"Piskent hayoti" gazetasi rasmiy kanal

Машҳур ёлғонлар: Ўтирсангиз, ош пишаётган эди;
Ўртоқ командир, мен яшилда ўтдим;
Ҳозир миллионлаб томошабинлар бизни томоша қилишмоқда;
Аёлларнинг хунуги бўлмайди;
Эшик тагида 2 соат кутиб турдим, ҳеч ким очмади;
Сени ўйлаб, туни билан ухлай олмадим;
Сен мени ёшлик пайтимда кўрганингда;
Сени лайлаклар олиб келган;
Бу мен олган ҳадяларнинг энг яхшиси;
Ҳамма бир киши учун, бир киши ҳамма учун;
Мен ея олмайман, доктор тақиқлаган;
Ишимни битиргач, ўзим қўнғироқ қиламан;
Охиргисини сизга сотяпман, бундан бошқа қолмади.
Мен ҳам сенга энди телефон қилмоқчи бўлиб турган эдим.
Бизни таклиф қилишди, лекин биз бормадик.
Совқотаётган бўлсанг, костюмимни кийиб тура қол.
Аёлларга кал эркаклар ёқади;
Орқасидан гапирмаяпман, шу ерда бўлса, юзига ҳам айтардим;
Мен шундай бўлишини билар эдим;
Мен учун энг муҳими қалб гўзаллиги, юз гўзаллиги эмас;
Худди сиз учун тайёрлангандай. Сизга жуда ҳам ярашди;
Буни менга ҳам совға қилишган, бўлмаса сизга жон деб бериб юборар эдим;

@piskenthayoti

ЎГИРИЛМАНГ!

   "Сизлардан ҳеч ким ўгирилмасин!".
   Тугаган алоқаларга худди қабрларга қилинадиган муомалани қилинг. Қабрни қайта ковланмайди.
   Ортда қолганларни қўйинг, ортда тураверсин. Ўтмишнинг асири бўлманг. Сизни қайтишга мажбур қилмаслиги учун эшикни тўлиқ ёпинг.
   Сизни тугатадиган фойдасиз жангларга киришманг. Унга орқангизни ўгиринг.
   Қадрингизни пастлатадиган садақани қилиш сизга шарт эмас. Ажралишни ҳам ўрганинг.
   Муҳаббатингизни ўлдирадиган ўринлар сизни ўчириб сўндириб қўяди. У ерни тарк қилишга ўрганинг.

   Ёдингиздан чиқмасин, етишингиз шарт бўлган йўналишингиз бор. Орқага қарайверадиган киши манзилга етиши қийин бўлади!

@piskenthayoti

"ЯНГИ ЙИЛ...

Хотирамда қолиб кетар ўтмишлар,
Кун кетидан қараб қолар шўр кўнгил.
Юрак узра жаранг сочар миш-мишлар,
Сарҳисобни сўраб келса янги йил.
Ҳар тонгингда қадамингни бос дадил,
Мақсадларга эриштирсин янги йил.

Қор парчаси ёзда тушмас далага,
Ҳеч қайси куй тенг эмасдир аллага,
Шодликларни кўриб юрак қувнасин,
Хонадонлар тўлсин қувноқ болага.
Юраклар нурафшон беғубор софдил,
Орзуларга етиштирсин янги йил.

Йўл қарайди кимдир кутар онасин,
Қисматида кимда фарзанд ноласин.
Бефарзандни шу шеъримда ёд этай,
Ё Аллоҳим, бергин издош боласин.
Муродларинг бир кун беражак Оқил,
Армонларни рўё қилсин, янги йил.

Бир камлигин биламиз-ку дунёнинг,
Дарди борга берсин Тангрим давони.
Инсон номи оқибатли қалбларда,
Тинч кўрайлик замин узра самони.
Қут-барака, мурувватли, серҳосил,
Бахтиёрлик олиб келсин янги йил.

@piskenthayoti

#_шукуҳ

Пискент туманида Янги йил шукуҳи

Пискент тумани марказида жойлашган бош арча атрофида бўлиб ўтаётган Янги йил байрами тантаналари барчанинг диққат марказида. Қор қоплаган майдончани нурафшон ёритган арча, ҳар тарафга таралаётган шодон куй-қўшиқлар ва болажонларнинг қувончли қийқириқлари Янги йилнинг ўзига хос шукуҳини намоён этмоқда.

Туман Маданият бўлими томонидан ташкил этилган консерт дастурлари ҳар бир меҳмон учун унутилмас лаҳзаларни туҳфа этмоқда. Хонанда ва созандаларнинг қалбни тўлқинлантирувчи чиқишлари, қизиқарли бадиий саҳналар ва эртак қаҳрамонлари иштирокидаги томошалар катта-ю кичикка хуш кайфият улашмоқда.

Туманимизнинг барча фуқаролари байрам тантаналарига ташриф буюриб, оила аъзолари билан биргаликда ҳақиқий байрам шукуҳини ҳис қилишлари мумкин. Шодиёналарда иштирок этиш мутлақо бепул.

Таъкидлаш жоиз, туман марказида иккита катта арча ўрнатилган бўлиб, фуқаролар хоҳишига қараб ташриф буюришлари мумкин.

Байрамни биргаликда нишонлаш, Янги йилга янги ният ва орзулар билан қадам қўйиш – бу Пискент аҳолисининг жамоавий бирлигидан далолатдир. Келинг, ушбу байрам шукуҳи бизга фақат қувонч, шодлик ва муваффақият келтирсин!

