Alimoff

Эрталабки кайфият бошқа пайтлардан кўра юқорироқ бўлади

Одамлар эрталаб ўзини кечқурунга қараганда яхшироқ ҳис қиларкан. Лондон университети (UCL) томонидан ўтказилган тадқиқот шуни кўрсатдики, куннинг илк соатларида кўпчилик ўзини энг яхши ҳолатда ҳис қилади.

Тадқиқот COVID-19 пандемияси даврида 49 218 нафар катта ёшли одамлар иштирокида ўтказилган. Унда одамлар эрталаб “ўзини яхши ҳис қилиш” ҳолатида уйғониши, кечқурун эса кайфияти ёмонлашиши аниқланган.

UCL томонидан олиб борилган тадқиқотга кўра, бахтлилик, ҳаётдан қониқиш ва ҳаёт маъносини ҳис қилиш даражалари душанба ва жума кунлари якшанбага қараганда юқорироқ бўлган. Сешанба куни ҳам одамлар ўзини бироз яхшироқ ҳис қилган, лекин ҳафта кунлари бўйлаб ёлғизлик ҳисси сезиларли даражада фарқ қилмаган.

Олимлар бу ҳолатни инсон танасининг биологик соати ва гормонал ўзгаришлар билан боғлиқ эканлигини таъкидлашяпти. Масалан, кайфиятга таъсир қилувчи кортизол гормони уйғонгандан сўнг энг юқори даражада бўлади ва кечга бориб энг паст даражага тушади. Шунингдек, ҳафта кунлари бўйлаб кайфият ўзгариши иш, кундалик вазифалар ва турмуш тарзи каби омиллар билан боғлиқ бўлиши ҳам мумкин.

Олимлар тадқиқот натижалари бошқа ишларда ҳам тасдиқланса, бу психик саломатликни қўллаб-қувватлаш хизматлари учун муҳим амалий аҳамиятга эга бўлиши мумкинлигини таъкидлаяпти. Масалан, кечқурун инсон руҳияти кўпроқ ёрдамга муҳтож бўлиши мумкин, шу сабабли кечки вақтда психологик ёрдам хизматларини кенгайтириш кераклиги таклиф қилиняпти.

🧠@nurbekalimov

АҚШ Мюнхенда Украина урушини тугатиш режасини тақдим этади

14-16 февраль кунлари бўлиб ўтадиган Мюнхен хавфсизлик конференциясида АҚШнинг Украина бўйича махсус вакили Кит Келлог президент Доналд Трампнинг Украина урушини тугатиш режасини тақдим этиши кутиляпти. Бу ҳақда Bloomberg ўз манбаларига таяниб хабар берди.

Режа тафсилотлари ҳозирча тўлиқ маълум эмас, лекин Келлог ва бошқа расмийларнинг сўнгги баёнотларига кўра, у “куч орқали тинчлик” тамойилига асосланган. Яъни, томонларни сулҳга мажбурлаш ғояси илгари суриляпти.

Bloomberg маълумотларига кўра, Трампнинг режасида урушни вақтинча музлатиш ва Россия томонидан босиб олинган Украина ҳудудларини номаълум мақомда сақлаш таклиф этилади. Ушбу ҳудудларга қандай хавфсизлик кафолатлари берилиши эса ҳали ноаниқ.

Келлог Мюнхен конференциясида Трампнинг “қонли ва қиммат” урушни тугатиш режасини муҳокама қилишни интиқлик билан кутаётганини айтди. У, шунингдек, АҚШ билан ҳамкорлик қилишга тайёр иттифоқчилар билан учрашишини таъкидлади.

NBC News эса Трамп жамоаси ичида Украина можароси бўйича иккига бўлиниш борлигини хабар қилди. Баъзилар Россияга босим ўтказиш ва унинг ҳарбий ҳаракатларини тўхтатиш тарафдори бўлса, бошқалар Украина ёрдамларини қисқартириш ғоясини илгари суряпти.

Мюнхен конференциясида бу режага қандай муносабат билдирилиши эса яқин кунларда маълум бўлади.

🧠@nurbekalimov

Нима учун давлат диндан ажратилган бўлиши керак?

