Султонхон Эшон ўғли Муродхон" жоме масжиди расмий телеграм канали

ЧЎКТИРАЯПСИЗ
Германия иккинчи жаҳон урушида мағлубиятга учраган даврлар эди. Немислар поездга миниш учун саф тортиб навбатни кутишар эди. Шу пайт бир киши келиб сафда турмасдан поезд эшигига яқин турганлар орасига суқулиб кирмоқчи бўлди. Шунда сафда турган бир аёл унга деди:
"Тўғри биз урушда мағлуб бўлдик, аммо ахлоқимизни бой берганимиз йўқ! ".

Исроилнинг собиқ бош вазирларидан бири Моши Даян шундай деган эди:
" Араблар қурол -аслаҳа борасида қанчалик тараққий этишмасин бу мени қўрқитмайди. Аммо уларнинг тартиб билан саф тортиб автобусга минаётганларини кўрсам дағ-дағ титрайман!".

Доимо ўзимиздаги навбатдаги тартибсизликлар, бақир чақирлар, одобсизликларни кўрсам юқоридаги каби воқеалар ёдимга тушаверади.
Ислом фақат намоз ёки рўзада эмас, у бутун бир ҳаёт йўлимизда кўриниши шартдир.
Қаердадир навбатни бузаётганлар билиб қўйинг, мамлакатни мисли кўрилмаган суратда чўкишига сиз сабаб бўлаяпсиз. Ҳатто қиёмат сиз туфайли яқинлашаётган бўлса ҳам ажабланмайман!

https://t.me/Abdulqodir_Polvonov

МЎЪМИН МЎЪМИНАНИ ЁМОН КЎРМАЙДИ!
Набий саллоллоҳу алайҳи ва саллам бир куни саҳобаларга дедилар:
“Мўъмин мўъминани ёмон кўрмайди. Агар ундаги бир хулқ унга ёқмаса бошқаси унга ёқади!”.

Сиз ҳам мукаммал эмассиз, мукаммалликни талаб қилаверманг. Сиз маъсум эмассиз, маъсумликни талаб қилаверманг. Ҳар-биримизнинг кимгадир ёқмайдиган томонимиз бор. Келин ва куёвнинг тўйда киядиган кастюм-шими ва оқ куйлаги эшигимиз остонасигача боради. Ундан кейин эса яхшилик билан, сабр билан, чидам ва айблардан кўз юмиш билан ҳаёт давом этади.
Агар аёлингизнинг баланд овози сизга ёқмаса ундаги меҳрни ёдга олинг. Агар ундаги асабийлик сизга ёқмаса сизнинг обрўйингизни омонатдорлик билан сақлаётганини ёдингизга олинг. Агар у фильмлардаги каби романтик бўлмаса унинг ота-онангиз ва ака-укаларингизни эҳтиром қилишини ёдга олинг. Агар у доимий сизга эътибор бера олмаса унинг оналигини ёдга олинг...
Ҳаёт ўзи шу. Унинг сифати нуқсондан иборат. Унинг сифатларидан яна бири ҳеч кимга вафо қилмаслигидир. Агар аёлингизнинг бир айби учун талоқ қилсангиз сизга жаннатдаги айб ва нуқсонсиз ҳур турмушга чиқармиди?!
Бир аёлни қайсидир айби учун тарк қилсангиз бошқа бир айбли ёлга уйланасиз. Ҳеч ким мукаммал эмас дўстим!

https://t.me/Abdulqodir_Polvonov

АЛЛОҲ АДО ҚИЛАДИ!
Бир куни Набий саллоллоҳу алайҳи ва саллам саҳобаларга дедилар:
“Ким кишилардан мол (қарз) олганида қайтаришни ният қилиб олса Аллоҳ унга ёрдам беради. Ким йўқ қилиш мақсадида олса Аллоҳ унинг молини йўқ қилади!”.

