Бухоро. Ёзувчилар уюшмаси

***
Сийратдаги сирлар кўчганда тилга,
Не гўзал туйғулар сиғмаса дилга,
Минг йиллик умидлар бўлганда сароб,
Нима таскин бўлар куйган кўнгилга?

Уммон бўлиб тошса кўзимдаги нам,
Тор кўринса кўзга шундай кенг олам,
Яшамоқдан безиб кетган чоғларим,
Фақат бир зот бўлар жонимга малҳам:
Кундузи дуода тунлари бедорим,
Онаизорим.

Омадим келмаса йиғлаганим у,
Изтиробда бағрин тиғлаганим у,
Ғанимларим қоним ичиб шодланса,
Шундай кенг дунёга сиғмаганим у.

Мен бир содда касман, найрангдан йироқ,
Тортганим изтироб, топганим фироқ.
Кўксимда осиғлиқ турар ҳануз ҳам
Онам ёшлигимда таққан кўзмунчоқ.
Мени балолардан асрар туморим,
Онаизорим.

Яримта нонимни илиб кетса дўст,
Эл бўлиб, теримни шилиб кетса дўст,
Боримни қўлимдан юлиб кетса дўст,
Дилдаги сиримни билиб кетса дўст,
Куйдириб бағримни тилиб кетса дўст,
Йиқилсам, устимдан кулиб кетса дўст.

Дўст дедим, дўстимдан панд едим охир,
Дил бериб, оқибат дард едим охир.
Аросат ичинда тўлғониб, ёниб,
Ўртаниб яшамоқ нақадар оғир.
Бу ёруғ дунёда топганим, борим,
Онаизорим.

Топганим-тутганим боламга деган,
Ҳар луқма ютганин боламга деган,
Мен кўрмаган кунлар ўғлимга тортиқ,
Бир умр кутганим боламга деган.
Боласидан тортса, куйганим ўша,
Дуосида айтиб, суйганим ўша,
Олисларга кетсам, соғиниб, алқаб,
Суратим кўксига қўйганим ўша.
Фарзанд қайғусида сочлари қорим,
Онаизорим.

Сенга не улашдим, сенга не бердим?
Фақат ғамни тутдим, фақат дард, озор.
Кўзларингда фарзанд ташвишин кўрдим,
Азобимдан мерос сочингдаги қор.
Бу телба дунёда топганим, борим,
Онаизорим.

Камолиддин ШУКУР

Уланиш учун: https://t.me/ijod_bustoni

ЖЎНАТИЛМА(ЙДИ)ГАН МАКТУБ

Онажон, мени кечиринг. Сиздан бошқа ҳеч кимни хафа қилганим йўқ. Сиздан бошқа бировга қаттиқ гапирган эмасман. Сиздан бошқа ҳаммага берган ваъдамнинг устидан чиққанман. Сиздан бошқа ҳеч бир кимсанинг ишини ортга сурган, кечиктирган эмасман. Сиздан бошқаларнинг ташвишини кўпроқ чекдим. Сиздан бошқалар ҳақида кўпроқ қайғурдим. Сиздан бошқаларни кўпроқ рози қилиш ҳақида ўйладим. Сиздан бошқаларнинг дуосини олиш учун кўпроқ елиб-югурдим. Кўзимнинг нурини Сиз учун эмас, бошқалар учун кўпроқ сарфладим. Топган-тутганимни Сиз учун эмас, бошқалар учун кўпроқ харжладим. Сиздан бошқалар ҳақида кўпроқ хаёл сурдим, Сиздан бошқалар учун кўпроқ азият чекдим. Сиздан бошқаларнинг дардига кўпроқ малҳам бўлдим. Сиздан бошқаларнинг изтиробига кўпроқ шерик бўлдим, Сиздан бошқалар учун кўпроқ кўз ёш тўкдим. Сиздан бошқа ҳамма учун вақт топдим, Сиздан бошқа ҳамма учун ҳафсала топдим. Сиздан бошқа ҳеч кимнинг қўнғироғига жавоб бермай қўйган эмасман. Сиздан бошқа ҳеч кимни куттирган эмасман. Сиздан бошқа ҳеч кимга қовоқ уйган эмасман, Сиздан бошқа ҳеч кимга эркаланган эмасман. Сиздан бошқа ҳеч кимни унутган эмасман...
Сиздан бошқа ҳеч ким мен учун бунчалик кўп қайғурган эмас. Сиздан бошқа ҳеч ким мен учун бунчалик кўп харажат қилган эмас. Сиздан бошқа ҳеч ким мени Сизчалик аяган эмас. Сиздан бошқа ҳеч ким мени Сизчалик ўйлаган эмас. Сиздан бошқа ҳеч ким мен учун тунларини бедор ўтказмаган, Сиздан бошқа ҳеч ким мен учун борини бировларга тутқазмаган. Сиздан бошқа ҳеч ким мени деб уйғонмаган, Сиздан бошқа ҳеч ким мени деб тўлғонмаган. Сиздан бошқа ҳеч ким мен учун жонини бермаган, Сиздан бошқа ҳеч ким мен учун қонини бермаган. Сиздан бошқа ҳеч ким еб турган нонини тутмаган, Сиздан бошқа ҳеч ким мени бунча кутмаган. Мен учун ҳеч ким Сизчалик ҳижрон азобини ютмаган, мен учун ҳеч ким Сизчалик жонини оловга отмаган.
Сиздан бошқа ҳамманинг кўнглига қарадим, Сиздан бошқа ҳамманинг кунига ярадим.
Мен обод этмаган битта кўнгил қолди, мен тавоф этмаган биргина қадоқ қўл, нурсиз кўз, ҳорғин юз қолди. Энди нима қиламан?!...................................
Мени кечиринг, Онажон!

Шодмон СУЛАЙМОН

Уланиш учун: https://t.me/ijod_bustoni