ДЎСТИЖОН

​​Эй дўстижон, тақдир жўрттага,
Йўлимизни бўлди, тўрттага,
Билмам не гап тушди ўртага,
Узоқлашиб кетдикми, дейман?!

Ҳолимизга ҳеч ҳамият йўқ,
Йўқламоққа сизда ният йўқ,
Аввалгидек самимият йўқ,
Узоқлашиб кетдикми, дейман?!

Аразлашдик, жангсиз, урушмай,
Туролмасдик, бир кун кўришмай,
Қолдими ё, ишлар юришмай,
Узоқлашиб кетдикми, дейман ?!

Синовларга сабр топилмас,
Оқибатга қабр топилмас,
Пул топилгай, қадр топилмас,
Узоқлашиб кетмайлик, дейман!

Содиқ эдим, борингизга, мен,
Жон тикардим орингизга, мен,
Дўст эмасдим молингизга мен,
Узоқлашиб кетдикми, дейман?!

Ўртамизда қайси бир маълун,
Ёқа йиртар англамай ҳолин,
Важ ноаниқ, сабаб номаълум,
Узоқлашиб кетдикми, дейман?!

Бир нафас йўл хиёнатгача,
Фосиқликдан – диёнатгача,
Сўз бергандик, қиёматгача,
Узоқлашиб кетдикми, дейман?!

Майли, дилдан кўчиринг мени,
Қатордан хам ўчиринг мени,
Аллоҳ учун кечиринг, мени,
Узоқлашиб кетмайлик, дўстим!

Ўлмасбек Самарқандий.
@Samarqandiy77