O'zLiDeP - Toshkent shahar

Дарҳақиқат, энг аввало, тадбиркорлик фаолияти ҳар қандай жамиятнинг тараққиётини таъминловчи локомотиви эканини таъкидлаш зарур. Иқтисодиётни ҳаракатга келтирувчи ва ривожлантирувчи куч ва драйвери бу тадбиркорлардир. Мамлакатимиз тараққиётида тадбиркорларни ўрни катта. Тадбиркорлик иқтисодиётимизнинг ривожланиши учун улкан туртки эканлигини ҳисобга олсак бу борада замонавий корхоналарни очилиши, тадбиркорликни ривожлантиришга кенг йўл очиб берилиши, халқ фаровонлиги, ватан равнақини таъминланишига катта хисса қўшилади. Бу эса ижтимоий соҳани, яъни соғлиқни сақлаш, аҳоли саломатлигини мустаҳкамлашга қаратилган ишларни, таълим-тарбия, илм-фан соҳасини тубдан яхшиланишига хизмат қилади. Учрашувда белгиланган вазифалар ЎзЛиДеП Тошкент шаҳар Кенгаши ва унинг барча депутатларига ниҳоятда улкан масъулият юклайди. Шунинг учун ҳам мавжуд имкониятлардан фойдаланиб, сиз азизларни фаолликка чақириб қоламан.


Равшан Фазилов,
Олий Мажлис Қонунчилик палатаси депутати,
ЎзЛиДеП Тошкент шаҳар Кенгаши раиси

