Бобокул Усмон шеьрияти

МАТМУСАНИНГ ТЎЙИ

Матмуса чўлда чўпон,
Жами юзта қўй қилди.
Сўнгра қўйларни сотиб,
Бир кун катта тўй қилди.

Тўй тўйдек бўлсин дея,
Борин сочиб ташлади.
Маҳаллада одамлар,
Дув-дув гап ҳам бошлади.

...Шаҳардан зўр ҳофизни,
Таклиф қилди бошида.
Уч-тўртта раққоса ҳам
Бўлсин, дея қошида.

Карнай-сурнай садоси,
Тутди атроф-оламни
Матмуса дер: "Билсинлар,
Бугун тўйи боламни!"

Келаверди қизиқчи,
Ноғорачи, дорбозлар.
Янгради Матмусани,
Олқишлаган овозлар.

Тўй бошида вакил ҳам,
Матмусани мақтади.
Саховатли, кенгфеъл деб,
Фазилатлар қадади.

Кайф қилган Матмусага,
Мақтовлар хуш ёқарди.
Даврага тандир кабоб,
Ароқ сувдек оқарди.

Ҳофизлар бўш келмади,
То тонггача бақирди.
Қистир-қистир бўлсин деб,
Одамларни чақирди.

Ким таниш, ким нотаниш,
Меҳмон мингдан ошганди.
Матмусабой жўш уриб,
Дарё каби тошганди.

...Тўй қизиди, Матмуса,
Тўкди, сочди борини.
Кўзи тиниб, танимай
Қолди ҳатто ёрини.

Ана холос, бир маҳал,
Раққосага осилди.
Қий- чув, хуштак, оломон,
Хуморлари ёзилди.

...Тонг чоғи тинди шовқин,
Урҳо йиқит тўй бўлди.
Барчасига сабабчи,
Ўша юзта қўй бўлди.

Минг бир кун тўплаганин,
Бир кечада совурди.
Матмуса қўчқор-қўйни,
Қозонларда қовурди.

...Тўй ўтди, лек Матмуса,
Келолмади ўзига.
Ётса, турса, юрса ҳам
Қўй кўринар кўзига.

"Эски тоз, эски ҳамом",
Таёқ олди қўлига.
Матмуса қўй боқишга,
Кетди яна чўлига ...

...Ҳисобни билмаганлар,
Ҳамёнидан айрилгай.
Умрнинг йўлларида,
Матмусадек тайрилгай!

БОБОҚУЛ УСМОН,

Бухоро вилояти, Шофиркон туманида яшовчи меҳнат фахрийси

"Ким олади- ё, шугинани- ё" 2025 "Муштум" журнали танлови учун юборилган ҳажвий шеърлардан.

МЕЪРОЖ КЕЧА--------------

Бу кеча, тилларда достон бу кеча,
Кечалар ичраки султон бу кеча.

Расуллуллоҳ Маккадан йўл олдилар,
Масжиду Асқога томон бу кеча.

Сўнг Буроққа миндилар маркаб этиб,
Сайр этурға етти осмон бу кеча.

Жаброил йўлбошчидир, Ҳақдан ҳукм,
Мўъжиза юз берди ҳар он бу кеча.

Етти осмон узрадир, етти набий,
Боқдилар Расулга шодон бу кеча.

Хабибуллоҳ файзидан кўк яшнади,
Коинот бўлди чароғон бу кеча.

Ул малоиклар Расулни қуршади,
Ақли инсон лолу ҳайрон бу кеча.

Етти осмон тоқига чиқмиш Расул,
Ҳақ билан сўзлашди, имкон бу кеча.

Бўлди фарз беш вақт намоз Ҳақ амри-ла,
Сўнг сайр жаннат, гулистон кеча.

...Қайтдилар ерга Расуллуллоҳ ажаб,
Еру кўк ҳайратда, ҳайрон бу кеча.


Кечаким, нурли эрур, сирли эрур,
Номи-Меърож, бедор Усмон бу кеча.

БОБОҚУЛ УСМОН

ШОҲ ВА ШОИР ЗАҲИРУДДИН МУҲАММАД БОБУР НАЗМИДА САЙЙИДИ КОИНОТ ВАСФИ

****

ИШОРАТ МЕЪРОЖ СИФАТИҒА
(Меърож сифатининг баёни)

Бир кеча Тенгрининг иноятидин,
Фазл ила лутфи бениҳоятидин,
Умму Ҳоний уйида эрди Расул,
Жаброил осмонидин этти нузул;
Жаброил олдида Буроқ чекиб,
Маркаб эрди Буроқу ул рокиб;
Маккадин келди Байти Мақдисқа,
Сен бу йўлни соғинмағил қисқа.


