Bizga "haqiqat vazirligi" kerakmi?

"Blogerlar bilan shugʻullanadigan davlat idorasi, nodavlat idorami, kerak". Yozuvchi Xurshid Doʻstmuhammad.

Yozuvchining bu taklifi "1984"dagi "haqiqat vazirligi"ni eslatdi. Bu vazirlik nima bilan shugʻullanganini bilmasangiz - romanni oʻqib chiqishni tavsiya qilaman. Hurmatli yozuvchimiz romanni oʻqiganlarmi yoki yoʻq, bilmayman - lekin men uchun, masalan, "1984" va unga oʻxshagan antiutopiyalarni oʻqigan, oʻqish u yoqda tursin, antiutopiyada yashaganlardan hayotimizni antiutopiyaga aylantirish taklifi chiqishi juda gʻalati tuyuladi.

Umuman, qiziq, nega sovet davri odamlari (ayrim tadqiqotchilar "homo soveticus" degan terminni kiritishgan) hamma sohani, hamma narsani davlat (yoki kimdir) nazorat qilishi kerak va bu toʻgʻri, deb oʻylashaydi? Qanday yashashingiz, nimani yeb ichishingiz, hatto nimani oʻylashingizgacha nazorat qilinadigan ("yoʻnaltiriladigan") tuzumda yashagansizlar-ku, nahotki shu sizlarga yoqqan boʻlsa? Total nazoratga muhabbat sababini biladiganlar boʻlsa, tushuntiringlar - men tushunmayapman.