Буни Малайзиянинг коррупцияда айбланиб 12 йил қамоқ жазосини олган бош вазири Нажиб Раззоқ мисолида кўриб чиқсак.

Нажиб Раззоқ Малайзия Бош вазири лавозимида бўлган даврида (2009-2018) ўзининг сиёсий мавқеини мустаҳкамлаш учун исломий риторика, сиёсат ва алоқалардан фойдаланган ҳолда диний қиёфани яратганди.

1) Нажиб Раззоқ ўзини Ислом ҳимоячиси сифатида кўрсатарди. Бу учун у Васатийя каби исломий шиорлардан фойдаланган. Таълим, банк ва бошқарув соҳаларида исломий сиёсатни жорий этган. Нажиб фаолиятининг охиригача Ислом қадриятларини ҳимоя қилиш учун ўзини Ғарб либерал таъсирларига қарши курашаётгандай кўрсатган.

2) Ислом банкчилигини кенгайтирди ва Малайзияни ҳалол саноат учун глобал марказ сифатида тарғиб қилди. Закот ва шариатга мувофиқ молияни кучайтирди.

Нажиб ўзини тақводор мусулмон етакчи сифатида кўрсатган бўлса-да, унинг 1MDB можаросидаги иштироки бу қиёфани барбод қилди.

1Malaysia Development Berhad (1MDB) 2009 йилда Нажиб Раззоқ иштирокида ташкил этилган давлат инвестиция фонди эди. У чет эл инвестицияларини жалб қилиши, инфратузилма ва энергетика лойиҳалари орқали Малайзия иқтисодиётини ривожлантириши керак эди.

Бунинг ўрнига эса миллиардлаб долларлар ўғирланди, офшор ҳисоб рақамлари орқали ювилди. Хусусан:

250 миллион долларлик яхта ("Equanimity"),
Нажибнинг рафиқаси Росма Мансор учун 27 миллион долларлик пушти олмос маржон.
Нью-Йорк, Беверли-Хиллз ва Лондондаги 100 миллион долларлик ҳашаматли уйлар.

Шунингдек, терговчилар 1MDBдан 700 миллион доллар Нажибнинг шахсий банк ҳисоб рақамига тўғридан-тўғри ўтказилганини аниқлаган. 2020 йилда Нажиб айбдор деб топилиб, 12 йилга озодликдан маҳрум этилган. 2022 йилда Малайзия олий суди унинг айбловини ўзгаришсиз қолдириб, уни қамоққа олинган биринчи Малайзия бош вазирига айлантирди.

Бу каби мисоллар яқин ва узоқ тарихда етарлича. Сўнгги пайтларда ўзимизда ҳам турли ҳил машенниклар диний атрибутлар ва сўзлардан фойдаланиб, инсонларни куппа кудузи пулини шилиб кетаётганини кўриш мумкин. Дин орқали инсонларни манипуляция қилинишини олдини олиш учун эса яхши таълим ва кучли дунёвий жамият керак.

🧠@nurbekalimov

Дональд Трампнинг Ғазо секторини бўшатиш бўйича "бизнес режа"си ва бунда Саудиянинг мавқеи ҳақида

The New York Times нашри Дональд Трампнинг Ғазо секторидан фаластинликларни чиқариш режасини амалга ошириш имконсиз деб баҳолади. Лекин газета бу ғояни реал мақсаддан кўра савдолашиш тактикасининг бир қисми сифатида кўряпти. Яъни, бу орқали Трамп ҲАМАС ва Саудия Арабистонини ўз позицияларини ўзгартиришга мажбур қилишни кўзлаётган бўлиши мумкин.

ҲАМАС Ғазодаги ўз ҳокимиятни ташлаб чиқиши мумкин, агар фаластинликларнинг бу ҳудудда қолишига кафолат берилса. Ар-Риёд Фаластин давлатини тузиш шартисиз Исроил билан тинчлик битими тузишга рози бўлмаган. Лекин фаластинликларни Ғазодан чиқармай, уларнинг ҳудудда қолиши шарти билан келишувга бориши мумкин.

