Buyuk kasbdoshlarimizga sharaflar bo‘lsin!
Shifokorlar jang maydonida!
Yuz ming do‘xtir safarbardir, yuz ming do‘xtir...
Nokaslarga, balki buning farqi yo‘qdir.
Kimga buning farqi yo‘qdir – qalbi yo‘qdir.
Ular o‘ylar: bizga buning xavfi yo‘qdir.
Yuz ming do‘xtir safarbardir, yuz ming do‘xtir...
Prezident aytdi u kun: “Mamlakatlar,
Man-man degan mamlakatlar, ellar, xalqlar,
Chora topmay, davo topmay, to‘kib ashklar,
To bizni ham mahv etmay bu xavf-u xatar,
Yuz ming do‘xtir safarbardir– yuz ming lashkar”.
Ne-ne donolarni bergan cheksiz diyor,
Ibn Sinolarni bergan tengsiz diyor,
Jamlab jami jadval, tartib-qonunlarin,
Odamzotga baxsh etgan Tib qonunlarin,
Bilgay buni Parij, Rumo Hind-u Qashqar
Yuz ming do‘xtir jangga kirar – yuz ming lashkar!
Shu qadim yurt ota-bobong makonidir,
Bugun millat sog‘lig‘i – jang maydonidir.
Zoye ketmas ajdodlarning taʼlimlari,
Ey, elimning siz Luqmoni Hakimlari!
Shashtingizdan yuz ming jon-u dilim qalqar,
Yuz ming do‘xtir jangga kirar – yuz ming lashkar.
Yig‘ishtirdik – ne dabdaba, asʼasadir.
Vijdon bizga bugun qurol-aslahadir.
Beparvolik – xiyonatdir millat uchun,
Xalq-u Vatan millat bo‘lar kundir bu kun,
Fosiq kaslar fahm etmay boshin qashlar,
Yuzm ming askar jangga kirar – yuz ming lashkar!
O‘z joningiz qo‘yib xavf-u xatarlarga,
Siz kirdingiz jiddiy jang-u jadallarga,
“Yaratgandan bordir mening so‘rorlarim,
Sog‘ bo‘lsinlar, omon bo‘lsin bemorlarim”.
Bemorlari uzra sizday bedorlarim
Sog‘ bo‘lsin deb butun olam, xalq-u bashar,
Yuz ming lashkar boshlab kirar – yuz ming askar!
Yuz ming lashkar jangga kirar – yuz ming lashkar!
O‘zbekiston xalq shoiri Sirojiddin Sayyid.
Kanalga ulanish:
@tibbiyot_talabalari