Пискент туман ҳокимлиги матбуот хизмати.

@piskenthayoti

#_ФВБ огоҳлантиради

ПИРОТЕХНИКА ВОСИТАЛАРИДАН САҚЛАНИНГ

Ҳозирги кунда юртимизда янги йил байрамини кутиб олиш учун қизғин тайёргарлик ишлари бошлаб юборилган бўлиб, байрамни беталафот ва кўнгилдагидек ўтказиш учун ҳамиша бизни ташвишу хавотирга солиб келадиган пиротехника воситаларидан фойдаланишга барҳам беришимиз керак.
Байрамда турли хил кўнгилсизликларнинг содир бўлишининг олдини олиш мақсадида туман Фавқулодда вазиятлар бўлими ҳурматли фуқароларимизни огоҳлантиради.
Қадрли фуқаролар, сизларга мурожаатимиз шундан иборатки, ўзингиз ва болаларингизни пиротехника воситалари зараридан асранг, бир онли завқланиш учун ҳаётингиз ва соғлиғингизни гаровга қўйманг, турли хил “салют”, қўлбола портлатгичлар, порохли, кучли алангаланувчи моддалардан ўзингизни асранг ва уйингизда бундай воситаларнинг ишлатилишига асло йўл қўйманг.
Маълумот учун айтиб ўтишимиз жойизки, 2023 йилдан 2024 йилга ўтар кечаси пиротехника воситаларидан фойдаланиш натижасида туманимизда 4 нафар вояга етмаган бола, 9 нафар фуқаро турли хилдаги енгил ва оғир тан жароҳати олгани аниқланган.
Фуқаролар яшаш хонадонида бир вақтнинг ўзида эҳтиётсизлик сабаб тез алангаланувчи пиротехника воситаларидан фойдаланиш натижасида аҳоли яшаш хонадонларидан туман Фавқулодда вазиятлар бўлимига бир нечта хавотирли мурожаатлар келиб тушган.
Ҳурматли тумандошлар, ёнғин келтириб чиқариши мумкин бўлган ҳар қандай ҳолатга бефарқ бўлмайлик, мол мулкимиз ва оила азоларимиз, атроф-муҳитга зиён етказмайлик. Унутманг, бирор бир киши ёнғинни кўрса ва Фавқулодда вазиятлар бўлимига аниқ манзил ва мўлжалини берса ушбу фуқаро ёнғиннинг ўчирилишига ўз ҳиссасини қўшган бўлади.
Фавқулодда вазиятларда 101 ёки 1050 қисқа рақамига қўнғироқ қилиб, Фавқулодда вазиятлар вазирлиги тизимидаги доимий уяли ахборот воситаси орқали хабар беришингизни сўраймиз.

И.Ахмедов,
туман Фавқулодда вазиятлар бўлим ходими, оддий аскар.

@piskenthayoti

ТАЪЛИМ

Амр ибн Утба ўғлининг устозига шундай деди: «Боламни ислоҳ қилишнинг энг аввали ўзингни ислоҳ қилиш бўлсин. Чунки шогирдларингнинг кўзи сенинг кўзингга боғланган бўлади. Сен қилган ҳамма нарса уларнинг наздида яхши, сен қилмаган ҳамма нарса уларнинг наздида ёмондир. Уларга инсонийлик Китобини ўргат. Аммо мажбурламагин, ундан безиб қолишмасин. Лекин уларни ўз ҳолига ҳам ташлаб қўймагин, китобдан узоқлашиб қолишмасин. Уларни ҳадиси шарифлар, яхши шеърлар билан «суғориб», тўйдиргин. Бир илмни яхши ўрганмагунларича бошқасига ўтма, чунки қалбга (зеҳнга) кўп нарса кираверса, уларни фаҳмлаб олиш қийин бўлиб қолади. Уларга илмли ва солиҳ инсонларнинг турмуш тарзларини ўргат, ёмон фикрли одамлар билан
гаплашишдан қайтар. Мени юз-хотир қилиб ўтирма. Мен сенинг кифоя қилишингга ишонаман».

Ҳажжож болаларининг муаллимига шундай деган экан: «Уларга ёзишдан олдин сузишни ўргат, чунки одам ўзининг ўрнига ёзадиган одамни топиши мумкин, лекин ўзининг ўрнига сузадиган одамни топа олмайди».

"Солиҳлар гулшани" китобидан.

@piskenthayoti

Шавкат Мирзиёев

"Бугунги кунда матбуот иши, журналистлар фаолияти нафақат “тўртинчи ҳокимият”, балки мудофаа, хавфсизлик каби ҳал қилувчи соҳага айланиб бормоқда.

Бу эса мазкур йўналишда айнан сизлардек жасур ва довюрак, Ватанни чин дилдан севадиган, ўз касбига содиқ ва фидойи инсонлар тобора кўпроқ бўлишини тақозо этмоқда.

Ана шу талабдан келиб чиққан ҳолда, кўп қиррали профессионал билим ва малакага, юксак маънавий-интеллектуал фазилатларга эга бўлган замонавий журналист кадрлар тайёрлаш бундан буён ҳам устувор вазифамиз бўлиб қолади.

Шу билан бирга, ахборот майдонини сифатли ва рақобатдош миллий контент билан тўлдириш масаласи ҳар қачонгидан ҳам долзарб бўлиб бораётгани барчамиз учун аён ҳақиқатдир."
@piskenthayoti