Бунақа дипломатик сценарий аввал ҳам содир бўлган. 2020 йилда БАА ва Исроил муносабатларини нормаллаштирган «Иброҳимий келишувлар» шунга ўхшаш схемага асосланган эди. Ўша пайтда Исроил Бош вазири Биньямин Нетаньяху Иордан дарёсининг Ғарбий соҳилини аннексия қилиш режасини эълон қилган, бу халқаро ҳамжамиятнинг кескин норозилигига сабаб бўлган. Кейин эса БАА Исроил билан муносабатларни нормаллаштириб, ундан аннексияни бекор қилишни талаб қилган. Ўша ишларни ҳам Трамп амалга оширган эди. У умуртқа миясигача бизнесмен бўлганлиги сабабли, бундай сценарийларни ўйлаб топишга устаси фаранг.

Ҳозирги вазиятда эса шундай сценарий Саудия Арабистони билан такрорланиши мумкин. Ар-Риёд Исроил билан дипломатик алоқаларни ўрнатиш эвазига Вашингтондан катта имтиёзлар олиши мумкин. Агар бу сценарий амалга ошса, Саудия ўзини фаластинликларни куч билан чиқаришдан сақлаб қолган “қутқарувчи давлат” сифатида кўрсатиши мумкин.

Саудия Арабистони яширин ёки очиқ тарзда Исроил билан муносабат ўрнатишни хоҳлаши мумкин, лекин бу масала унинг ички ва ташқи имиджи учун мураккаблик туғдиради. Чунки, Саудия ўзини ташқи сиёсатда араб ва умуман ислом дунёсининг етакчи мамлакати сифатида кўрсатишга уринади ва бу мақомни йўқотишни истамайди.

Саудия раҳбарлари “Икки муқаддас масжиднинг хизматкори” сифатида фаолият юритишади (Каъба ва Мадинадаги Масжиди Набавий) бу эса исломий ва консерватив аҳоли орасида Исроил билан яқинлашишга қарши позицияни кучайтиради. Саудияда Исломнинг энг фундаментал оқимларидан бири бўлмиш вахҳобийлик асосида шаклланган жамият ҳали ҳам мавжуд. Илгари мамлакатда қаттиқ диний назорат бўлган, ҳозирги ислоҳотларга қарамай, консерватив мухолифат ҳали ҳам бор. Улар ҳаттоки Маккада теракт уюштириб, хожиларни гаровга олгани ҳақида Ютюбдаги саҳифамда видео ҳам қилганман. Қизиқ бўлса кўришингиз мумкин.

Бундан ташқари, Валиаҳд шаҳзода Муҳаммад бин Салмон Саудияда катта либерал ислоҳотларни амалга оширяпти, лекин бу жараён аста-секинлик билан олиб бориляпти. Агар Ар-Риёд Исроил билан очиқ дипломатик муносабат ўрнатса, бу ички сиёсий барқарорликка таъсир қилиши мумкин.

Саудия Арабистони ўз обрўсини сақлаб қолишга ва халқаро майдонда етакчилик ролини йўқотмасликка ҳаракат қилади. Агар бу геосиёсий сценарий амалга ошса, Саудия Вашингтондан катта геосиёсий ва иқтисодий имтиёзлар олиш эвазига Исроил билан яқин муносабат ўрнатиши мумкин. Лекин бу жараён қанчалик муваффақиятли бўлиши Саудия раҳбариятининг жамоатчилик ва халқаро ҳамжамият билан қандай иш олиб боришига боғлиқ бўлади.

🧠@nurbekalimov

Малайзиянинг ислом санъатига оид нодир коллекцияси Ўзбекистонда намойиш этилади
 
Ўзбекистондаги Ислом цивилизацияси маркази матбуот хизмати хабар беришича, Ўзбекистон Республикаси Президентининг Ўзбекистон ва Малайзия ўртасида маданий ҳамкорликни янада ривожлантиришга қаратилган ташаббуси Малайзия Ислом санъати музейи раҳбарияти томонидан тўлиқ қўллаб-қувватланди.

