📝Хуршид Неъмат📝[official channel]

Бир ўрис йигит ижтимоий тармоққа чиқиб, ўз уйида ишлаётган ўзбекистонлик мигрантни “итим” деди. Бу шеър ўша аламнинг таъсирида битилди...

Бир ит ижтимоий тармоққа чиқиб
Миллатингни сўкса, ит деб атаса,
Икки қулоғингга пахтани тиқиб
Тунлари хотиржам қандай ётасан?

Бобонг Регистонни қурдирган маҳал
Чипта ковуш кийиб юрган ароқхўр,
Вайсаб турса, оринг қўзғалмасми сал
Гўё қулоғинг кар, гўё кўзинг кўр?

Ит ўзин итлигин билмаса ёмон
Бўрига осилар, айланиб боши,
Сурати одаму сийрати ҳайвон
Билмас, ботиб борар борҳо қуёши.

Зулмнинг устига қурилган давлат
Ажабмас, эртага кетса тарқалиб,
Ажабмас, мустақил бўлса ҳар миллат
Тўлиқ жом тўкилгай, турса чайқалиб.

Бугун олимлар жим, зиёлилар жим
Гўё бу миллатга эмасдай дохил,
Бир алкаш атади ўзбекни “итим”
Маърифатдан йироқ, саводсиз жоҳил.

Рацистми, нацистми, ё шовинистми
Ё ксенофобми – нима фарқи бор,
Жавобини бермоқ керакку унинг
Токайгача мудраб ётар номус-ор?

“Ойнаи жаҳон” жим, газеталар жим
Блогерлар қочдими ё ҳар ёққа?
Ўрисми, жуҳудми, бўлса-да у ким
Ҳаққи йўқ миллатни таҳқирламоққа!

Шундай пайт асқотар ҳар ботир юрак
Асқотар шундай пайт ҳар бир бийрон тил,
Қўрқоқдир миллатни асрамас эркак
Таҳқирга кўниккан сукунат – қотил!

Абдунаби Ҳамро

‍Бугун катта шоиримиз, устозимиз Хуршид Даврон туғилган кун.

Шу инсоннинг бир ўзи бутун Ўзбекистон ёшлари, ёш ижодкорлари учун ишлади. Қандай? Хуршид Даврон кутутбхонаси орқали. Билиб қўйинг на уюшма, на бирор журнал эмас, айнан Хуршид Даврон кутубхонаси кашф қилиб берди ҳозир тилга тушиб, атак-чечак қилаётган ёшларнинг энг сараларини! Агар у киши бўлмаганда адабиётимиз тағин билмадим яна неча йил озуқасиз, ўлжасиз қоларди. Не ажабки, шунча ёшлар юзага чиқишига жон куйдирган катта шоирнинг ўзини китоби 20-25 йилдан бери чиққани йўқ. Бунга на ёзувчилар уюшмаси бош суқади, на бирор нашриёт рағбат билдиради. Хуршид Даврон ҳозир деярли йўқолиб кетаётган табиат шоири! Охирги йигирма йилликда ёппасига руҳиятга мурожат қилишга ўтиб кетган шеъриятимиз Хуршид Даврон лирикаси, пейзажи, табиат тасвирларига муҳтож! Буни тушунадиган валломат йўқми?! Тағин бирорта катта ижодор Ўзбекистон ёш ижодкорларини Хуршид Даврончалик яхши билмайди! У киши билан пойтахт, вилоятларда тинмай учрашув қилиш, иложи борича кўпроооқ нарса олиб қолиш керак. Ғиж-ғиж тарих ётибди бу шоирнинг ичида! Ғиж-ғиж илм... Умрлари узоқ бўлсин.

Хуршид Даврон 70-йиллар шеъриятида ўз муҳрини қолдирган "фантастик тўртлик"дан бири!

