Sohiba Mullayeva blogi

#yakshanba_mutolaasi

DADAMGA AYTIB QO‘YMANG...

Ular juda baxtli oila edi. Ota, ona va uch yoshli shiringina qizaloqdan iborat bu oila juda baxtli hayot kechirar edi. Lekin taqdir hukmi bu baxtni ularga ko‘p ko‘rdi – uzoq davom etgan kasallik sababli ona uch yoshli qizi hamda sevimli yorini tashlab bu dunyoni tark etdi.

Turmush o‘rtog‘ining o‘limidan chuqur qayg‘uga botgan ota qizalog‘iga onasining o‘limini qanday tushuntirishni bilmasdi. Buni ustiga go‘dak har kuni otasidan "oyim qayerga ketdilar, qachon keladilar", deb so‘rayverardi.

– Oying ishga ketdi, qizim. Ishxonasidan uzoq muddatli safarga chaqirishgan, Xudo xohlasa tez orada kirib keladi, - deya qizini ovutib qo‘yardi. Qizaloq bu savolni tez-tez berar va deyarli bir xil javob eshitardi.

Shunday qilib qizi olti yoshga chiqqan yili ota bir mehribon, oqko‘ngil ayol bilan tanishadi va ular turmush qurishga ahd qilishadi. Bir kuni otasi qizini yoniga chaqirib, asta gap boshlaydi:
– Qizim, oying qaytib keladigan bo‘ldi. Sen uning qiyofasini unutib qo‘yganing yo‘qmi?
Qizaloq biroz o‘ylanib turib, "yo‘q" ma’nosida bosh qimirlatadi. Huddi shu lahzada eshik ochilib, ostonada haligi ayol paydo bo‘ladi. Quchog‘ini keng ochib, qizning ismini aytib chaqiradi:
– Qizalog‘im, men seni oyingman, taniyapsanmi?

Qizaloq otasiga hayron bo‘lib tikiladi.
- Qizim, oyingni tanimayapsanmi? Axir u sening onang! Aytgandim-ku, ishga ketgan, bir kun qaytib keladi, deb. Ana qaytib keldi. Endi tez borib, "oyi" deb quchoqlab qo‘ygin-chi, bo‘laqol tez! - deb ota qizini ko‘zlariga tikildi.
Qizi indamay ayolning quchog‘iga borib, "oyi" deb qo‘ydi. Ko‘ngli to‘lgan ota qizini yoniga borib, peshonasidan asta o‘pdi va "Hozir kelaman, sen oying bilan gaplashib o‘tir qizim", deya tashqariga yo‘l oldi.

Otasi chiqib ketgach qiz birdan yig‘lab yubordi va ko‘zda yosh bilan:
- Siz mening oyim emassiz! - dedi to‘satdan. - Mening oyim o‘lgan!
Dong qolgan ayol hayratdan ne deyarini bilmay turardi.
- Buni men bobom va buvimlarnikiga borganimda ularning suhbatlaridan bilib qolganman. Buni faqat men, bobom va buvim bilamiz xolos. Dadam bundan bexabar. U haligacha oyimni ishga ketgan deb o‘ylaydi. Bu gapni dadam bilmasin, u bilsa so‘zsiz azoblanib yig‘laydi.

Sizni doim oyi deb chaqiraman. Faqat bu gaplarni dadamga aytib qo‘ymang. Dadam bilsa, chidolmay yig‘laydi. -deya qizaloq yig‘lab yuborishdan o‘zini zo‘rg‘a tutib turgan "yangi oyisi"ga yolvorardi.
Bu payt esa eshik ortida turgan otaning ko‘z yoshlari ko‘l bo‘lgan edi.

