🌙 Tahmid.Uz

САЖДАИ САҲВДА САЛОМ БЕРИШ
#намоз

❓1520-CАВОЛ: Саждаи саҳв қилиш учун салом беришда бир томонга салом бериладими ёки икки томонгами?

💬 ЖАВОБ: Бисмиллаҳир Роҳманир Роҳим. Ҳар иккиси ҳам тўғри. Яъни намозхон саждаи саҳв қилишда бир томонга салом берса ҳам, икки томонга салом берса ҳам тўғри иш қилган бўлади. Чунки фуқаҳоларимиз ҳар икки ҳолатни саҳиҳ — тўғри деб фатво беришган. Айрим фуқаҳолар ёлғиз намоз ўқиётган киши – икки томонга салом бериши, имом эса – бир томонга салом бериши яхшидир, деганлар. Чунки имом икки томонга салом берса, эргашувчиларнинг баъзиси намоз тугалланди деб ўйлаб намозга зид ҳатти-ҳаракат содир этиши мумкин, дейишган (“Дурарул ҳукком” китоби). Валлоҳу аълам.

#КЎНГИЛ ОЛИШ...

Суриялик олим Муҳаммад Хайр аш-Шиъолга Ҳайсам исмли бир тикувчи айтиб берган экан. Ҳикоя соҳиби шундай дейди:
“Менинг тикув корхонам бор эди. Қўшни аёллардан Умму Жамил исмли аёлнинг эри вафот қилиб қолди. Унинг учта етими бор эди. Бир куни у менинг корхонамга келиб деди:
-Менинг бир тикув машинам бор. Уни эрим ишлатар эди. Биз уни қандай ишлатишни билмаймиз. Мен эса етимларимни боқишим керак. Ўша машинамни сизга келтириб ижарага берсам. Ижара пули билан ўзимни ва етимларимни боқар эдим.
Мен қайтаришга ҳаё қилиб унга дедим:
-Майли келтирингчи.
Аёл тикув машинасини келтирди. Унинг машинаси жуда эски модел экан. Бу машина учун менинг корхонамда ҳеч бир иш йўқ эди. Аммо мен бу аёлнинг кўнглини синдиришни истамадим. Ундан ижарага қанча пул беришим лозимлигини сўрадим. У уч минг лира деди. Бу воқеа Сурия урушидан йигирма йиллар олдин бўлган эди. Мен тикув машинасини олиб қолдим ва унга уч минг лира бериб юбордим.
Машинани бир бурчакка қўйиб қўйдим. Ўн йиллар ўтди. Умму Жамил мендан ижара пулини олиб турди. Аммо тикув машинасидан умуман фойдаланмадим. Энди тикув корхонамни шаҳар четидаги бир бошқа бинога кўчирмоқчи бўлдим. Нарсаларни кўчираётиб ходимларимга: “Умму Жамилнинг машинасини ҳам олинглар!”, дедим. Цехни юритадиган аёл деди:
-Бизнинг Умму Жамилнинг машинасига эҳтиёжимиз йўқ. Кўчириб нима қиламиз?!
Мен:
-Кўчиринглар, тамом!-дедим.
Яна ўн йиллар ўтиб Сурияда уруш бошланди. Менинг корхонам жойлашган минтақа вайрон бўлди. Аммо менинг корхонам сақланиб қолди. Уруш сабабидан Умму Жамил билан алоқамиз узилиб қолди. Унинг манзилини ҳам топа олмадим. Унинг телефони ўчган эди.
Цехни юритадиган аёл мендан кетиб Европага борибди. Икки ойдан сўнг мен билан боғланиб бир туш кўрганини, уни менга айтиб беришини истаётганини айтди. Мен: “Гапир”, дедим. У шундай деди:
“Тушимга ғойибдан овоз эшитдим. У овоз шундай деди: “Умму Жамилнинг тикув машинаси баракотидан сизнинг корхонангизни сақлаб қолдик!”.
Тикувчи Ҳайсам доктор Шиъолга шундай деган экан:
“Ҳурматли доктор! Ишонсангиз, менинг корхонамдаги битта нина ҳам йўқолмади. Ваҳоланки, бу минтақадаги бирор бир жой зарарсиз қолмаган!”.

