XazonRezgi (Official Channel)

#КЎНГИЛ_ИФОРИ

Эрингнинг танбеҳига Мастура опа жилмайиб жавоб қайтарди :

- Дадаси - ей , "додажон" деса нима бўлибди ? Келин янгалари "Қайнотангни шунақа деб чақиргин, ҳурматлироқ бўлади" деб тайинлашган шекилли . Қолаверса кўринишингиздан виқорли ва салобатли кўринасиз.
"Додажон" деса арзимабсизми ? Илоҳим кейинги йиллар набирали бўлиб , исми жисмига мос равишда ўктамгина "Додажон" бўлиб юриш насиб қилсин. Ҳилола ўзини дадасини "Адажон" деб чақираркан. Сизни янада бир поғона баландга чиқариб "Додажон" деб ўзича қайноталик ҳурматингизни жойига қўяётгандир- да ?! Шундаям сизга бунақа мурожаат қилиши ёқмаса , унда ҳозир келганда мени "фалон" деб чақиринг деб ўзингизга ёққанини айтарсиз.

- "Додажон" бўлсам додажондирман-де , шунчаки сени "ойижон" деб чақирганига мени анча қаритиб юборди деб ўйлабман-да,- деди Мирсаид ака дарров ён босиб .

- Дадаси-ей, бир нималарни ўйлаб топасиз-а? Ахир келин мени истаган тақдиридаям "Бувижон" деб чақиролмайди- ю? Мени набираларимиз шунақа деб чақиришлари мумкин холос. Аммо ўшандаям сиз "Додажон" бўлиб қолаверасиз . Балки "Буважон" бўларсиз ? ! Ҳоҳласангиз албатта.

- Ўша кунлар келаверсин-чи , ҳаётнинг ўзи кўрсатади барчасини , - деди Мирсаид ака аёлига ,- қани чойингдан қуй.

Ҳилоланинг янгалари бежизга Мирсаид акани бундай чақирувга муносиб деб топмаган эдилар. Сабаби у ўз ёшига нисбатан бироз катта кўринар эди. Аслида Мастура опа билан ўрталаридаги ёш чегарасининг ўзи тўққиз йил бўлган бу жуфтлик , кейинги йилларда кўриниши жиҳатдан ҳам анча фарқланиб қолган эдилар . Барига Мастура опанинг охирги йилларда боши касалдан чиқмай анча дардманд бўлиб қолганлигида эди. Мирсаид ака эр сифатида аёлининг касалига куйиб ўзини анча олдириб қўйганди.
У дастлабки уйланган кезлари аёлини суюб олмаган бўлса- да , онаси дараклаб топган қиз , эндиликда шу жуфти- ҳалолига нисбатан йилдан- йилга меҳри товланган , бирга умр кечиришган сари муҳаббат қўйган , худди ана ўша муҳаббати кундан - кунга зиёда бўлиб бораверган эди.

Мирсаид акаларнинг оиласида уч ўғил, бир қиз вояга етган эди. Унинг ягона опаси бўлмиш Маҳина опа барча келинлар ичида Мастура опани ўзгача яхши кўрарди. Ота - онасидан кейин Мастура опанинг яхшилиги сабаб , у айнан феъли анчагина торроқ ва тажанг бўлишига қарамай укаси Мирсаидга қаттиқ суяниб қолган эди. У доим бошқа келинларига Мастура опани мақтаб "Мастураой - эршунослик фанлари доктори" , мен умрим давомида рўзғор тутиш, эрга ҳизмат қилиш , "хўп бўлади" дейишда унга тенг келадиган аёлни учратмаганман. Кўпчилик зукко аёллар эрининг яримта гапидан унинг нима демоқчилигини билса , Мастураой укам хаёл қилганиданоқ, кўнглидаги ўқиб оладиган даражада салоҳиятли аёл . Мен уни заковотда кўпинча Амир Темур бобомизнинг аёллари Сароймулкхонимга ўхшатаман. Донолар айтиб ўтишгандек "Қўҳна Шарқнинг аёллари қўлларини кўксига қўйиб, бош эгишлари ортидан мудом ғолиб бўлганлар" деб .

