#Қутлов
ТАБРИКУ жуда самимий, жуда ҳокисор,
Бироқ, ёзганлари ҳанжар йигит у!
Кўнглида устозга садоқати бор,
Исмига муносиб Санжар йигит, у!
У жуда меҳрибон, у жуда ҳалим,
Кўнгил очиқлиги кўзидан маълум,
Бироқ, ишқ бобида ҳислари лим-лим,
Ошиқликда мингни янчар йигит, у!
Гапирса, сўзлари бир дона-дона,
Юрса, қадамлари ўктам, мардона,
Гоҳида ташбеҳлар топиб дурдона,
Сўз бирла қоғозга санчар йигит, у!
Юзида ҳамиша табассум, кулгу,
Энг эзгу сўзига берилар урғу,
Ичида яширин биз билмас туйғу,
Ор учун жонидан кечар йигит, у!
Баъзан хиёнатдан кўзлари мунгли,
Гоҳи садоқатдан самолар тенгли,
Ўзидан азизроқ ўзгалар кўнгли,
Дўст деса, оғулар ичар йигит, у!
Улғайиб, ёшликнинг ёшидан ўтган,
Умрнинг ўнгиру - тошидан ўтган,
Билмассиз, не кунлар бошидан ўтган,
Аммо, умидларин қучар йигит, у!
Сўз топса, қоғозга санчар йигит, у,
Исмига муносиб Санжар йигит, у! Бугун қадрдон укам, шогирдим Санжарбек Сафаровнинг таваллуд айёми! Табриклайман укам, умрингиз узоқ, ҳаётингиз гўзал бўлсин!
Юксак эҳтиром ила:
Ўлмасбек Самарқандий.@Samarqandiy77