Ўлмасбек Самарқандий🇺🇿

​​​​​​ЭРИНГИЗНИНГ ИСМИ

    (Аёлларга бағишланган)

Эрингизнинг исми ўтдир, аёллар,
Айтилса, тилингиз куйдиргувчи ўт!
Не сир бор бунда деб, қилманг хаёллар,
Сеҳри - бир умрлик суйдургувчи ўт!

Доғ солманг дилига, гарчи сал дағал,
Эркакни эъзозлаб, эрк деб атангиз!
Маҳрамингиз шулдир, бойми, камбағал,
Бир пули бўлса ҳам, бек деб атангиз!

Ойсиз, ўзингизни танҳо ўйламай,
Қуёшим кўкдан нур сочади, денг-чи!
Кимдир эшик қоқса, бориб бўйламай,
Султоним келсалар очади, денг-чи!

Тупроқ иси келган қадоқ кафтини,
Бир ажиб таралган муанбар билинг.
Сиз унга фаришта бўлмоқчимисиз,
Унда эрингизни пайғамбар билинг!

Шоҳлардан каммиди ўткир нигоҳи,
Шонингиз кетмайди, шоҳим деб, қўйинг!
Ҳеч қурса, кўнглини кўтариб гоҳи,
Кўнглимни суйгувчи оҳим, деб қўйинг!

Баъзан, суханингиз қалбимни бузар,
Аччиқ тилингиздан уялмайсизми?!
“Ҳей» эмас, ҳаётим десангиз гўзал,
«Ай» эмас, азизим деёлмайсизми!?

Наҳот, ширин сўзнинг ғамин есангиз,
Қайда қолди макру - айёрлигингиз?
Қўрғоним десангиз, тоғим десангиз,
Камайиб қолмайди, аёллигингиз!

У сизни “Онаси”деб чорлаган чоғ,
Онасин ҳаққига шон икки очун.
Сиз унга “Отаси” деб, очинг қучоқ,
Минг раҳмат келтиринг отангиз учун!

То тирик эканмиз, ишқ деб ёнамиз,
Севмоқ, севилмоқлик – кўнгилга малҳам.
Ибрат бўлсин сизга Оиша онамиз,
Ҳожам деб суйганлар Пайғамбарни ҳам!

Эрингизнинг исми ўтдир, аёллар,
Айтилса, тилингиз куйдиргувчи ўт...

Ўлмасбек Самарқандий.

@Samarqandiy77

​​ФЕВРАЛ

​​Яхшилар умрига ўхшайди феврал,
Нозик куртакларни уйғотар бир-бир,
Оғир кун, ёнингда тургувчи дўстдай,
Баҳор яқин дея, бергайдир сабр.

Яхшилар умрига ўхшайди феврал,
Неча минг йилдирки умри қисқа ой.
Кўкламга етсин деб, тезроқ одамлар,
Икки кун умридан кечган, ҳойнахой...

Ассалому алайкум!
Бизни баҳорга етакловчи - февралнинг 1 чи тонгги муборак бўлсин!

© Ўлмасбек Самарқандий.

@Samarqandiy77

​​КЎРИШМАЙМИЗМИ ❤️‍🔥

Бепарвосан, оғринганимга,
...Ва ашк бўлиб ёғилганимга,
Худо гувоҳ, соғинганимга,
Кўришмаймизми?

Етолмайман, аслингга қадар,
Дод етишмоқ фаслингга қадар,
Узун йўл бор васлингга қадар,
Кўришмаймизми?

Ҳажрингда зор, сўлиб кетсамчи,
Умр - дарё, тўлиб кетсамчи,
Бир бор кўрмай, ўлиб кетсамчи,
Кўришмаймизми?

Бошни жаҳлу жудодан олиб,
Шижоатни фидодан олиб,
Ижозатни Худодан олиб,
Кўришмаймизми?

Ўртамизда ажиб бир мунг бор,
Ғамдан қора кийинган тун бор,
Бугун бормиз, эртага ким бор...
Кўришмаймизми?