Марказ матбуот хизмати маълумотига кўра, Ўзбекистонда ушбу музейнинг ноёб экспонатларини намойиш этишга бағишланган махсус кўргазмалари ташкил этилади. Кўргазмада мамлакатимиз тарихи билан боғлиқ ноёб ислом маданияти асарлари намойиш этилади.

Батафсил шу ерда👉 https://t.me/islommarkazi/4128?single

Билл Гейтс миллиардер бўлганидан кейин ҳам ўн йилдан ортиқ вақт мобайнида ўзини муваффақиятли инсон деб ҳис қилмаган экан

Microsoft асосчиси Билл Гейтс ўзини ҳақиқий муваффақиятга эришган деб ҳис қилган пайтни аниқ эслайди: у 42 ёшда эди ва бу вақтга келиб, ўн йилдан ортиқ вақтдан бери миллиардер бўлган. Унинг айтишича, фақат 1998 йилда Microsoft ҳақиқатан ҳам муваффақиятли эканлигига ишонч ҳосил қилган.

Гейтс ўзининг янги “Source Code” номли хотиралар китобида болалик йилларидан тортиб, 1975 йилда Microsoft’ни ташкил этганигача бўлган ҳаёти ҳақида ёзади. У дастурлаш билан шуғулланиб, ҳафтасига 80 соат ишлагани ва ҳар қандай хатолик компанияни юқори поғоналардан қулашига сабаб бўлиши мумкинлигидан доим хавотирда бўлганини эслайди.

Фақат 90-йилларнинг охирига келиб, у хатоларга йўл қўйиш ва шунга қарамай, барқарор бўлиб қолиш мумкинлигини тушунган. 1998 йилга келиб, Microsoft дунёдаги энг қиммат компанияга айланган, Гейтснинг бойлиги 58 миллиард долларга етган эди. Компания Windows 95 тизимининг оммабоплиги туфайли жуда катта муваффақият қозонган, шу даражадаки, ҳаттоки АҚШ ҳукумати уни монополияда айблаб, антимонопол тергов ўтказган.

Бугунги кунда Microsoft’нинг бозор баҳоси 3 триллион доллардан ошган, Гейтснинг бойлиги эса тахминан 165 миллиард доллар деб баҳоланади. Лекин у ўтмишда Microsoft’нинг ўсишига жуда қаттиқ эътибор қаратганини ва бу орқали ўзига ҳам, ходимларига ҳам катта босим ўтказганини тан олади. У доимо ҳадикда ишлаган ва компаниянинг муҳим саналарини ҳам нишонлашни хоҳламаган.

“Мен ҳар доим хавотирда юрардим. Microsoft’нинг юбилейлари бўлганда, мен: “Ўтмишни эслашга вақт йўқ, дердим”, – дейди Гейтс. Бугун у бу фикрлаш тарзи ортиқча ишлаш ва руҳий саломатликка салбий таъсир ўтказиши мумкинлигини тушунган.

🧠@nurbekalimov

Герхард Шрёдер касалхонага ётқизилди

Германиянинг собиқ канцлери Герхард Шрёдер оғир чарчаш синдроми ташхиси билан касалхонага ётқизилди. Дoкторлар унинг кучли тоқатсизлик, энергия етишмовчилиги, хотира ва диққат билан боғлиқ қийинчиликлар, шунингдек, уйқусизликдан азият чекаётганини маълум қилишди.

80 ёшли Шрёдер 1998–2005 йилларда Германия канцлери бўлган ва 1999–2004 йилларда Социал-демократик партияга етакчилик қилган. Лекин у Россия давлат энергетика компаниялари билан ҳамкорлик қилиб келгани ва Украина уруши бошланганидан кейин ҳам Владимир Путин билан муносабатларини очиқ-ойдин узмагани сабаб сиёсий доираларда қаттиқ танқидга учраган.

Унинг ҳозирги ҳолати ва даволаниш жараёни ҳақида қўшимча маълумот берилмаган.

