​​#Бугуннинг_гапи

МАКТАБГА БОР

(Барча мактаб гуруҳларига етказиб қўямиз)

Дилга ташвиш солмай десанг,
Бирор чора олмай десанг,
Кўп ғавғога қолмай десанг,
Дарс қолдирмай мактабга бор!

Бошингга тош қуламасдан,
"Қирқ етти"ни қўлламасдан,
Ота - онанг тўламасдан,
Дарс қолдирмай мактабга бор!

Кўча - куйда ўйнамасдан,
Ёлғон сўзни сўйламасдан,
Устозларни қийнамасдан,
Дарс қолдирмай мактабга бор!

Мактаб сенга молхонамас,
Ахир, бежиз пирхонамас,
Репититор баҳонамас,
Дарс қолдирмай мактабга бор!

Кўп гапирмай, тилинг тия,
Мактаб бормоқ бурчим, дея,
Қўймас Миллий гвардия,
Дарс қолдирмай мактабга бор!

Ўз айбингни очиб кетма,
Сирларингни сочиб кетма,
Сўнгги соат қочиб кетма,
Дарс қолдирмай мактабга бор!

Ҳар кунингдан бир из сўрар,
Давоматдан фоиз сўрар,
Вазир, ҳоким, раис сўрар,
Дарс қолдирмай мактабга бор!

Сенга айтар шулдир сўзим,
Ёруғ қилгин менинг юзим,
Азиз ўғлим, жоним қизим,
Дарс қолдирмай мактабга бор!

Ўлмасбек Самарқандий.

@Samarqandiy77