ЖАННАТДА КЎРИШАЙЛИК

Ёришиб қалб фазоси,
Раҳматга эришайлик.
Илоҳим, Ҳақ ризоси -
Жаннатда кўришайлик.

Ўн бешда ой тўлгандек,
Кўкламда сой тўлгандек,
Бу дунёда бўлгандек,
Жаннатда кўришайлик.

Мисли йўқ бахт конида,
Ҳайрат хиёбонида,
Ҳавзи Кавсар ёнида,
Жаннатда кўришайлик.

Солиҳларга энтикиб,
Севинч ёшларин тўкиб,
Жойнамозга тиз чўкиб,
Жаннатда кўришайлик.

Ҳеч ўхшаши йўқ бўстон,
Мўминга мукофот, шон,
Шубҳасиз мавжуд макон,
Жаннатда кўришайлик.

Дўст, ёр, волида, падар,
Бўлиб бир тан, жон қадар,
Сиз билан ҳам биродар,
Жаннатда кўришайлик.

Кўзлаб фароғат фаслин,
Излаб набийлар аслин,
Истаб Яратган васлин,
Жаннатда кўришайлик.

Ҳамид Насруллоев

Ota ~ Onasini Qadrlaganlar Kanali

@MEXRIBONIM_OTAM_ONAM 🌸