OYDINNISO

АҚЛИ ЭМАС, ҚАЛБИ ИШЛАЙДИГАН ОДАМЛАР

Қатар таассуротлари

Қатарликларнинг ақли ишламас экан. Хожатхона қуриб ҳам пул ишлаш мумкинлигини билмас экан улар. Ҳар қадамда чиннидай тоза, эркаклар, аёллар ва ногиронлар учун алоҳида бўлмалардан иборат хожатхоналар, болаларнинг таглигини алмаштириш учун алоҳида хоналар, таҳоратхона ва намозхоналарни қуриб ташлашгану, кирсангиз, биров бир сўм пул сўрамайди.
Қизиқ, Қатар давлати ўз халқини ишлатиб ёки лоақал, мамлакатда кун кўриб юрган чет элликларни ишлатиб, солиқ солиб бойишни ҳам билмаскан. Газ, сув, светларга лимит қўйиб, нархини ошириш тугул, буларни пуллаш мумкинлигига ҳам ақли етмаскан уларнинг. Ҳаммаси мутлақо бепул! Устига устак, халқ Давлатни эмас, Давлат халқни боқаркан. Бу халқ борлиги учун, шу ватанда яшаётгани учун улпон тўламаскан, аксинча, ватан унга ҳақ берар экан. Қатар амири ер ости бойликлари бўлмиш нефтдан тушган даромадни халқига тенг тақсимлаб бераркан. Ҳар бир чақалоқ туғилиши билан унга ер ва давлат томонидан катта пул ажратилиб, унинг номига банкда омонат очиб қўйилар экан.
Қатарда ҳам одамлар банкдан кредит оларкан. Аммо уларда "Қарзингни қайтар!" деб тепангда таёқ ўқталиб турадиган, мол-мулкингни тортиб оладиган МИБ деган ташкилот йўқ экан. Бир йилда икки марта - ҳайит байрамларида амир банкдан кредит олган одамларнинг барча қарзларидан кечиб, қарзларни Давлат томонидан қоплаб бераркан.
Қатарда ҳалигача аёлларни эркаклар боқаркан-ей! Бир ҳафта юриб, кўчада араб аёлларини деярли кўрмадик. Бозорда учратганимиз бир-иккитаси ҳам ёнида эри ва хизматкорлари билан бирга бозорлик қилиб юрибди.
Бир ҳафта юриб, кўчада бирорта полиция ходимини ҳам учратмадик. "Бу ерларда сира жиноят бўлмасмикан?" деган гумонга бордик. Ҳатто метроларида ҳам биров бировни текширмайди, подани қувган каби платформадан нари сурмайди, расмга, видеога олишни тақиқламайди. Метрода полиция тугул, ҳатто ҳайдовчи йўқ экан. Поездлар ўзини ўзи бошқариб кетавераркан. Одамлар ҳам ўз ҳолича мавжуд қоидаларга бўйсуниб, қўлидан келганича бир-бирига ёрдам бериб юраверар экан. Метрога кириш жойида иримига битта ходим турибди, пул олиш учун эмас, қонун-қоидани билмайдиган чет элликларга электрон аппаратдан карточкани олишда ёрдамлашиш учун.
Бу қатарликлар шаҳар автобуслари пулга юришини ҳам билмас экан! Метро бормайдиган ерларга текин автобусларда безрайиб кетавераркан. Ландовур шафёр ҳам сира планни бажариш, кўпроқ пул ишлаб қолиш пайида бўлмаскан.
Қатар тарихидан маълумот берувчи музейларнинг ҳам тўрттаси мутлақо бепул экан!
Кўчалари ёғ тушса ялагудай топ-тоза! Кўчада юрган оёқ кийимингиз билан бемалол уйнинг ичида, ҳатто ваннахонанинг хўл кафеллларида ҳам юриб кўришингиз мумкин. Гард юқмайди. Биз чангнинг йўқлигини денгизнинг борлиги билан боғлаб тургандик. Нам ерларда чанг кўтарилмайдида, деб ўйловдик. Аслида бундай эмаскан. Бомдод намози ўқилишидан олдин, яъни тунда фаррошлар Қатар кўчаларини худди биз уйимизнинг полини ювган каби ювиб, панжараларининг чангларини ҳам битталаб артиб чиқаркан. Одам деган тозалик учун ҳам шууунча меҳнат ёки харажат қиладими? Қатарликларнинг ақли ишламас экан!
Мабодо, "Қатарга кўчиб бориб, фуқаролигини олиб, имтиёзларидан фойдаланиб қолсаммикан", деб ақлини ишлатмоқчи бўлиб турганлар бўлса, шошилманг. Сизга ўхшаганлардан Қатарда 2,5 миллионтаси юрибди. Ҳа, Қатар аҳолисининг 85 фоизи четдан келганлар экан. "Фуқароликни фақат қизлар олиши мумкин, йигитлар учун қийин масала", деб тушунтиришди бизга у ердаги ўзбеклар. Агар қизлар араб йигитига турмушга чиқиб, бола туғиб, ўша боласи 14 ёшга кирса, ана ўшанда Қатар фуқароси бўлиши мумкин экан. Йигитлар эса араб қизларига уйлана олмайди. Биринчидан, араблар бошқа миллат вакилига қизларини бериб қўймайди. Иккинчидан, бизнинг йигитлар араб қизига қалин қилиб бериш учун унинг вазни баробар тиллани ишлаб топгунча сочи оқарган бўлади.

Шоҳруҳ Дарондан гўзал ҳиргойи!

Сўзни ҳис этганингиз учун раҳмат сизга, Шоҳруҳ!