Тадбиркорлар иқтисодиётимизни ўсишига ва юртимизни фаровон бўлишига таянч бўлади


Жорий йилнинг 19 март куни Ўзбекистон Республикаси Президенти Шавкат Мирзиёев кичик ва ўрта бизнес вакиллари билан учрашди.
Учрашувда таъкидланганидек, яратилган шароитлар ҳисобига кичик ва ўрта тадбиркорлар сони беш йилда 2 карра кўпайди. Уларда 10,5 миллион одам даромад топиб, рўзғор тебратмоқда. Иқтисодиётнинг ярмидан кўпи, саноат ва экспортнинг учдан бири шу соҳа вакиллари ҳиссасига тўғри келаяпти. Президентимиз 2025 йил учун соҳадаги асосий мақсад ва вазифаларга тўхталди. Булар:
– кичик ва ўрта бизнеснинг иқтисодиётдаги улушини 55 фоизга кўтариб, 70 миллиард долларлик қўшилган қиймат яратиш;
- янги бозорларга кириб боришда транспорт, сертификат ва стандарт масалаларига кўмаклашиб, кичик бизнес экспортини ўтган йилги 9 миллиарддан 12 миллиард долларга олиб чиқиш;
- ичимлик суви, канализация, йўл, қурилиш, коммунал хўжалик, етказиб бериш, утилизация, миграция, маданият ва ижтимоий хизматларда кичик бизнес улушини 2-3 карра ошириш;
- 1,5 миллион доимий иш ўрни ташкил қилиб, соҳада банд аҳоли улушини 75 фоизга етказиш;
- 100 нафардан кўп ишчиси бор корхоналарни 4 мингтага олиб чиқиш;
- кичик бизнесда янги 100 та бренд маҳсулот чиқаришни йўлга қўйиш;
- кичик бизнес иштирокида 200 та стартап лойиҳаларни молиялаштириш.
Президент соҳа учун янги ташаббусларни илгари сурди. Жумладан, кичик ва ўрта бизнесни ривожлантириш бўйича хорижий экспертлар билан катта дастур ишлаб чиқилди. Бунга 2025 йилда барча манбалар ҳисобидан 10 миллиард доллар ажратилади. “Бу йил кичик ва ўрта бизнесга 120 триллион сўм ресурс берилади. Бунча катта маблағ илгари ҳеч қачон бўлмаган", - деди давлатимиз раҳбари. Хусусан, аҳолини тадбиркорликка жалб қилиш учун 22 триллион сўмлик имтиёзли ресурс ажратилади. Шундан 2,5 триллион сўм ёшларга, яна шунчаси аёллар тадбиркорлиги лойиҳалари учун йўналтирилади. Аёл тадбиркорларга кредит ставкаси бошқаларга нисбатан 2 фоиз арзон бўлади. Бу йилдан кичик бизнесга 300 миллион сўмгача кредит бериш бошланди. Эндиликда бир йилда йириклашиб, кичик ёки ўрта корхонага айланган тадбиркорларга шуни 150 миллион сўми гаровсиз берилади. Худди шундай, оилавий тадбиркорлик бўйича ҳам 50 миллион сўмгача гаровсиз кредит берилади. Мутасаддиларга олдинги кредитидан кечиккан қарзи бўлмаган тадбиркорларга янги имтиёзли кредит олиш имконини яратиш топширилди.
Юқори технологияли маҳсулот яратадиган тадбиркорларга 10 минг квадрат метргача бўлган давлат объектлари 5 йилга бепул ижарага берилиши белгиланди. Шу билан бирга, бу борада янги тизим жорий қилинади: 15 та туман ва шаҳарда барча давлат идоралари туманлар марказидаги битта кўп қаватли бинога кўчирилади. Янги биноларнинг 1-2-қаватлари тадбиркорларга сотилади. Ушбу туманларда давлат идораларидан бўшайдиган 150 та бино аукционда тадбиркорларга таклиф қилинади. Бу йил кичик ва ўрта бизнес лойиҳалари инфратузилмасига ажратилиши белгиланган 1 триллион сўмга қўшимча 500 миллиард сўм ажратилади. Бундан буён, тадбиркорликка энди қадам қўйганлар учун “биринчи имконият” тамойили жорий этилади. Яъни, илк бор маъмурий ҳуқуқбузарлик қилган тадбиркор жавобгарликдан озод қилиниб, камчиликни бартараф этиш учун имконият берилади. Бир сўз билан айтганда, янги иш бошлаган тадбиркорлар биринчи хато учун “жавобгарликдан суғурталанган” бўлади. Охирги уч йиллик айланмаси 10 миллиард сўмдан ошмаган, солиқдан қарзи бўлмаган корхонани ихтиёрий тугатишда текширув ўтказилмайди. 2028 йил 1 январга қадар ҚҚС ва фойда солиғи ставкаси оширилмаслиги белгилаб қўйилган. Эндиликда кичик ва ўрта бизнесга қўшимча талаб ва мажбурият юклайдиган норматив ҳужжатлар қабул қилишга ҳам уч йиллик мораторий эълон қилинади.

Қадриятларинг боқий бўлсин, Наврўз!

Наврўзи олам кириб келиши муносабати билан ЎзЛиДеП Тошкент шаҳар Кенгаши Ёшлар муаммоларини ўрганиш ва тадбиркорларни қўллаб-қувватлаш бўлими ва ЎзЛиДеП Чилонзор туман Кенгаши ҳамда Сингапур Менежментни ривожлантириш институти билан ҳамкорликда “Қадриятларинг боқий бўлсин, Наврўз!” деган бош ғоя асосида маьнавий-маьрифий тадбир ташкил этилди. Тадбирда ёшларнинг сахна кўринишлари, турли хил чиқишлари ҳамда кўргазмалар ташкил қилинди. Қадимий миллий байрам Наврўз 21 март куни нишонланади. Ушбу кун кеча билан кундузнинг тенглашган пайтидир. Ушбу байрамнинг кириб келиши билан маҳалла-кўй дошқозонлар атрофида жамулжам бўлиб, аёлларимиз, момоларимиз тунни тун демасдан, эзгу ният, завқ ва хурсандчилик билан инсонга куч-қувват берадиган сумалак ва ҳалим, кўксомса ва гўжа каби тансиқ неъматларни тайёрлаб барчага тортиқ қилишади.
Шунингдек, тадбирда 30 га яқин ёшлар партия сафига кириш истагини бирдиришди. Уларга партия гувоҳномалари ва совғалар топширилди. Тадбирда куй-қўшиқлар янграб барчага байрамона шукуҳ бахш этди.