Дунё келиб кетадиган нарса. Бир куни сизники, бир кун эса бошқаники. Дунёнинг исми аслида сифатидан олиб номланган. “Дунё”нинг маъноси “паст” деганидир. Унинг пастлигини шундан ҳам билсангиз бўладики, Набий саллоллоҳу алайҳи ва саллам вафот қилганларида совутлари бир яҳудийникида олган қарзлари эвазига гаровда эди...
Аммо бизнинг бошимиздан қийин кунлар ҳам ўтиб туради. Инсон инсон билан тирик. Кишиларнинг қайғусини кетказиш Аллоҳ суйган амаллардандир. Ким бировдан қарз олса-ю, уни бермасликни ният қилса Аллоҳ унинг хусуматчиси бўлади. Бу қарзни бевосита оладими ёки ҳийла-найранг билан оладими фарқи йўқ.
Бир киши қандайдир бир жамиятга ёки хайрия уюшмасига қўшилди. Пулни олганидан сўнг ўзлаштириб жуфтакни ростлади. Бу энг қабиҳ ўғирликдир. Чунки бунда бир кишининг эмас, бир қанча кишининг молини ўғирлади!



https://t.me/Abdulqodir_Polvonov

АЛЛОҲ СЕНГА РАҲМ ҚИЛСИН!
Набий саллоллоҳу алайҳи ва салламнинг ҳузурларига бир катта ёшли аёл келди. У зотнинг олдиларида бир эркак киши ҳам ўтирган эди. Ўша эркак киши дарҳол ўрнидан туриб ҳалиги аёлга жой берди. Шунда Набий саллоллоҳу алайҳи ва саллам ундан сўрадилар:
-Бу аёл сенинг онангми?
-Йўқ!
-Опангми?
-Йўқ!
-Унга раҳм қилганинг учун Аллоҳ ҳам сенга раҳм қилсин!

Мажлисларда ёши улуғ инсонларга туриб жой беришингиз раҳматдир.
Маҳаллада оғир юк кўтариб кетаётган қариянинг юкини кўтаришга ёрдамлашишингиз раҳматдир.
Кишилар ўтиб олиши учун йўлда машинангизни тўхтатиб туришингиз раҳматдир.
Уйингизда ижарага турадиган кишидан байрам кунлари ижара пулини олмаслигингиз раҳматдир.
Бу дин раҳм-шафқат, хулқ, завқ ва гўзал муомала динидир!
Аллоҳ таоло бандасига унинг ўзгаларга нисбатан кўрсатадиган раҳм-шафқати миқдорида раҳм қилади. Жазо ҳам, мукофот ҳам амалнинг жинсидан бўлади. Аллоҳ таолодан кўра вафолироқ ким бор?!


https://t.me/Abdulqodir_Polvonov

Ё АДОЛАТ УНИ ОЗОД ҚИЛАДИ, ЁКИ ЗУЛМ УНИ ҲАЛОК ҚИЛАДИ!
Бир куни Набий саллоллоҳу алайҳи ва саллам саҳобаларга дедилар:
“Ўн кишига амир бўлган киши қиёмат кунида қўл-оёқлари боғланган ҳолда келтирилади. Уни ё адолати озод қилади ёки зулми ҳалок қилади!”.

Биздан ҳар биримиз ўз майдонида амирдир. Бунинг ўзига хос масъулияти бор...
Эй оталар! Фарзандларингиз ўртасида адолат қилдингизми ёки уларни бир-биридан фарқладингизми?!
Эй кўпхотинлилар! Хотинларингиз ўртасида адолат қилаяпсизми ёки ёш хотин томонга кетаяпсизми?!
Эй мудирлар! Ишчиларингизни тенг кўраяпсизми ёки кимнидир эркалатиб юбораяпсизми?!
Ҳой ички ишлар ходимлари! Қонунни ҳаммага бир хил татбиқ қилаяпсизми ёки бошлиқнинг ўғлини қўйиб юбориб камбағалларнинг боласини қамаяпсизми?!
Ҳой кишиларни мансабга қўядиганлар! Мансаб-вазифаларни муносиб инсонларга бераяпсизми ёки кимнингдир томонидан юборилган танишларгами?!

