Shavkat Mirziyoyev Parlamentlararo Ittifoqning 150-Assambleyasida muhim masalalarni ilgari surdiDavlatimiz rahbari Shavkat Mirziyoyev ayni damda Toshkentda boʻlib oʻtayotgan Parlamentlararo Ittifoqning 150-Assambleyasida nutq soʻzladi va muhim masalalarni ilgari surdi.
Dastlab Prezident jahonning turli mintaqalaridagi nizolar global va mintaqaviy tinchlik va xavfsizlikka jiddiy tahdid solayotganligini, Oʻzbekiston esa har qanday ziddiyat va qarama-qarshiliklarni faqat diplomatiya va tinch muzokaralar yoʻli bilan hal etishning qatʼiy tarafdori ekanini taʼkidladi.
Ukraina atrofidagi vaziyat boʻyicha boshlangan muzokaralar jarayoni oʻzining ijobiy natijasini berishi, Falastin – Isroil nizosining yagona va adolatli yechimi “ikki xalq uchun – ikki davlat” tamoyilini roʻyobga chiqarishdan iboratligi va Afgʻonistonning xalqaro maydonda yakkalanib qolishiga yoʻl qoʻymaslik lozimligini qayd etdi. U bu borada parlamentlarning koʻmagiga ishonch bildirdi.
Prezident sayyoramiz taraqqiyotiga jiddiy toʻsiq boʻlayotgan iqlim oʻzgarishlariga eʼtibor qaratdi. Chunki uning ayanchli oqibatlari, eng avvalo, rivojlanayotgan mamlakatlarga kuchli taʼsir koʻrsatmoqda. Shavkat Mirziyoyev bu mavzu Samarqandda boʻlib oʻtgan xalqaro iqlim forumida ham atroflicha muhokama qilinganini aytib oʻtdi.
“Davlatlarning iqlim siyosati boʻyicha ilgʻor tashabbuslarini qoʻllab-quvvatlash, qayta tiklanadigan energiya manbalari va “yashil” texnologiyalarga oʻtishni ragʻbatlantirish parlamentlarning muhim vazifasiga aylansa, albatta, salmoqli yutuqlarga erishamiz. Iqlim oʻzgarishi mavzusi Assambleyaning kun tartibidagi bosh masalalardan biri sifatida doimiy oʻrin olishi kerak”, — dedi Prezident.
Shavkat Mirziyoyev oʻz nutqida xotin-qizlar huquqlarini qatʼiy qaror toptirish ijtimoiy taraqqiyotning asosiy shartlaridan biri ekanligiga eʼtibor qaratdi.
Tahlillarga koʻra, iqtisodiyotning barcha tarmoqlarida ayollarning erkaklar bilan teng ishtiroki taʼminlansa, jahon yalpi ichki mahsuloti hajmi 26 foizga oʻsadi. Dunyo miqyosida ayol deputatlarning ulushi 1995-yildagi 11,3 foizdan joriy yilga kelib 27,2 foizga koʻtarilgani albatta quvonarli holdir.Prezident Soʻnggi yillarda yurtimizda BMT institutlari va Parlamentlararo Ittifoq bilan hamkorlikda Osiyo xotin-qizlar forumi va Jahon parlamentlari ayol rahbarlarining 14-sammiti samarali oʻtkazilganini alohida taʼkidladi.
“Shu bois bizning tashabbusimiz bilan ilgari surilayotgan Birlashgan Millatlar Tashkiloti Bosh Assambleyasining “Osiyo xotin-qizlarining ijtimoiy-iqtisodiy, siyosiy-huquqiy va madaniy-gumanitar faolligini oshirish toʻgʻrisida”gi rezolyutsiyasini qoʻllab-quvvatlashingizga umid qilaman”, — dedi Prezident.
Davlat rahbari, shuningdek, yoshlarning parlament faoliyati bilan bir qatorda jamiyat hayotining barcha jabhalarida toʻlaqonli ishtirok etishi uchun ularning huquq va imkoniyatlarini kengaytirish, har bir insonning ijtimoiy himoyaga boʻlgan huquqlarini taʼminlash, xalqaro standart va meʼyorlar asosida sifatli xizmatlar koʻrsatish, sunʼiy intellekt sohasida tizimli hamkorlikni kuchaytirish masalalariga ham eʼtibor qaratdi.
“Biz Oʻzbekistonni ijtimoiy davlat, deb eʼlon qilib, aholining har tomonlama himoyasini taʼminlashni siyosatimizning ustuvor yoʻnalishi etib belgiladik. “Kambagʻallikdan farovonlik sari” dasturini amalga oshiryapmiz. Oxirgi sakkiz yilda 7 milliondan ziyod aholi kambagʻallikdan chiqarilib, uning darajasi 35 foizdan 8,9 foizga tushirildi. Joriy yilda bu koʻrsatkichni 6 foizga pasaytirishni maqsad qilganmiz.
Shu yil sentyabr oyida yurtimizda boʻlib oʻtadigan kambagʻallikni qisqartirishga bagʻishlangan xalqaro konferensiya ishida davlatlaringiz parlamentlari vakillarini faol ishtirok etish uchun taklif qilamiz”, — dedi Shavkat Mirziyoyev.
Baxtiyor Pulatov, Oliy Majlis Qonunchilik palatasi deputati
📱 telegram 📱instagram 🗳facebook