🧠@nurbekalimov

Доналд Трамп Исроил Бош вазири Бинямин Нетаняху билан учрашувда Ғазо сектори аҳолисини кўчириш зарурлиги ҳақидаги фикрларини яна бир бор такрорлади

"Бу ҳудуд вайрон бўлган. Агар ғазоликларда бошқа имконият бўлганида, улар бу ердан кетган бўлишарди," - деди АҚШ президенти. "Фаластинликлар омон қоладиган, чиройли шаҳарлари бўлган 4-5 та ҳудуд қуриш мумкин. Ғазода вайронагарчилик ва ўлимдан бошқа ҳеч нарса йўқ. Мен Ғазодан 1,7 миллион фаластинликни кўчирмоқчиман," - деди у.

Шу билан бирга, Трамп секторда Исроил аҳоли пунктлари қурилишига қарши чиқди. Ундан Ғазони тарк этган фаластинликлар қайтиб кела оладими, деб сўрашганида, Трамп шундай жавоб берди: "Умид қиламанки, биз уларнинг қайтишни истамасликлари учун яхши ишлар қила оламиз."

Саудия Арабистони билан муносабатларни нормаллаштириш бўйича музокаралар ҳақида Трамп шундай деди: "Саудлар муносабатларни нормаллаштириш эвазига Фаластин давлатини ташкил этишни талаб қилишмаяпти."

Аммо ҲАМАС Трампнинг фаластинликларни Ғазодан кўчириш таклифини рад этди. Ҳаракат вакили АҚШ президентининг бу таклифини "Фаластин масаласини йўқ қилишга қаратилган очиқдан-очиқ уриниш" деб баҳолади.

Трампнинг бу баёнотлари ортидан Саудия Арабистони Ташқи ишлар вазирлиги ҳам мустақил Фаластин давлати ташкил этилмагунча Исроил билан дипломатик алоқалар ўрнатмаслигини билдирди.

🧠@nurbekalimov

🍕 Bellissimo Pizza – 70 та ресторан билан Ўзбекистондаги пешқадам тармоқлардан бирига айланди

📌 7 феврал куни «Poytaxt» савдо марказида навбатдаги ресторан очилиши бўлиб ўтади. Ташриф буюрувчилар учун жонли мусиқа, аниматорлар ва катта рақс шоу ташкил этилади.

😋 Очилиш куни «Пепперони» пиццаси 25 см 29 000 сўмга (54 000 сўм ўрнига) таклиф қилинади.

App | Instagram | Telegram

Реклама

Ўзбекистон-Малайзия илмий жамияти ташкил этилади

Бу ҳақда кеча Куала-Лумпурда Малайзия Ислом санъати музейида икки томонлама маданий алоқаларни мустаҳкамлаш ва ислом цивилизациясини ўрганишда илмий ҳамкорликни ривожлантиришга бағишланган "Маданий мерос: Ўзбекистон ва Малайзия ўртасидаги кўприк" мавзусидаги халқаро давра суҳбатида маълум қилинди.

Халқаро ислом тафаккури ва цивилизацияси институти (Малайзия) Ўзбекистондаги Ислом цивилизацияси маркази ҳамда Имом Бухорий, Имом Мотуридий ва Имом Термизий номидаги халқаро илмий-тадқиқот марказлари билан ўзаро англашув меморандуми имзоланган. Давра суҳбатининг асосий қарорларидан бири икки мамлакатнинг ислом цивилизациясини ўрганишга ихтисослашган етакчи тадқиқотчилари ва экспертларини бирлаштирадиган қўшма Ўзбекистон-Малайзия илмий жамиятини ташкил этиш бўлибди.

Ташкилотга Ўзбекистон томонидан Ислом цивилизацияси маркази, Малайзия томонидан эса Ислом тафаккури ва цивилизацияси халқаро институти раҳбарлик қилади.

Экспертлар кенгашининг биринчи йиғилиши эса Ўзбекистондаги Ислом цивилизацияси марказининг расмий очилиши арафасида бўлиб ўтади.

Трамп Исроилга 1 миллиард долларлик ёрдам бермоқчи

The Wall Street Journal’нинг хабар беришича, Дональд Трамп маъмурияти Конгрессдан Исроилга 1 миллиард долларлик ҳарбий ёрдамни маъқуллашни сўраяпти. Бу пакет 4,7 мингта 450 килограммлик бомбалар (700 миллион доллар) ва Caterpillar компаниясининг 300 миллион долларлик зирҳли булдозерларини ўз ичига олиши мумкин.

