари билан ҳисобланганда, 100 дан ошган, узоқ умр кўриб, 109 йилдан кўпроқ яшаганлар.

Ризқ ҳақидаги дуолардан яна бири:

اللهُمَّ إِنْ كَانَ رِزْقِي فِي السَّمَاءِ فَأَنْزِلُهُ، وَإِنْ كَانَ فِي الْأَرْضِ فَأَخْرِجُهُ، وَإِنْ كَانَ بَعِيدًا فَقَرَبَهُ، وَإِنْ كَانَ قَرِيبًا فَيَسْرُهُ، وَإِنْ كَانَ قليلا فكثره ، وَإِنْ كَانَ كَثِيرًا فَبَارِكْ لِي فِيهِ

«Аллоҳумма ин каана ризқии фис-самааи фанзилҳу ва ин каана фил арди фахрижҳу ва ин каана баъидан фақоррибҳу ва ин каана қориибан фаяссирҳу ва ин каана қолиилан факассирҳу ва ин кана касиирон фабаарик лии фииҳ».
Маъноси:
«Эй Аллоҳим, агар ризқим осмонда бўлса, уни тушириб бер, агар ерда бўлса, чиқариб бер, агар узоқда бўлса, яқинлаштириб бер ва яқинда бўлса осон қилиб бер. Оз бўлса, кўпайтириб бер, кўп бўлса, баракали қилиб бер»,

Бу дуо Китоб ва суннатда келмаган, баъзи аҳли илмлар шу дуони қилганлар ва ризқ ҳаракатидаги одамларга ҳам шулар билан дуо қилишни тавсия қилганлар.

«Аллоҳ таола сизни эслашини
ҳоҳлайсизми» китобидан
--- ∽❧❧۞🍃🕌🍃۞∽❧❧∽ ---

🌙🕌«Жума мавъизалари Ўз»
       каналига уланинг
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

МАСЖИДЛАР ҲАҚИДА
ҲИКМАТЛАР

«Расулуллоҳ соллаллоҳу алайҳи васаллам:
«Ҳар бир бино Қиёмат куни эгасига балодир. Лекин масжид ундай эмас», дедилар» (Имом Байҳақий ривояти).

Ҳазрати Алий розияллоҳу анҳу:
«Агарда менга масжид ва жаннат икковидан бирини танлаш ихтиёри берилса, масжидни танлаган бўлардим. Чунки масжид Аллоҳнинг ҳаққидир, жаннат эса нафснинг насибасидир», дедилар.

Каъбул Ахбор розияллоҳу анҳу:
«Мўминларга шайтондан ҳимояланиш учун учта қўрғон бор, булар масжид, Аллохни зикр этиш ва Қуръон ўқишдир», дедилар.

Анас розияллоҳу анҳу:
«Албатта, агар Аллоҳ таоло осмондан ер аҳлига бирор офат туширса, масжид аҳлини у офатдан сақлайди», дедилар (Ибн Асокир ривояти).

Тобеъинларнинг саййиди Саъид ибн Му-сайяб раҳимаҳуллоҳ:
«Эллик йил давомида масжидда жамоат намозида ҳозир бўлдим», дедилар.

Ибн Самма раҳимаҳуллоҳ:
«Кирқ йил бирор марта жамоат намозини тарк этмадим. Фақатгина онам вафот этган куни жамоатга бироз кеч қолдим», дедилар («Сияр аълам ан-нубало» асаридан).

Омир ибн Абдуллоҳ раҳимаҳуллоҳ вафоти чоғида муаззиннинг азонини эшитиб қолиб: «Мени масжидга олиб чиқинглар!» деди. Унга: «Ахир беморсиз-ку!» дейишди. Шунда у киши: «Азонни эшитиб, унга ижобат қил майманми?!» дедилар. Қўлларидан ушлаб, масжидга олиб боришди. У имом билан бир ракъат намоз ўкиб, вафот этдилар. Буни ҳусни хотима дейдилар.

Бир солиҳ кишидан: «Нега доимо азон айтилмасидан олдин масжидга келасиз?» деб сўрашди. Ушбу саволга жавобан ҳалиги солиҳ киши: «Азон ғофилларни уйғотиш учун, мен эса ғофиллардан бўлмасликка ҳаракат қиламан», деб жавоб берди.

--- ∽❧❧۞🍃🕌🍃۞∽❧❧∽ ---
      🌙🕌«Жума мавъизалари Ўз»
               каналига уланинг
   👉  t.me/JUMA_MAVIZALARI

--- ∽❧❧۞🍃🕌🍃۞∽❧❧∽ ---

ЧУНКИ БИЗ ХУФТОН НАМОЗИНИ ЖАМОАТ БИЛАН ЎҚИДИК

Убайдуллоҳ Қоваририй (Имом Бухорий ва Имом Муслимнинг устози) розияллоҳу анҳу айтади:
«Мен ҳеч қачон хуфтон намозини жамоат билан ўқишни канда қилмаганман. Бир куни уйимга меҳмон келиб қолди ва шу сабаб машғул бўлиб қолдим.
Хуфтонни жамоат билан ўқий олмадим. Басрадаги намоз ўқилаётган масжидларни қидириб кўчага чиқдим. Одамларнинг ҳаммаси намоз ўқиб бўлган ва масжидлар эшиги ёпилган эди. Уйимга қайтдим ва: «Ҳадисда келтирилишича, жамоат билан ўқилган намоз уйда ўқилган намоздан йигирма етти баробар устун бўлади», дедим ва хуфтонни йигирма етти марта ўқидим. Ухладим ва тушимда от устида кетаётган одамлар билан мен ҳам бирга эдим. Менда ҳам от бўлиб, биз мусобақалашаётган эдик. Мен отимни чоптиришимга қарамай уларга ета олмас эдим. Улардан бири менга ўгирилиб қаради ва: «Отингни чарчатма, сен бизга ета олмайсан», деди. Нима учун ета олмаслигимни сўрадим. Шунда у айтди: «Чунки биз хуфтон намозини жамоат билан ўқидик, сен эса ёлғиз ўқидинг». Уйқудан гамга ботган ва маҳзун ҳолда уйғондим».
Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васаллам:
«Ким эртами-кечми, масжид томон борса, Аллоҳ таоло унга ҳар эрта ва кеч юрганида жаннатдан манзил тайёрлайди», дедилар» (Имом Бухорий. Имом Муслим ва Имом Аҳмад ривояти).
Бу мукофот масжидга эрта тонгда ёки кечаси намоз ёки уни кутиб туриш учун, илм ёки мажлисида қатнашиш ёки унда ўтириш учун борадиган инсинларга берилади. Шарти, у ғийбат, ёлғон ва унга ўхшаш нарсаларни сўзламаслик керак.

--- ∽❧❧۞🍃🕌🍃۞∽❧❧∽ ---
🌙🕌«Жума мавъизалари Ўз»
        каналига уланинг
   👉  t.me/JUMA_MAVIZALARI