Қишми бу, баҳорми бу?

- Бугун баҳор - дея, энтикиб сармаст,
Хаёлан қўлда гул тутганлар борми?
Бойчечак, ялпиз-у, майсалар эмас,
Баҳорни қор билан кутганлар борми?

Февралда соғинчдан азоблар ютиб,
Тўқсон кунлик фасл жонидан ўтиб,
Ва бугун ўзгача мўъжиза кутиб,
Баҳорни қор билан кутганлар борми?

Оҳ Она табиат, ўзгарди буткул,
Бир майса кўринмас, бойчечак тугул,
Бугун севганига ваъда қилиб гул,
Баҳорни қор билан кутганлар борми?

Аслида бу ҳам бир Худодан ҳадя,
Тақдирга ёзилган қизиқ бадия,
Кўкламга янги шеър ёзаман, дея,
Баҳорни қор билан кутганлар борми? ❄️

©Ўлмасбек Самарқандий.

@Samarqandiy77