Андижон вилояти судлари | Расмий канал

Ижтимоий тармоқларнинг бирида эълон қилинган билдириш юзасидан

Мазкур чиқиш орқали қасддан одам ўлдирган шахс ўзига нисбатан берилган жазони енгиллатишга уринаётганлиги иддао қилинади.

Аниқланишича, жиноят ишлари бўйича Андижон шаҳар судининг 2024 йил 23 октябрдаги ҳукмига кўра, судланувчи Р.С.га Ўзбекистон Республикаси Жиноят Кодекси 97-моддаси (қасддан одам ўлдириш) 2-қисмининг “а,г,д,ж” бандлари, 104-моддаси (қасддан баданга оғир шикаст етказиш) 2-қисмининг “в” банди, 105-моддаси (қасддан баданга ўртача оғир шикаст етказиш) 2-қисмининг “г” банди ҳамда 126-1-моддасининг (оилавий (маиший) зўравонлик) 3-қисми билан 22 йил озодликдан маҳрум қилиш жазоси тайинланиб, жазони умумий тартибли колонияда ўташ белгиланган.

Мазкур жиноят иши Андижон вилоят суди жиноят ишлари бўйича судлов ҳайъати апелляция инстанцияси томонидан Р.С.нинг ҳимоячиси билан биргаликдаги ҳамда жабрланувчи вакили М.Х.нинг апелляция шикоятлари асосида кўриб чиқилган. Суднинг 2024 йил 12 декабрь кунги ажримига кўра, қуйи суднинг Р.С.га нисбатан чиқарилган ҳукми ўзгаришсиз, судланган ва жабрланувчининг апелляция шикоятлари қаноатлантирилмасдан қолдирилганлиги маълум қилинади.

Сайт I Telegram

Komporuz телеграм каналида эълон қилинган билдириш юзасидан

Мурожаат муаллифи Б.А. ўзига нисбатан жиноят ишлари бўйича Андижон шаҳар судининг 2024 йил 20 декабрдаги қарорига кўра, Ўзбекистон Республикасининг Маъмурий жавобгарлик тўғрисидаги кодекси 194-моддаси (Ички ишлар органлари ходимининг қонуний талабларини бажармаслик) 1-қисми билан базавий ҳисоблаш миқдорининг 4 баравари миқдорида (1 миллион 360 минг сўм) жарима жазоси тайинланганлигидан норозилигини баён қилган.

Андижон вилояти суди жиноят ишлари бўйича судлов ҳайъати томонидан 2024 йил 27 декабрь куни мурожаат муаллифига нисбатан юритилган маъмурий ҳуқуқбузарлик тўғрисидаги иш унинг шикояти асосида апелляция тартибида кўриб чиқилди. Апелляция инстанцияси томонидан қуйи суднинг қарори бекор қилиниб, Б.А. Маъмурий жавобгарлик тўғрисидаги кодекснинг 21-моддасига (Ҳуқуқбузарликнинг кам аҳамиятлилиги сабабли маъмурий жавобгарликдан озод қилиш) асосан маъмурий жавобгарликдан озод этилганлиги маълум қилинади.

Сайт I Telegram

Андижон вилояти судида тергов судьяси институтининг жорий этилиши муносабати билан амалга оширилган ишлар, тергов судьяларининг вазифалари ва асосий йўналишлари билан боғлиқ масалаларга доир семинар-машғулоти ўтказилди. Олий суд, Судьялар олий кенгаши, Судьялар олий мактаби ҳамкорлигида ташкил этилган тадбирга ҳуқуқни муҳофаза қилувчи идоралари вакиллари ҳам таклиф этилдилар.

Маълумки, давлат раҳбарининг 2024 йил 10 июндаги “Тезкор-қидирув ҳамда тергов фаолиятида шахснинг ҳуқуқ ва эркинликларини ишончли ҳимоя қилиш кафолатларини янада кучайтириш чора-тадбирлари тўғрисида”ги Фармонига мувофиқ, 2025 йил 1 январдан бошлаб жиноят ишлари бўйича судга қадар иш юритув даврида процессуал қарорларга санкция бериш масаласи жиноят ишлари бўйича туман, шаҳар судларида алоҳида судьялар — тергов судьялари томонидан кўриб чиқилиши тартиби жорий этилиб, тергов судьялари фаолият бошлайди.

Учрашувда «Ўзбекистон — 2030» стратегиясида белгиланган устувор йўналишлардан келиб чиқиб, судлар фаолияти самарадорлигини ошириш, ишни судга қадар юритишда тарафларнинг тенглиги ва тортишуви принципини амалда таъминлаш, тезкор-қидирув ҳамда тергов фаолиятида шахснинг ҳуқуқ ва эркинликларини самарали ҳимоя қилинишига эришиш мақсадида ҳаётга татбиқ этилаётган мазкур янги институтнинг аҳамияти ва ишлаш механизмлари хусусида сўз юритилди.

Мунозарага бой тарзда ўтган мулоқотда ҳуқуқни муҳофаза қилувчи органлар вакиллари ҳамда адвокатлар мавзу юзасидан ўзларини қизиқтирган саволларга атрофлича жавоб олдилар.

Сайт I Telegram