СЕВАРА Убайдуллаева

Ўзбекистон-Кувайт муносабатларининг янги босқичи

Ўзбекистон Республикаси Президенти Шавкат Мирзиёевнинг Кувайт давлатига расмий ташрифи ва олий даражада ўтказилган музокаралар икки давлат ўртасидаги ҳамкорликни янги босқичга олиб чиқишда муҳим қадам бўлди.

Президентимиз ташрифи доирасида Кувайт Давлати Амири Шайх Мишъал ас-Сабоҳ билан амалга оширилган учрашувлар ҳамда имзоланган қатор муҳим ҳужжатлар икки томонлама алоқаларнинг барқарор ривожланиши ва кенгайишига замин яратади. Ҳар икки мамлакат етакчилари ўртасидаги музокаралар ўзаро ишонч ва манфаатдорлик руҳида ўтгани муҳим аҳамиятга эга.

Музокаралар давомида давлат раҳбарлари сиёсий мулоқотни чуқурлаштириш, савдо-иқтисодий, инвестициявий ва инновацион ҳамкорликни янада ривожлантириш, инфратузилма, транспорт ва логистика, “яшил” энергетика, соғлиқни сақлаш ва туризм каби соҳаларда янги лойиҳаларни амалга ошириш юзасидан келишиб олдилар.
Айниқса, Кувайт араб иқтисодий тараққиёт фонди билан ҳамкорликни кенгайтириш, инвестиция платформаси ва ишбилармонлар кенгашини ташкил этиш борасидаги келишувлар иқтисодий ҳамкорлик учун янги имкониятларни яратади. Шунингдек, Кувайт шаҳрида савдо уйини очиш бўйича эришилган келишув икки мамлакат тадбиркорлари учун янги майдон очади.

Маданий-гуманитар соҳадаги ҳамкорликни мустаҳкамлаш мақсадида маданият ва туризм ҳафталикларини ўтказиш, санъат, мусиқа, кино, таълим ва спорт йўналишларида қўшма тадбирларни амалга ошириш масалалари муҳокама қилинди.
Музокаралар натижасида имзоланган саноат, меҳнат, ҳаво қатнови, “ақлли” шаҳарлар, соғлиқни сақлаш ва туризм соҳаларидаги битимлар эса икки давлат ўртасидаги амалий ҳамкорликни мустаҳкамлашга хизмат қилади.
Шунингдек, ушбу ташриф доирасида Ўзбекистон ва Кувайт халқаро ташкилотлар доирасида бир-бирини қўллаб-қувватлашни давом эттиришга келишиб олдилар. Жорий йилда Самарқандда ўтказилиши режалаштирилган “Марказий Осиё - Кўрфаз араб давлатлари ҳамкорлик кенгаши” саммитига тайёргарлик кўриш масаласи ҳам муҳокама қилинди.

Президентимизнинг ушбу ташрифи Ўзбекистон-Кувайт муносабатларининг янги саҳифасини очди ва келгуси ҳамкорликни янада ривожлантириш учун мустаҳкам замин яратади. Бундай юқори даражадаги мулоқотлар ва имзоланган битимлар икки мамлакат халқларининг фаровонлиги ва тараққиётига хизмат қилади.

👉 @sevara_ub

Ёшлар ва хотин-қизларнинг олий таълимдаги янги имкониятлари

Ўтган даврда олий таълимга кириш учун катта рақобат мавжуд бўлгани ҳақида кўп эшитганмиз. Илгари, 1 ўрин учун камида 10 нафар ёш кураш олиб борган. Аммо қисқа вақт ичида олийгоҳлар сони 3 баробар оширилди, ва бугунги кунда тизимда қамров 42 фоизга етди. Бу ўзгаришлар ёшларга билим олишда янги имкониятларни тақдим этмоқда ва мамлакатимизнинг ривожланишида муҳим аҳамият касб этмоқда.
Шунингдек, магистратурада талабалар сони 7 карра ошди, 3,5 мингдан 25 мингга кўпайди. Бу ҳам олий таълимга қизиқишнинг кучайганини ва ёшларимизнинг илмий салоҳиятини оширишга қаратилган қадамлар самарасини кўрсатади.
Ёшларга бўлган эътиборнинг яна бир аниқ намунаси хотин-қизлар учун жорий этилган давлат томонидан контракти қоплаш системасидир. Бу тизим натижасида хотин-қизлар сони 11 карра ошди. Вақтлар оша, ушбу қадамлар оила таълими ва жамият ривожида муҳим аҳамият касб этмоқда. Чунки менинг фикримча, битта қизни ўқитиш билан бутун оилани ўқитган бўламиз, ва бу оила билимли бўлса, жамиятнинг умумий билим ва маърифат даражаси ошади.
Бу борадаги ишларни давом эттириш ва янги имкониятлар яратиш давлат сиёсатида устувор йўналишга айланиб, ёшларнинг билим олишдаги имкониятларини янада кенгайтиришга хизмат қилади.