Ҳаммамиз қиёмат куни мансаб ва масъулиятимиз томонидан кишанланган ҳолда келамиз. Ўшанда бизни фақатгина адолатимиз кишандан озод қила олади, бошқа нарса эмас. Адолат қилайлик!

https://t.me/Abdulqodir_Polvonov

БИЛЛУРЛАРГА ҲУШЁР БЎЛ!
Набий саллоллоҳу алайҳи ва саллам аёллари билан ҳажга чиқдилар. Йўлнинг анча қисмини юргандан сўнг карвонни бошқаришни Анжага исмли ғуломларига топширдилар. Анжаша карвонни тез ҳайдай бошлади. Набий саллоллоҳу алайҳи ва саллам Анжашага:
- Эй Анжаша! Биллурларга ҳушёр бўл!-дедилар.

Ҳаёт сўқмоқларида биллурларга ҳушёр бўлинг. Бир мартагина овози кўтарилса кўтарилибди, сабр қилинг. Жуда ҳам узоқ вақт сизга сабр қилиб юмшоқ гапириб юрган-ку ахир.
Уй ишларида камчиликка йўл қўйса билмасликка олинг. Уй ишлари қийин. Оила ташвишлари эзиб юборади. Энг буюк муҳаббат қийинчилик пайтидагисидир.
Сиз истаган куйлакни дазмолламаган бўлса осмон узилиб ерга тушмабди. Агар нонуштани вақтида тайёрламаган бўлса қиёмат қоим бўлмабди. Ҳатто сизга ёқмайдиган иш қилса ҳам бақириш билан эмас, битта ўзгача қараш билан ҳал қилинг!
Фарзандларингиз олдида хотинингизни танқид қилманг. Сизга айтмаса ҳам бу унинг қалбини жароҳатлайди!




https://t.me/Abdulqodir_Polvonov

ШИКОЯТ ҚИЛАЯПТИ!
Набий саллоллоҳу алайҳи ва саллам ансорлардан бирининг боғига кирдилар. У ерда бир туяни кўрдилар. Туя Расулуллоҳ саллоллоҳу алайҳи ва салламни кўриши билан инграб кўзларидан ёш тўкди. Расулуллоҳ саллоллоҳу алайҳи ва саллам унга яқинлашиб бошини силадилар. У жим бўлди. Сўнгра сўрадилар:
-Бу кимнинг туяси?
Ансорлардан бир йигит келди ва “Меники, эй Аллоҳнинг Расули!”, деди. Расулуллоҳ саллоллоҳу алайҳи ва саллам унга қараб:
-Аллоҳдан қўрқмайсанми бу жонивор тўғрисида?! Аллоҳ уни сенга мулк қилиб берган. У менга сендан шикоят қилаяпти. Сен уни қаттиқ ишлатар экансан, оч қолдирар экансан, қийнар экансан!

Бугун башарият бизга инсон ҳуқуқлари ҳақида ўқиётган маърузаларини биз бундан минг тўрт юз йил олдин ҳатто ҳайвонларга татбиқ қилганмиз.
Азизлар! Динимиз ниҳоятда буюк дин. Аммо биз уни татбиқ қилмайяпмиз. Динимиз раҳм-шафқатга чақиради, аммо бизнинг қалбимиз қотиб бораяпти!
Динимиз оддий бир туяга шунча эътибор бераяпти, биз бўлсак инсондек буюк мавжудотга эътибор бермаймиз. Бир аёл бир мушук туфайли дўзахга кирган. Биз бўлсак инсонларни зое қилмоқдамиз. Бизлар четдан келтирилган қадриятларга муҳтож эмасмиз, консерваланган фикрларга зор эмасмиз. Бизга фақат ҳақиқий мусулмон бўлиш етишмаяпти холос!

https://t.me/Abdulqodir_Polvonov