Qo‘qonda shar’iy nikohidagi turmush o‘rtog‘ini o‘ldirgan sobiq ichki ishlar xodimi 20 yilga qamaldi
Qo‘qon shahrida odamlarning hayoti va sog‘lig‘i uchun xavfli bo‘lgan zo‘rlik ishlatish bilan qo‘rqitib, o‘zgalarning mulkini bosqinchilik va o‘g‘irlik yo‘li bilan talon-toroj qilgan jinoiy guruh qo‘lga olinib, ularga nisbatan sud hukmi chiqarilgani haqida xabar berilgan edi.
O‘zAning yozishicha, sobiq ichki ishlar xodimi bosh bo‘lgan mazkur jinoiy guruh qotillik jinoyatini ham sodir etgan bo‘lib, Jinoyat ishlari bo‘yicha Farg‘ona viloyati sudi tomonidan ularga hukm o‘qildi.
Har bir ota ona farzandining baxtini, rohatini ko‘rishni istaydi. Ichki ishlar idorasi xodimi bo‘lib ishlayotgan Madamin Olimov (ismi familiyasi o‘zgartirilgan)ning onasini niyatu orzulari bir olam edi. Odamlarning tinchligiyu xavfsizligi uchun javobgar bo‘lgan profilaktika inspektorining o‘zi esa “oila” degan muqaddas dargohni oddiy havaslarga almashdi.
Sud hukmiga ko‘ra, Madamin Olimov Qo‘qon shahar IIB HOOB profilaktika noziri lavozimida ishlab kelgan davrda Sh. Nazarova bilan tanishib, sha’riy nikoh asosida uning xonadonida yashab kelib, qiz farzandli bo‘lib, oila qurishga ahdlashadi.
Biroq Madaminning onasi unga uylanishiga rozilik bermaganligi uchun 2014-yil yanvar oyida onasining tavsiyasiga ko‘ra K.G bilan qonuniy nikohdan o‘tib, unga uylanadi. Buni Madamin Olimov Sh.Nazarovadan yashirishga harakat qilgan bo‘lishiga qaramasdan u bundan xabar topib, K.Gning ish joyiga borib u bilan o‘zaro janjallashgan va M. Olimov qonuniy turmush o‘rtog‘i K. G bilan yashashni davom ettirsa, uning jinoiy sheriklari bilan amalga oshirgan qonunga xilof ishlari va axloqqa zid qilmishlari haqida ma’lumotlarni huquqni muhofaza qiluvchi organ rahbarlariga topshirishni bildirgan. Shu bilan topshirmaslik evaziga 4 ming AQSh dollari berishni talab qilib, uni qo‘rqitib kelgan.
Shundan so‘ng, Madamin Olimov, ukasi J.Olimov va sherigi A.Bakimatovlar bilan bir guruh bo‘lib, muqaddam sodir etgan jinoyatlarining fosh etilishini oldini olish uchun Sh.Nazarovani qasddan o‘ldirish harakatiga tushadi. Ular 2014-yil 25-aprel kuni soat 00:18 larda Sh.Nazarovaning yashash xonadoni oldiga kelib, uni mashinaga o‘tqizadi. Ayol qabih niyatli bu kishilarning qo‘lida o‘lim topdi.
Shundan so‘ng, oldindan kelishuvga ko‘ra, mazkur qotillik jinoyatini yashirish maqsadida uning murdasini qabristonga olib kelishib, ko‘mib yuborishgan.
Oradan yillar o‘tib, ularning boshqa jinoyatlari yuzasidan olib borilayotgan tezkor tadbirlar davomida ushbu qotillik jinoyati ham fosh etildi.
Jinoyat ishlari Farg‘ona viloyati sudining hukmi bilan M. Olimovga avvalgi jazoni yangi jazoga qisman qo‘shilib, uzil-kesil o‘tash uchun 20 yil, J. Olimov va A. Bakimatovlarga esa 19 yil ozodlikdan mahrum qilish jazosi tayinlandi.
“Mutasaddi tashkilot va o‘zini o‘zi boshqarish organlari tomonidan oila jamiyatning negizi ekani, oila qurish va o‘zaro kelishuv asosida qurilgan oilalarning mustahkamligini saqlab qolish, oilaning muqaddas ekani borasidagi tushuntirish va targ‘ibot ishlari yetarli darajada amalga oshirilmaganligi, oilalardagi aniqlangan muammo va kamchiliklarga befarq qaralishi va ularni bartaraf qilish choralari ko‘rilmagani oqibatida mazkur qotillik jinoyati sodir etilgan. Avvalo, ota-onalar yangi oila qurayotgan farzandlarning kelajagi va yosh oilalarning baxti bardavom bo‘lishi yo‘lida befarq bo‘lmasliklari kerak. Sud mazkur jinoyatni sabablarini tahlil qilib, tegishli organ va o‘zini o‘zi boshqarish organlariga mazkur toifadagi jinoyatlarni sodir etilishini oldini olish xususida xususiy ajrimlar chiqardi”, – deydi Jinoyat ishlari bo‘yicha viloyat sudining sudyasi Rahmatjon Arapov.
