Евгений Пригожиннинг ўлими ортида Патрушев турибди — Wall Street Journal Wall Street Journal билан суҳбатлашган собиқ россиялик разведка ходимининг сўзларига кўра, Патрушев Путинни Пригожин хавфи ҳақида 2022 йил ёзида огоҳлантира бошлаган, бироқ президент унинг сўзларига қулоқ солмаган, чунки вагнерчилар жанг майдонида муваффақиятга эришаётган эди. Аммо Путиннинг бу қарашлари 2022 йил октябр ойида ўзгарган.
Ўшанда Пригожин унга қўнғироқ қилиб, қўполлик билан ўқ-дорилар етишмаслигидан шикоят қилган. Путин Пригожиннинг таъминот ҳақидаги кейинги шикоятларини, шу жумладан Россия ҳарбий раҳбарияти билан оммавий можароларни эътиборсиз қолдириб, унинг қўнғироқларига жавоб бермай қўйган.
2023 йил июнь ойида Пригожин ҳарбий исённи бошлаганида, Патрушев "назоратни ўз қўлига олди", дейилади материалда. Қайд этилишича, унда Хавфсизлик кенгаши раҳбари Пригожин тарафдорлари қаторида бўлган зобитларни чақириб, Вагнер раҳбарини исённи тўхтатишга кўндиришни сўраган. Патрушев, шунингдек, можарони ҳал қилиш учун қўшни давлатлардан воситачи қидирган. Александр Лукашенкодан ташқари, унда Қозоғистон президенти Қосим-Жомарт Тўқаев варианти ҳам бор эди.
Режага кўра, агар Россия армияси ёлланма аскарларни енга олмаса, Қозоғистон қуролли кучлари майдонга чиқиши керак эди, бу билан қозоқлар 2022 йил январда тартибсизликларни бостиришга ёрдам берган КХШТ кучларига жавоб ёрдамини кўрсатарди. Бироқ Тўқаев бунга рад жавобини берган.
Қўзғолон тугагач, Патрушев Пригожинни йўқ қилиш режасини ишлаб чиқишни бошлади. Нашрнинг Ғарб разведка идораларидаги манбаларига кўра, Путинга бу режалар кейинроқ кўрсатилган ва у эътироз билдирмаган. 23 август куни Вагнер раҳбари Шереметьево аэропортида учиб кетишдан олдин самолёти текширилаётганини кутиб туради, айнан ўша вақтда унинг самолёти қанот остига кичик бомба қўйилади. Парвоздан ярим соат ўтгач, тахминан 8500 метр баландликда бомба портлаб кетади. Самолётдаги ўн кишининг барчаси ҳалок бўлади.
🔥
@fayzboguz