Исроил бу каби булдозерлардан аввал ҳам фаластинликларнинг уйларини бузиш учун фойдалангани маълум. Агар Конгресс бу келишувни маъқулласа, у Исроилга берилаётган энг йирик ҳарбий ёрдамлардан бирига айланади. Қонундаги талабга кўра, бундай битимлар учун Конгресснинг расмий розилиги олиниши керак.

Бу қарорнинг халқаро миқёсда қандай оқибатларга олиб келишини тахмин қилиш қийин эмас. АҚШнинг бундай ёрдами Исроил-Фаластин можаросини янада кескинлаштириши мумкин. Бир томондан, Исроил ўз хавфсизлигини таъминлаш ва ҲАМАС билан курашни давом эттириш ниятида. Иккинчи томондан, бу Фаластин томонидан босимни кучайтириш ва тинчлик музокараларини янада мураккаблаштириш сифатида қабул қилиниши эҳтимолдан ҳоли эмас.

Исроил бош вазири Биньямин Нетаньяху 2 февраль куни АҚШга келган ва 4 февраль куни Трамп билан учрашиши кутиляпти. Бу учрашувнинг асосий мавзуси айнан Исроилга ҳарбий ёрдам ҳамда ҲАМАСга қарши операциялар бўлиши мумкин. Агар бу битим тасдиқланса, у нафақат Яқин Шарқдаги мувозанатга, балки АҚШнинг халқаро майдондаги имиджига ҳам таъсир ўтказиши мумкин.

🧠@nurbekalimov

Гарвардни ташлаган йигит янгича илова яратди

23 ёшли йигит Гарварддаги ўқишини ташлаб, инвестициялар учун “TikTok” яратди. Dub номли ушбу иловада бозор таҳлили ёки молиявий ҳисоботларни ўқиш шарт эмас – фойдаланувчилар шунчаки энг яхши инвесторларнинг қарорларини битта тугмани босиш орқали нусхалай оладилар. Ҳеч қандай мураккаблик йўқ, минимал билим билан максимал фойда олиш ғояси таклиф қилиняпти.

Бир қарашда, бу ғоя жуда жозибалидек кўринади. Одатда, бозорни тушуниш учун йиллар давомида тажриба тўплаш талаб этилади, Dub эса бу жараённи автоматлаштиришга ҳаракат қиляпти. Ойлик обуна нархи $10, ҳажми катта портфолиоларни нусхалаш эса $25. Ҳозиргача иловани 800 мингдан ортиқ киши юклаб олган, бу эса унинг бозордаги катта қизиқиш уйғотганини кўрсатади.

Бироқ, бу концепция билан боғлиқ жиддий саволлар ҳам мавжуд. Аввало, инвестициянинг моҳияти мустақил қарорлар қабул қилишда, бозорни англаш ва таваккалчиликни ҳисоблашда. Кимнингдир стратегиясини шунчаки кўчириш, ҳақиқатда самарали йўлми? Профессионал инвесторлар турли маълумотларга эга бўлади, ўз стратегияларини ўзгартиришади, уларнинг қарорларини айнан нусхалаш эса кутилмаган оқибатларга олиб келиши мумкин.

Иккинчидан, Dub ёш, тажрибасиз инвесторларни осонлик билан бозорга жалб қилиши ва уларда “тез бойиш” хаёлини шакллантириши мумкин. Лекин инвестиция – доимий ривожланишни талаб қиладиган соҳа. Агар фойдаланувчилар танланган стратегия нега самарали эканини тушунмаса, улар ўз маблағларини нотўғри бошқариб, катта йўқотишларга учраши мумкин.

Dub инвестиция жараёнини соддалаштириш борасида инновацион ёндашув таклиф қиляпти, лекин у шу билан бирга, бозордаги рискларни кўра олмайдиган, молиявий саводхонлик даражаси паст фойдаланувчилар учун хавфли бўлиши мумкин. Бу ҳақиқатан ҳам янги инвестиция маданиятини шакллантирувчи технологиями ёки оддий молиявий қимор ўйиними – вақт кўрсатади.

🧠@nurbekalimov