(Muallifi noma’lum)

@Ayolning_41_olami

#yakshanba_mutolaasi

Erta bahor. Dam olish kuni edi. Hovliga tushdim. Havoning avzoyi buzuq. Yuvinib chiqib qarasam, tunuka tom peshidagi tarnov bir tomonga qiyshayib yotibdi. Qishda yoqqan qor zalvoridan qiyshayib qolgan, shekilli… Qattiqroq shamol boshlansa, tushib ketadigan…

Yo‘lakda yotgan narvonni ko‘tarib kelib tomga tiraguncha tinkam quridi, nam tortib, zildek bo‘p ketibdi. Narvon zinasiga oyoq qo‘yishim bilan ayvondan onam tushib keldi.
– Nima qilmoqchisan? – dedi ko‘zimga termilib.
– Hozir, – dedim beparvo qo‘l siltab. – Tarnov qiyshayib qopti.
– Shoshma, bolam, oldin choyingni ichib ol…
– Hozir tushaman. Shunday dedimu narvonga tirmashdim. Tomga chiqishim bilan pastdan onamning xavotirli xitobi eshitildi:
– Ehtiyot bo‘l, tom labiga borma!
– Uyga kirsangiz-chi! – dedim og‘rinib. Tunuka tomni taraq-turuq bosib, qiyshaygan tarnov oldiga keldim. Uvvalo urinaman, tarnov la’nati o‘nglansa, qani! Zanglab ketganmi, bo‘yog‘i yopishib qolganmi

… Aksiga olib, yomg‘ir shivalay boshladi. Oldin tomchilab turdi-da, keyin shiddat bilan yog‘ib ketdi. Tom labida o‘tirgancha, tarnovni qo‘shqo‘llab surishga urindim. Qilt etmaydi! Pastdan yana onamning ovozi keldi:
– Menga qara, bolam.
Narvon oldiga qaytib keldim.
– Nima deysiz?
– Jon bolam, mana buni kiyib olgin…
Qarasam, onam bir qo‘li bilan narvonni changallagancha, ikkinchi qo‘lida to‘n ushlab turibdi. Yupqa ro‘moli, nimchasi ho‘l bo‘lib ketgan… Xunobim oshdi.
– Hozir tushaman, dedim-ku! Men yosh bolamanmi?
– Shamollab qolasan!
– Obbo! Siz uyga kiravering! Hozir tushaman. Shunday deb, tag‘in tarnov oldiga qaytdim. Jahl bilan tarnovni mushtlay boshladim. Bir mahal pastdan yana ovoz keldi:

– Ada! Adajon!
– Ha! – dedim battar xunob bo‘lib.
– Varragim yirtildi! Qarasam, yetti yashar o‘g‘lim hovli o‘rtasida turibdi. Oyog‘i ostida yirtilib, qamishlari qovurg‘adek turtib chiqqan varrak loyga qorishib yotibdi. O‘zi ko‘ylakchan. Boshyalang. Yomg‘ir ostida diydirab turibdi.
– Uyga kir, Farrux! – dedim baqirib. – Uyga kir, shamollab qolasan! Quloq solsa, qani! Goh varragiga, goh menga qaraydi. Kapalagim uchib ketdi! Tomda sirg‘alib-sirg‘alib, narvon tomon yugurdim. Uch-to‘rt pillapoya tushib qarasam, onam hamon narvon oyog‘ini changallab turibdi. Ro‘moli jiqqa ho‘l bo‘lib, sochlariga yopishib qolgan… Bir qo‘li narvon oyog‘ida. Bir qo‘lida to‘n…

O‘tkir Hoshimov - "Daftar hoshiyasidagi bitiklar"

@Ayolning_41_olami

#yakshanba_mutolaasi

UCH ELAK HAQIDA RIVOYAT

Bir kishi donishmanddan so‘radi:
-Do‘stingiz siz haqingizda nima deganini aytaymi?
-Shoshma, -dedi donishmand, - avval aytmoqchi bo‘lgan gapingni uchta elakdan o‘tkaz...
-Uchta elak?
-Biror gapni aytishdan oldin, uni uchta elakdan o‘tkazish lozim. Avval HAQIQAT elagidan. Aytmoqchi bo‘lgan gaping haqiqat ekanligiga ishonching komilmi?
-Yo‘q, men uni shunchaki eshitdim, xolos.
-Demak, sen uning rost yoki yolg‘onligini bilmaysan. Endi ikkinchi – YAXSHILIK elagidan o‘tkazamiz. Sen menga do‘stim haqida biror yaxshi gapni aytmoqchimisan?
-Yo‘q, aksincha.
-Demak, -davom etdi donishmand, - sen menga haqiqatligini bilmay turib yomon xabarni yetkazmoqchisan. Endi uchinchi elakdan o‘tkazamiz – FOYDA elagi. Sening gapingni eshitishim shartmi, u menga foyda keltiradimi?
-Yo‘q, hojati yo‘q.
-Demak, -xulosa qildi donishmand, - sen yetkazmoqchi bo‘lgan xabarda haqiqat ham, yaxshilik ham, foyda ham yo‘q ekan. Unda uni menga aytib nima qilasan?



