Икром ИСКАНДАР шеърлари

QURAMATOV O‘LANI
Toshpo‘lat akaga

Hov, Qurama, aylanayin Qurama-ov,
O‘lan aytmay senda yashab bo‘lama-ov,
Tulporlaring, tulpor mingan shunqorlaring
Kuylamasam mening ko‘nglim to‘lama-ov.

Jilg‘alaring jildirashi jonga yoqar,
Soylaringda suvlar emas, sharbat oqar.
Jamolingni bir ko‘ray deb kunduz quyosh,
Oqshomlari oymomo ham to‘ymay boqar.

Bobolarim ot choptirgan dalalar-ey,
Momolardan meros qolgan allalar-ey.
Kelajakdan go‘zal doston aytib berar
Endigina tili chiqqan bolalar-ey.

Kiyik ko‘zli qizlaring ‒ oy parchalari,
Suluv ekan, go‘yo tovning archalari.
Sher bilakli o‘g‘lonlaring shahdin ko‘rdim,
Elim degan jo‘mard ekan barchalari.

O‘lanlarim buloqdayin qaynab yotar,
Kuyla deya do‘mbiramni qiynab yotar.
Yuragida olovi bor yosh-alanglar
Manov tovda o‘lan aytib o‘ynab yotar.

Hov, Qurama, aylanayin Qurama-ov,
O‘lan aytmay senda yashab bo‘lama-ov...

Ikrom ISKANDAR
------
ҚУРАМАТОВ ЎЛАНИ
Тошпўлат акага

Ҳов, Қурама, айланайин Қурама-ёв,
Ўлан айтмай сенда яшаб бўлама-ёв,
Тулпорларинг, тулпор минган шунқорларинг
Куйламасам менинг кўнглим тўлама-ёв.

Жилғаларинг жилдираши жонга ёқар,
Сойларингда сувлар эмас, шарбат оқар.
Жамолингни бир кўрай деб кундуз қуёш,
Оқшомлари оймомо ҳам тўймай боқар.

Боболарим от чоптирган далалар-эй,
Момолардан мерос қолган аллалар-эй.
Келажакдан гўзал достон айтиб берар
Эндигина тили чиққан болалар-эй.

Кийик кўзли қизларинг ‒ ой парчалари,
Сулув экан, гўё товнинг арчалари.
Шер билакли ўғлонларинг шаҳдин кўрдим,
Элим деган жўмард экан барчалари.

Ўланларим булоқдайин қайнаб ётар,
Куйла дея дўмбирамни қийнаб ётар.
Юрагида олови бор ёш-яланглар
Манов товда ўлан айтиб ўйнаб ётар.

Ҳов, Қурама, айланайин Қурама-ёв,
Ўлан айтмай сенда яшаб бўлама-ёв...

Икром ИСКАНДАР

•┈┈• ❀ 🇺🇿📚🇺🇿 ❀ •┈┈•
Kanalimizga a'zo bo‘ling va do‘stlaringizga ulashing. ⬇️⬇️⬇️
t.me/gayratmajidijodiykanali
•┈┈• ❀ 🇺🇿📚🇺🇿 ❀ •┈┈•