#Эҳтимол заиф бир қўшнингизга ёрдам беришингиз ёки қўшниларингиздан заифа бир бева аёлга моддий ёрдам беришингиз сизнинг саодатингизга, сиз ва оилангизнинг ҳимоя қилинишингизга сабаб бўлар.
#Расулуллоҳ саллоллоҳу алайҳи ва саллам айтадилар:
“Ёнидаги қўшнисининг очлигини билатуриб қорни тўқ ҳолда хотиржам ухлаган киши менга иймон келтирмабди!”.
#Яна айтадилар:
“Эй Абу Зарр! Агар шўрва пиширсанг сувини кўпроқ сол. Қўшниларингни йўқлагин!”.
#Қанча-қанча Умму Жамиллар кўчаларда саргардон. Уларнинг эҳтиёжини биров билмайди. Бунинг номи махфий садақадир. Бунинг номи кўнгил олишдир. Бунинг номи қийналганларга ёрдам беришдир.
#Ким Аллоҳни таниса яхшилик йўлларини ҳам билади. Осий инсон фақатгина ўзини билади. Буни “Насиба”, деманглар балки “Махфий қилинган яхшиликни фақатгина Аллоҳ билади”, денглар.
#Бир киши айтади: “Менда телефонни қувватлаб берадиган қурилма бор. Уни ким сўраса бераман. Етти йил бўлди. Мен сотиб олган барча қурилмалар бир-икки йил ишлаб сўнгра бузилади. Аммо у ҳали ҳам ишлаяпти”.

@Tahmid_uz

#БИР ОЯТ...

"Роббингиздан бўлган мағфиратга ва кенглиги осмонлару ерча бўлган, тақводорлар учун тайёрлаб қўйилган жаннатга шошилинг".

Оли Имрон сураси 133 оят.

#Шошилинг! Чунки ўлим кутиб ўтирмайди.
Эртага тавба қиламан...
Эртага намоз ўқишни бошлайман...
Эртага парҳезни бошлайман...
Эртага ....
#Эрта албатта келади, аммо биз ҳеч нарсани амалга оширмаган бўламиз. Орзуларимиз узунлиги сабабли ўлимни ўзимиздан узоқда деб ўйлаймиз.
#Интернетда анча олдин Али Банат исмли саратонга учраган бой йигитнинг ўлими аниқ бўлганидан сўнг бойликларини фақирларга тарқатиб бергани ҳақида хабарлар тарқалган эди. У нега бундай қилди?
#Чунки у ўлимни кўра олди. Ўлимга боғлана олди. Биз нега ундай қила олмаймиз? Чунки биз ўлимни кўра олмаймиз. Ўлим билан бизнинг орамизда парда бор. Узун орзулар бизни алдаб бораверади.
#Яқинда вафот этганлар ҳам ҳали ўлмаймиз деб ўйлашган эди. Аммо ўлишди.
Шошилинг! Чунки бир лаҳза кечикиш бутун умрли фойдани қўлдан чиқишига сабаб бўлиши мумкин.
#Сунабиҳий айтади:
"Ямандан Расулуллоҳ саллоллоҳу алайҳи ва саллам билан учрашиш мақсадида Мадинага келдик. У зотнинг вафот қилганларига атига беш кун бўлган экан".
Беш кунлик кечикиш уларни саҳобалик бахтидан маҳрум қилди. Шундай экан, шошилайлик. Кечикиш бизни кўп нарсадан маҳрум қилиши тайин!

@Tahmid_uz

#КАТТА САФАР...

Аҳнаф ибн Қайс роҳимаҳуллоҳ қартайиб қолгунича нафл рўза тутишни тўхтатмади. Бир куни бир киши унга деди:
- Ёшингиз бир жойга бориб қолди, рўза сизни толиқтирмайдими?!
Аҳнаф ибн Қайс деди:
- Агар билсанг мен катта сафарга ҳозирланаяпман!

Катта сафар...
#Тафаккур қилинг. Сизни қўрқитмоқчи эмасмиз. Аслида кимдир бизни охиратдан қўрқитса бизга омонлик истаётган бўлади. Тайёргарлик кўришимиз керак демоқчимиз.
Умримиз тугагач, Аллоҳ томон сафар қиламиз. Ана шу сафар учун кўп нарса керак бўлади. Дунё зод-роҳила тайёрлаш учун бизга бир имконият. Иш машаққатли кўринганида жаннат ила юпанинг...!