ЭНГ КУЧЛИ БАҚИРИҚ…

Энг кучли бақириқ –
соқовнинг бақириғи.
Ў, қандай куч билан бақирар
қабртошлар…

Энг кучли сукунат –
на кўз сукути,
на соқов сукути, на тош сукути.
Энг даҳшатли сукунат –
шоир жим юрса…

1979

ЛОРКА ЎЛИМИ

Уни тонгга тираб отдилар…
У йиқилди,
Сўнг яна турди
Ва ёшгина,
Букри бир аскар
Қўндоқ билан бошига урди.
У жон берди…
Аскарлар эса
Шоша-пиша ортга қайтдилар,
Шароб ичиб мунгли қўшиқни
Тун сукутин бузиб айтдилар.
Бу қўшиқда булутни ёрган
Ҳилол чўққи узра порларди,
Бу қўшиқ қор остида ётган
Чечакларни бўзлаб чорларди.
Бу қўшиқда қора кийинган
Тул кампирлар эртак тўқирди,
Уларнинг олдида кўзи кўр бола
Зулмат аро китоб ўқирди.
Қўшиқ куйлаб,
Туйиб аламни,
Ёш аскарлар сармаст эдилар,
Шу қўшиқни ёзган одамни
Отганларин билмас эдилар…
1986

ЭРИБ КЕТАР ХИРА ТУМАНЛАР…

Эриб кетар хира туманлар,
капалакдек уйғонар ялпиз.
Осмон дарё бўлиб туюлар,
ўтлар узра чопқиллайди кўз.

Қайрағочнинг гули – митти жом –
жаранглайди – таралар атир.
Ва тушларга кирар бу оқшом
майсаларни қучоқлаб адир.

Шамол елар эркин, қутуриб,
қурий бошлар томлар тўсини.
Гуллаётган олчани кўриб
деразалар очар кўксини.

Ёритганча то юрак ичин
сабза ўтлар шабнамга қонар.
Ватанини соғинмоқ учун
ер остида жангчи уйғонар.

1980

* Юрак тилга кирди

Кечолмаяпман...

Дақиқалар, соатлар ўтар,
Ҳаётдан дарс олиб боряпман.
Қанча ташвиш, қанча иш кутар,
Шеър ёзишдан кечолмаяпман.

Кимга шифо, кимга пул керак,
Кимдир бахтли, кимнинг ҳоли танг.
Гўё буйруқ беряпти юрак,
Шеър ёзишдан кечолмаяпман.

Тиғлаб ёрсиз ёр-ёрлар саси,
Тақдирга ҳам кўндирди аранг.
Нима сабаб, билмам, қисқаси,
Шеър ёзишдан кечолмаяпман.

Соғинчнинг ҳам таъми бўларкан,
Мусофирни ўртайди Ватан.
Дил таскинга бироз тўларкан,
Шеър ёзишдан кечолмаяпман.

Дўстнинг мендан кўнгли тўқмиди?
Гоҳ бир узр сўролмаяпман.
Бошқа ғамим, камим йўқмиди?!
Шеър ёзишдан кечолмаяпман.

Пешонамга ёзгани шудир,
Масалам шу – ечолмаяпман.
Шеър-ку, мендан кечган бир умр,
Мен ёзишдан кечолмаяпман.

Шеър ёзишдан кечолмаяпман…

✍️ Хуршид НЕЪМАТ
Уланиш учун босинг: https://t.me/ijod_bustoni

САБАБЛАРИ ҚИДИРИЛМОҚДА

Одамлар оч,
Колбаса лекин
Кучукларга едирилмоқда.
Шарҳ этамиз бу ҳолни секин:
Сабаблари қидирилмоқда.

Ўлдирмоқда ака-укани,
Оилалар емирилмокда.
Сабабини ким айтар, қани?
Сабаблари қидирилмоқда.

Самолётни опқочди биров,
Норозилик билдирилмоқда.
Жавобимиз тайёрдир дарров:
Сабаблари қидирилмоқда.

Ер юзидан катта бир давлат
Шитоб билан сидирилмокда.
Биз-чи мажлис қиламиз фақат:
Сабаблари қидирилмоқда.

Абдулла Орипов
@Abdulla_Oripov_sherlari