@Ayolning_41_olami

#yakshanba_mutolaasi

Ota bilan kechki ovqat

O‘g‘il, juda qarib, munkillab qolgan otasini, kechki ovqat uchun restoranga olib bordi. Qarigan, holdan toygan, qo‘llari titroq bosgan va zaiflashib qolgan ota, ovqat yeyish jarayonida bir ko‘ylagiga, bir shimiga ovqat to‘kib yeya boshladi. Restoranning boshqa xo‘randalari bu holni ko‘rib irganib, farzandga esa ensa qotar qaray boshlashdi.

Otasi ahvolidan zarracha uyalmagan, aksincha ota ne hoxlasa bisyor qilayotan farzand, tanovul tugagach, ikkovlashib yuvinish xonasiga yo‘l oldilar. Farzand avval ota ko‘ylagidagi ovqat qoldiqlarini, so‘ng shimdagi dog‘larni artdi, ko‘zoynagini mahkamlab, sochlarini esa mehr bilan tarab qo‘ydi. Tashqarida esa butun restoran ularni jimlik bilan kuzatar, epsiz qariya va yosh yigit xaqida pichirlashishar edi.

Ota-bola tashqariga chiqqach, holatni ko‘rgan olomon hijolat cheka boshladi, ammo omma oldida sharmanda bo‘lishni xohlamas, mavqelari bunga yo‘l qo‘ymas edi. O‘g‘il hisob so‘radi, yegan-ichgan xaqqini to‘lab otasi bilan restoran o‘rtasi bo‘ylab eshik tamon yura boshladi.

Odamlar orasidan o‘ta turib ota o‘g‘liga savol bilan murojaat qildi: «Bu yerda hech narsa qoldirmadingmi? O‘g‘il: "yo‘q, hech narsa qoldirmadim», Qariya: "Qoldirding, sen har bir o‘g‘il uchun dars va har bir ota uchun umid qoldirding.
Restoran ahli esa jim edi...

Behzod Abdurahmonov tarjimasi

@Ayolning_41_olami

Nega kamnamoman?

To'g'risi, bu blog kuzatuvchilari uchun ko'plab yangiliklar, loyihalar qilish niyatida edim (Hali ham shunday!). Ayollarga qo'shimcha daromad topish, vaqtni to'g'ri taqsimlash borasida bilganlarimni bosqichma-bosqich o'rgatish maqsadimni aytgan edim. Lekin kopirayting mavzusini birinchi planga olib chiqqanim bois ko'plab obunachilar tark etdi. Nima ham derdik, zorimiz boru, zo'rimiz yo'q!

🔥 Hozirda kursim, darslarim va o'quvchilarim bilan ko'proq mashg'ul bo'lganim bois yangi bepul darslarni boshlay olmayapman. Yangi yildan InshaAlloh yana yo'lga qo'yaman!

❗️ Ungacha esa mening yana bir sevimli ishim, sevimli jurnalim — "Innovator" bilan tanishib turing. Blog egasining yana asosiy qirrasini ko'rasiz, baho berasiz! To'g'risini aytsam, shu jurnal uchun maqolalarni zavq bilan yozaman, yozganda dam olaman. Qolaversa, qalamim ham charxlanib turadi.

🚀 Shunaqa gaplar. Kanaldan uzoqlashmang. Fikr-mulohaza bo'lsa, shapkadagi akkauntga yo'llang! Zavqli mutolaa tilayman! 👇👇👇👇