🌊 OKEAN 🌊 Guloro Yusupova blogi

Ketib qolgim kelyapti... ruhimni olib qayergadir ketib qolgim. Hozir unga ergashmasam u meni tashlab ketib qoladigandek go'yo... u mendan qochayotgandek... ushlab qololmayapman, demak, ergashish kerak!

Shu qadar yengilmanki, ruhim shu qadar yengil — uchishga tayyor. Shu qadar og'irmanki, tanam shu qadar og'ir — ruhim hech qachon siljitolmaydigandek. Miyamdagi og'riqlar biri qo‘yib biriga navbat bergisi yo'q. Tanamku qutular... ruhim qutularmikan bu og'riqlardan?

Kirib "Ma'rifat" gazetasiga ovoz berib yuborsangiz odamchalar 🥹

ONAMGA

Oq sochlari oppoq tun uning,
Umri halol ishqqa bayroqdir.
Oh, yuzlari dunyoyi dunning
Go’zalidan chiroyliroqdir.

(Bo’lolmadim hassasichalik),
Otam dardin ko’targan mohim.
Ushoqqina onam ko’ngliga
Bir hovuch nur bergil, ilohim!

O’zi potrab chiqqan chashmaday
Yoningizdan oqdimu ketdim.
O’zgalarga daryo tutdimu,
Oh, onam-a, Sizni unutdim.

Qaldirg’ochlar mendan yaxshiroq,
Baxt to’kadi hur quchog’iga.
Men ham uning tirnog’imanu,
Arzimayman, lek tirnog’iga.

Ismaloqlar bo’yini tarab,
Bahor shoshsa yurgan joyiga,
Rabbim, meni gul qilib yarat,
Hech bo’lmasa, uning poyiga!..

Zebo Mirzo

Tug'ilgan kuningiz bilan, onajonim! Dunyodagi barcha yaxshi onalar sizga o'xshaydi, men uchun esa eng yaxshisi sizsiz!

Bunaqasini faqat vaynlarda ko'rganman. Dadasi ko'tarib ketayotgan 1 yarim 2 yoshlar chamasi bolacha uzoqdan yo'ldan o'tayotganimni ko'rib oyim deb yig'lashni boshladi. Kiyimimni o'xshatdi shekilli, deb indamay ketaverdim. Ularga yaqinlashganim sari bola oyim, oyim deb battar yig'lashni boshladi. O'tib ketganimdan keyin esa avjiga chiqdi. Orqaga kulib qarasam, dadasi ham u oyingmas deb ichiga sig'may kulib yotibdi. Bola esa yoo'q oyim deb yig'lashdan to'xtamaydi. Oyisiga shunchalik o'xsharkanmanmi, deb o'ylab qoldim. Bolakay esa orqamdan metrogacha yig'lab kirdi oyi deb. Metroda boshqa-boshqa vagonlarga chiqqanimizdan keyingina uni eshitmay qoldim. Hayot rostdan ham g'alati tasodiflarga boy ekan.

Menga sizlarning ham fikringiz qiziq. So'rovnomaga o'tib to'ldirib qo'ysangiz xursand bo'lardim 🥹

Bundan 1 yil oldingina onam shunday mashaqqatlardan qutuldi. Unga qadar 4 yil men ham shaharda xuddi shu o'ylar bilan yashaganman...

Allohim har bir onani eng azizlari qatorida himoyalasin, asrasin. Biz farzandlar ko'pincha bunga ojizlik qilyapmiz...

QISH VA ONAM

Yana qish, yana qor yogʻar boʻralab,
Yana xayolimni tumanlar bosdi.
Daraxtning tushiga kirdi gʻoʻralar,
Sen unga hovurli kirlarni osding.
Qoʻling yaxlamadi... axir u poʻlat,
Hatto muzni yorib baliqlar tutgan.
Oʻchoqda pishirib eng shirin ovqat,
Toʻrttala bolaning ogʻziga tutgan.

Bugun choʻntagimda qoʻllarim issiq,
Negadir sovqotib ketyapman, qiziq!

Yana qish, yana qor yogʻar boʻralab,
Jimmm oʻtin yoqasan koʻzing yoshlangan.
Rostan yigʻlagansan balki, oʻsha payt
Beozor qalbingda isyon boshlangan...
Shudgorlab tashlangan orzularingga
Sochilgan "xaloskor" pechkaning kuli.
Garchi hayot tutdek toʻkkan esa-da,
Biz uchun chiroyli gul eding, gulim!

Illo, Tangrim, bevaqt ketmagin uzib,
Negadir hayqirgim kelyapti, qiziq!

Yana qish, yana qor yogʻar boʻralab,
Qahratonning senga oʻtmaydi tishi.
Chaqirim naridan paqir-paqirlab
Suv tashib kelasan oyogʻing ishib.
Soʻng sandal qoshida tiz choʻkasan ha,
Eriydi tizzangga yigʻilgan tuzlar.
Nahotki qanoat, sabr, bardosh-da
Shu qattiq joningga qilgandir uzlat!

Adolatdanmi ayt, senga bu yoziq?!
Javobini bilgim kelyapti, qiziq.

Yana qish quturib boradi boʻron,
Sovuqdan tarnovning qotgan tillari.
Yana sen koʻchada yolgʻiz, onajon!
Kuragani chiqding qorli yoʻllarni.
Shilta loyga botgan qora kalishing,
Nahordan shom qadar ostonaga zor.
Mayizdek yuzingni nogoh tanishib
Qaydadir chinqirab yigʻlaydi bahor.

Sensiz isssiiiq uyda nafasim qisib,
Mening ham yigʻlagim kelyapti, qiziq!!!

Goʻzal OXUNOVA

U kun bizga la'nat aytadi,
Ertak tinglab oʻsgan bolalar...

Yoshligimda onam judayam ko'p ertak aytib berardilar. Hatto katta-katta asarlarni ham ertakdek qilib aytib berganlari esimda. Eslasam ba'zan yo qayta o'sha lahzada, yo o'sha ertakda yashagim kelib qoladi...

Ertak aytmang bolalarga, siz,
Shoirlardan uzoqroq oling.
-mana bu yoʻl, deng,
mana bu qorin:
shu gʻam deya tolsin oyogʻing.

Ertak aytmang bolalarga, oh,
Kimligini bilib qolmasmi:
Farogʻiydek yigʻlabon, e voh,
Gulxaniydek kulib qolmasmi?..

Ertak aytmang, kitobni yoping,
Boqmasin dil tilkalariga.
Axir u bolaku, Vatanning gʻami
Ogʻirlik qiladi yelkalariga.

Hali bir kun oʻzni taniydi,
Vatanni taniydi, taniydi alar--
U kun bizga la'nat aytadi,
Ertak tinglab oʻsgan bolalar.

© Najmiddin Ermatov

@okean_Guloro

Ota uyda qushday ruhi yengillarim
Xudo bersin baxtingizni, singillarim...