Бир кеча Аллоҳ таъолонинг инояти ва бениҳоят фазлу карами ва лутфи – илтифоти бўлиб, ҳазрати Расулуллоҳ алайҳиссалом (ҳазрати Али розияллоҳу анҳунинг опалари, Абу Толибнинг қизлари бўлмиш) Умму Ҳонийнинг уйларида ётган эдилар; шунда (фаришталарнинг улуғи) Жаброил алайҳиссалом осмондан тушиб келдилар; Жаброил алайҳиссалом ёнларида Буроқни ушлаб турар эдилар.

Шунда Буроқ (учқур от) маркаб, яъни улов бўлди ва ул зот (Муҳаммад алайҳиссалом) рокиб – суворий бўлдилар.
Маккаи мукаррамадан Байтул Мақдисга (Масжиди Ақсога) келдилар, сен бу йўлни қисқа деб гумон қилма.


ИЗОҲ. Бу ҳақиқат Қуръони каримда баён этилди, маъноси: “Ўз бандаси (Муҳаммад алайҳиссалом)ни (жасади ила) кечаси Масжиди Ҳаромдан Биз атрофини баракотли қилиб қўйган Масжиди Ақсога олиб борган Зот (Аллоҳ) шони юксак (ва ҳар турли нуқсонлардан пок)дир. (Буни) унга оятларимиздан бир қисмини кўрсатмоғимиз учун (қилдик). Шубҳасиз, Унинг Ўзи ҳаққоний эшитгувчи, кўргувчидир. (Исро сураси, 1-оят).


Борди андин, фалакка майл этти,
Етти кўкка ўшал замон етти.
Анбиё бирла мухталит бўлди,
Нуридин жавфи осмон тўлди.
Кўрди дўзахни, биҳиштни ҳам,
Яхши афъолу бадсириштни ҳам.


Кейин у жойдан кетиб, осмон оламига майл этдилар. Шу лаҳзада етти қават осмонга етдилар. (У осмонларнинг ҳар бирида) пайғамбарлар билан мулоқот қилиб, кўришиб, суҳбатдош бўлдилар. Бутун осмон ичи Ул зот (соллаллоҳу алайҳи ва саллам)нинг нурларидан тўлди.

Шунда у зотга дўзах ҳам, жаннат ҳам кўрсатилди, (жаннатдаги) яхши феълли (солиҳ амаллар қилган) кишиларни ҳам, ёмон хулқли (қилмиши бад) кимсаларни ҳам кўрдилар.


ИЗОҲ. Меърож воқеаси улуғ бир мўъжиза бўлиб, инсоннинг ақлий мантиқи ҳудудидан ташқаридадир. Бунинг ҳақиқат эканлиги Қуръони карим оятлари ва энг саҳиҳ Ҳадиси шарифлар билан собитдир.

Ҳазрати Анас (розияллоҳу анҳу) дедилар: “Ҳазрати Жаброил алайҳиссалом жаноб Пайғамбар соллаллоҳу алайҳи ва салламни ҳазрати Идрис (алайҳиссалом) нинг ёнларидан олиб ўтаётганларида, у киши: “Марҳабо (хуш келибсиз), эй солиҳ Пайғамбар, эй солиҳ биродар!” – дедилар.

(Жаноб Расулуллоҳ алайҳиссалом айтдилар:) шунда: “Бу киши ким?” – дедим. (Ҳазрати Жаброил:) “Бу киши Идрис (алайҳиссалом)”, дедилар. Кейин (Жаброил) мени ҳазрати Мусо алайҳиссаломнинг ёнларидан олиб ўтдилар. У киши: “Марҳабо, эй солиҳ Пайғамбар, эй солиҳ биродар!” – дедилар. Шунда: “Бу киши ким?” – дедим. (Ҳазрати Жаброил:) “Бу киши Мусо (алайҳиссалом)”, дедилар.

Кейин (Жаброил) мени ҳазрати Ийсо алайҳиссаломнинг ёнларидан олиб ўтдилар. У киши: “Марҳабо, эй солиҳ Пайғамбар,эй солиҳ биродар!” – дедилар. Шунда: “Бу киши ким?” – дедим. (Ҳазрати Жаброил:) “Бу киши Ийсо (алайҳиссалом)”, дедилар. Кейин (Жаброил) мени ҳазрати Иброҳим алайҳиссаломнинг ёнларидан олиб ўтдилар. У киши: “Марҳабо, эй солиҳ Пайғамбар, эй солиҳ биродар!” – дедилар.

Шунда: “Бу киши ким?” – дедим.
(Ҳазрати Жаброил:) “Бу киши Иброҳим (алайҳиссалом)”, дедилар”.

«МУБАЙЯН» ШАРҲИ
(Заҳируддин Муҳаммад
Бобур хазиналари) асаридан

УСТОЗ МИРЗО КЕНЖАБЕК


@m_kenjabek
┈┈• ❀ 🌷☘️🌷 ❀ •┈┈•

Ҳазрати Довуд зиёратгоҳи. Сўнгги 1101 зинапоя ҳам забт этилди.