#Набий саллоллоҳу алайҳи ва саллам саҳобаларни жаннат ила юпатиб турар эдилар.
#Жаъфар розияллоҳу анҳунинг икки қўли кесилганида саҳобаларни Аллоҳ унинг қўллари эвазига жаннатда икки қанот бергани ила муждалаган эдилар.
#Саҳобалар форс подшоҳларининг ҳарир рўмолчасини кўриб ҳавас қилишганда Саъд ибн Муознинг жаннатдаги рўмолчаси ундан яхшироқ эканлигини айтиб юпатган эдилар.
#Бирор саҳобийнинг ёш боласи вафот қилиб қолса уларнинг боласини Иброҳим алайҳис салом билан Сора онамиз кафолатга олгани ила муждалар эдилар.
#Абдуллоҳ ибн Ҳаром розияллоҳу анҳу вафот қилганида унинг ўғли Жобир йиғлади. Ўшанда Набий саллоллоҳу алайҳи ва саллам унинг отаси Абдуллоҳни Аллоҳ тирилтириб бевосита гаплашганини, унга: "Бандам тила тилагингни!", деганини айтиб юпатган эдилар.
#Ёсирнинг оиласини мушриклар азоблаётганида уларнинг олдидан ўтиб: "Сабр қилинглар эй Ёсирнинг оиласи, учрашув жойимиз жаннат!", дея уларни юпатган эдилар.

#Ҳамма машаққатнинг юпанчи жаннатдир.
#Бу дунё аччиқми, ширинми бир куни ўтади. Намознинг машаққати, рўзанинг қийинчилиги тугайди. Ажр эса абадий қолади .
#Кечаси қоим бўлишнинг машаққати, масжидга боришнинг қийинчилиги куни келиб тугайди. Аммо савоб абадий қолади.
#Жаннатга кириш онларини ёдга олинг. Ана шунда бутун машаққатлар енгил бўлади!

#Яна бир нарса ёддан чиқмасин. Гуноҳнинг лаззати ҳам ўткинчи. Аммо жазоси сақлаб қўйилади!

#Тонгингиз хайрли бўлсин!

@Tahmid_uz

#МУСТАФО МАҲМУД ДУРДОНАСИ...

Мен қаридим деган фикрдан сақлан. Тананг фақатгина руҳинг қўйиладиган идишдир. Руҳнинг сочи оқармайди, у қаримайди. Руҳ бошқа оламдандир. У бизнинг оламимизга бирор жиҳатдан ўхшамайди. Унинг моҳиятини фақатгина Аллоҳ билади.
Аллоҳ таоло айтади:
"Сендан руҳ ҳақида сўрашади. Руҳ Роббимнинг ишидандир. Сизга озгина илм берилди, дегин".

#Сен руҳингни тананг деворлари ичида ҳибс қилишдан сақлан. Келажакка ишончла боқиш ҳамда орзулар самосида парвоз қил. Босадиган ҳар-бир қадамингда Аллоҳга ишон. Ҳаммага ёрдам бер, муҳаббат бер, ҳамма жойда яхшилик уруғини қада.
#Мўъмин учун роҳат Роббига йўлиққанидадир. Бизнинг кўпчилигимиз бу иборани нотўғри тушунамиз.
#Йўлиқиш ўлимдан кейин бўлиши шарт қилинмаган. Илм йўлиқишдир, зикр йўлиқишдир, тафаккур йўлиқишдир, намоз йўлиқишдир, садақа йўлиқишдир, кечаси қоим бўлиш йўлиқишдир, ота-онага яхшилик қилиш йўлиқишдир, қуръон ўқиш йўлиқишдир, силаи-раҳм йўлиқишдир, беморни зиёрат қилиш йўлиқишдир, инсонларга нисбатан одобли бўлиш йўлиқишдир, мусулмонларнинг ғамини аритиш йўлиқишдир...
#Йўлиқиш фурсатини англата олдикми?
Аллоҳ таоло айтади:
"Ким Роббига йўлиқишни истаса солиҳ амал қилсин, Роббининг ибодатида ҳеч кимни шерик қилмасин".

@Tahmid_uz