Ишқ тўлдирсин битта камингни,
Висол ўраб олсин, ғамингни,
Билмайманми, соғинганингни,
Кўришмаймизми?

Сингиб, туннинг чоғига бугун,
Термулиб, ой доғига бугун,
Борсам, бахтнинг боғига бугун,
Кўришмаймизми?

Вужудимдан ўтди алам, жон,
Юрагим - ишқ, токи танам жон,
Нега жимсан, гапир санамжон,
Кўришмаймизми?

Худо гувоҳ, соғинганимга...

Ўлмасбек Самарқандий
@Samarqandiy77

Энди менинг навбатим Она!

Гўзал эди, хаёллар суриш,
Бағрингизда дунёни кўриш,
Қўлларимда кўтариб юриш,
Энди менинг навбатим, Она!

Азоб экан, "болам" деб куймоқ,
"Жон" деб, жонни ўтларга қўймоқ,
Қучоғимда эркалаб, суймоқ,
Энди менинг навбатим, Она!

Оҳ, тунларни тунларга улаб,
Менга Ҳақдан дуолар тилаб,
Меҳр бермоқ бошингиз силаб,
Энди менинг навбатим, Она!

Қалам етмас, қарзим тузишга,
Жоним етмас, жонфидо ишга,
Мингдан битта қарзим узишга,
Энди менинг навбатим, Она!

Қўлларимда тутиб жаҳонни,
Узоқ этсин, шул ширин онни,
Қўйвормайман, ушоқдай жонни,
Энди менинг навбатим, Она!

Қўлларимда кутариб юриш,
Энди менинг навбатим, Она!

Ўлмасбек Самарқандий.
@Samarqandiy77

Оқ ранг шодлик рамзи, қалб эҳтироси,
Келинлар кўйлаги – оқ мўйна пўстин.
Фақат қувонч эмас бу ранг жилоси,
Кафаннинг ранги ҳам оқ бўлар дўстим.

Қора - зулмат ранги, зимистон туйғу,
Бу ранг юракларни айлагай пора.
Фақат алам эмас, ё фақат қўрқув,
Унутманг, Каъбанинг ранги ҳам қора!

Ўлмасбек Самарқндий.

@Samarqandiy77

#Tabrik

Катта - катта шоирлар, дерлар Каттақўрғонда,
Катта юракларга тенг шеърлар Каттақўрғонда.
Туйғуларга ватандир Каттаминг-у, Жизмонсой,
Ҳар тупроғи бир мисра ерлар Каттақўрғонда.

Байтларида оташ бор, ёнар тафтидан бу жон,
Бойлигидир борлиғи, бисотида сўз маржон,
Икки қадрдон укам Отабекжон, Элшоджон,
Мард, танти ва очиқдил эрлар Каттақўрғонда!

Бугун каттақўрғонлик икки ижодкор укам Отабек Мирзақобилов ва Элшоджонни таваллуд айёмлари.
Табриклайман ! Яқинларингиз, оилангиз ва бизнинг бахтимизга ҳамиша омон бўлинглар!

Ҳурмат билан: Ўлмасбек Самарқандий.

@Samarqandiy77

Парилар

Ғаниматдир ҳар лаҳза, ҳар он,
Бор куч билан шўнғийман ишга.
Куни билан бўлмайди имкон,
Париларга вақт ажратишга.

Улар ранжиб буришар юзни,
- Кўнглимизни ҳушламайсиз, дер.
Кундузлари унутиб бизни,
Бир бор қалам ушламайсиз, дер.

Дейман: - шошманг дилни доғлашга,
Иш вақтида қилолмам узлат.
Сизлар билан кўнгил чоғлашга,
Бошлиғимиз бермайди рухсат!

Мана ёнди кўкда юлдузим,
Яна гўзал бир тунга етдим.
Хайрли тун тилаб, мен ўзим,
Париларнинг олдига кетдим!

Хайрли тун азизим!

Мен париларимни ёнига кетдим. Смс ёзиб, қўнғироқ қилиб безовта қилманг! 🙂

Ўлмасбек Самарқандий.

@Samarqandiy77