ДАВЛАТ АЖРАТГАН ПУЛЛАР ҚАНДАЙ САРФЛАНАЁТГАНИНИ НАЗОРАТ ҚИЛИШ ЖАМОАТЧИЛИККА ҚЎЙИБ БЕРИЛСА ЭДИ... «Юксалиш» умуммиллий ҳаракати маълумотига кўра, ўтган давр мобайнида мамлакатда коронавирус инфекцияси тарқалишига қарши курашиш учун 1,7 трлн. сўм йўналтирилган бўлиб (2020 йил 9 июль ҳолатига кўра), ушбу маблағлар қуйидаги мақсадларга сарфланган:
• 157,6 млрд. сўм — тиббий ускуналар ва буюмлар харид қилишга;
• 385,9 млрд. сўм — тест тизими, дори воситалари ва шахсий ҳимоя воситалари харид қилишга;
• 257,6 млрд. сўм — тиббиёт ходимларини қўшимча моддий рағбатлантириш ва маошига 6 фоиз устама тўлашга;
• 599,1 млрд. сўм — карантин зоналари ва махсус шифохоналар қурилишига;
• 299,8 млрд. сўм — карантинда сақланаётган шахсларни парваришлашга.
Бундан ташқари, бюджет маблағлари ҳисобидан 72 млрд. сўмдан зиёдга тиббий буюм ва ускуналар сотиб олинган бўлиб, улар:
• 500 та сунъий нафас олдириш аппарати — 5,75 млн. доллар (57,5 млрд. сўм);
• 60 та ультратовушли текширув аппарати - 648 минг доллар (6,5 млрд. сўм);
• 10 та полимераз занжир реакцияси аппарати - 210 минг доллар (2,1 млрд. сўм);
• 60 та дефибриллятор – 280 минг доллар (2,8 млрд. сўм);
• 90 та кардиомонитор – 180 минг доллар (1,8 млрд. сўм);
• 500 та пульсоксиметр – 125 минг доллар (1,2 млрд. сўм) ҳисобланади.
ЭНДИ ҲАҚЛИ САВОЛ ТУҒИЛАДИ!
1. Нега ҳаёт билан ҳужжатлар бир-бирига тўғғри келмаяпти?
2.Нега унда ижтимоий тармоқларда кўплаб врачлар қўшимча тўловларни олмаганлигидан шикоят қилишяпти?
3.Нега вилоятларда тиббиёт ходимлари ҳимоя воситаларини ўз пулимизга сотиб оляпмиз дейишяпти?
4. Нега кўпчилик сунъий нафас олиш аппарати қидириб юрибди?
5. Нега тест етишмаяпти?
6. Нега касалхоналарда жой йўқ дейишяпти?..
ИЖТИМОИЙ ТАРМОҚЛАР ШУ КАБИ САВОЛЛАРГА ТЎЛИБ ТОШГАН, ҲАММАСИНИ САНАБ ЎТИШИМГА ҲОЖАТ ЙЎҚ.
Бу пуллар ажратилганига шубҳам йўқ, фақат қандай сарфланаётгани қаттиқ назорат қилинишига ишонмайман.
Агар ҳудудларга нима мақсадда ва қанча маблағ ажратилгани ҳақида рақамлар билан аниқ-тиниқ ҳисобот берилса эди, жамоатчилик, блогерлар ва журналистларнинг ўзи ҳам назорат қилишда ёрдам беришарди. Айтайлик, фалон вилоятнинг фалон касалхонасига фалон минг доллар тиббий ускуналар олиш учун йўналтирилди, дейилса, йўл-чўлдаги қароқчилар “буни ҳисобини сўраб қолишади” деб чўчиб туришарди. Ўйлайманки, шунда Бухоро СЭСидаги каби воқеалар камаярди.
Шаффофлик бўлса, ижтимоий тармоқлар ҳам бу қадар қайнамасди.
Фақат илтимос, буни ҳисоботини ҳам тиббиёт ходимларига юклашнинг кераги йўқ. Уларни шундоқ ҳам чарчатиб қўйдик. Ҳар йили олий ўқув юртларини минглаб молиячи ва иқтисодчилар битиришади. Бу уларнинг вазифаси. Ҳар бир вилоят ва ҳудудлар бўйича ҳисоботларни сайтларига илиб қўйишса, назорат осонлашади.
“Пир во время чумы»дан ҳам хазар қилмайдиганлардан давлат пули ҳисобини талаб қилишга эса ҳаммамизнинг ҳақимиз бор. Аслида, бу билан Америка кашф қилмадим, бу барча ривожланган давлатларда қўлланиладиган тажриба. Ҳа энди, у ривожланган давлатларда, деманг. Биз ҳам қачондир шу қадамни қўйишимиз керак. Келинг, шуни ҳозир бошлайлик, бунинг учун маълумотлар шаффоф қилинса, кифоя-ку.
@dilfuzasobirova
