Ulugʻbek Qori

Ramazonga Tamanniy

"R" uhimiz ozuqa olar sen bilan,
"A" yyomlar sultoni, mohi Ramazon.
"M" udom kelarkansan, qolgin men bilan,
"A" ylanib qishin-yoz birga har tomon.
"Z" amonaning zayli senla porlagay,
"O" ydin kechalarda o‘qibla Qur’on,
"N" oming jaranglagay yurakda har on.

©️ Sayhuniy
29.03.2022

Erta tong!

Quyosh zarrin nurlarini yerga sochib ulgurgan bo‘lsa-da, yuzni ohista silab o‘tadigan mayin va salqin shamol hamon harakatda edi. Hujjat ishlari bilan universitet tomon yo‘l oldim.

Avtobusdan tushib, oliygoh ko‘chasiga kirarkanman, ne ko‘z bilan qarayki, odatda insonlar va mashinalar zichligi bilan to‘lib-to‘shadigan ko‘cha ta’til vaqti bo‘lgani uchunmi, juda ham sokin va osuda edi. Yo‘l chetidagi qadimiy va salobatli binolarga qarab ilhomlanib ketayotganimda, qarshimdan bir farrosh ayol chiqib, salom berdi-da, shoshilib cho‘ntagidan pul chiqardi. So‘ng:

— Bu qayerniki va qancha? — deb so‘radi hayajon bilan..

Tanish pulni ko‘rib biroz ajablanib:

— Xomsata alaf so‘m uzbekiyyah (besh ming O‘zbek so‘mi), — deya javob berdim.

— Buni qanday ishlatsam bo‘ladi? — deb yana ham qiziqishi ortdi.

(Bunga sabab — Misr pul birligidagi raqamlar bunchalik katta emas. Eng katta pul birligi — 200 junayh. 5000 junayh esa Misrda 100 $ ga teng.)

— Bankda bu pulni olishmaydi. Misr puliga 20 junayhga to‘g‘ri keladi, — desam, Misr lahjasida:

— Bass? (Shu xolosmi?) — dedi-da, pul ushlagan qo‘lini hafsalasi pir bo‘lgan holda o‘pib, qaytadan salom berib ortga ketdi.

Ayol ketgan tomonga biroz qarab turib:

— Eh, qitmir O‘zbeklareyy... — dedim-u, o‘zim ham Misrga kelgan paytim ikki ustaga 200 so‘mdan berib "xursand" qilganim esimga tushib, jilmayib Azhari Sharifga kirib ketdim...

📆 22.01.2024

© Sayhuniy

🔗 Sayhuniy sahifasi