Мен Мастураойнинг укамнинг бирор сўзига қарши чиққанини сираям кўрган эмасман. Унинг эрига айтадиган гапи доим "Сизники тўғри" . Аммо бир айланиб қарасам, ҳамиша Мастураойнинг айтгани- айтган , дегани деган бўлиб чиқар экан.

Бу нарсани нима деб номланади биласизларми ? - дерди Маҳина опа суҳбатдошларига ,- бу нарсанинг номи "Аёллик илми". Ана шунақа гаплар ..."

Шу каби Мастура опа ҳозир ҳам Мирсаид акани оғир -босиқлик билан ҳовридан тушириб қўйганди .
Ҳилола патнисга иссиққина қовурдоқ солинган ликобларни териб олиб кирганда Мирсаид ака аллақачон ўзини келини томонидан "Додажон" деб чақирилишига тайёрлаб улгурган эди...

* * *

Эртаси куни тонг сахардан уйғонган Мастура опа "Ҳилола уйғонгунча чой қўйиб турарман" деб ошхонага кирди. Бироқ чой қайнаб , дастурхон тузалди ҳам-ки, келин бўлмишдан дарак бўлмади. Мастура опа ахири ёшларни уйғотмаса ўқишга кеч қолишларига кўзи етиб, ҳовли бўйлаб юриб борганча уларнинг ётоқхона деразасини чертди :

- Сулаймон , Ҳилола ... Ўқишга кеч қоласизлар ҳозир ...

Ҳов турдингларми ?

Ичкаридан Сулаймоннинг "Ҳаа"деган уйқули овози эшитилди.

@Xazon_Rezgi. /32

#КЎНГИЛ_ИФОРИ

Шу куни пешин ва асрнинг оралиғи бўлган пайтда барча меҳмонлар тарқалишиб, ҳовлида қайнона - келиннинг ўзлари қолишди.

Мирсаид ака тушликдан сўнг қўл остидаги дўконлардан хабар олишга кетган, Сулаймон эса кўча бошидаги чойхонада улфатлари ташкиллаштирган ўтиришда эди.

Мастура опа савол назари билан "Нима иш қилай ? " деган каби жимгина қараб турган Ҳилолага ўзига яқинроқ келишга буюрди.

- Бери келинг... Қизим ... Бугун овқат қилмаймиз. Музлаткичда турли таомлар бор. Эрталабки қовурдоқдан ҳам бир товоқчада турибди.

Ўшаларни чиройли қилиб кечки соат олти яримга иситиб дастурхонга тортасиз. Унгача кўча ва ҳовлиларни бирров қараб қўйсангиз бўлди .

Айтганча , эртага эрталабдан Сулаймон икковингиз ўқишга кетасизлар- а ? Ўрганиб олгунингизча нонушта тайёрлашга қарашиб юборарман. Аммо айтиб қўяй. Сизга сахарлаб туриб сув сепишолмайман. Махалладаги аёллар гап қилиб юборишади. Лекин Сулаймонга қарашиб юборишини тайинлайман. Сиз ҳам уни шунга ўргатаверинг.

Бу ишлар ҳам бир ёмғир ёғиб ,совуқ тушгунча- да. Ундан кейин биров таъна ҳам қилмай қўяди. Демак , мени тушундингиз- а , болам ?!

Ҳилола қимтиниб "Ҳа" дея бош силкиди.

- Унда менга руҳсат . Номозларим ҳам йиғилиб қолди,- Мастура опа ўз хонасига йўл олди , ярим йўлга борганда нимадир ёдига тушиб ортига ўгирилди ,- Ҳилола, қорнингиз оч бўлса ёки кўнглингиз ниманидир тусаб қолса, ўша егуликдан беҳижолат олиб чой ичиб олаверинг. Уялиб ўтирманг . Ахир бўш қоп тик турмайди. Бўпти-ми, қизим ?!

Бу сафар Ҳилола овоз чиқариб жавоб берди:

- Хўп бўлади ... Хўп бўлади , ойижон...

* * *

Кечга яқин Мирсаид ака ласеттисини сигналини етти махаллага эшиттириб дарвоза тагида шовқин солиб тўхтатди .

- Кўзим илиниб қолибди , тўйнинг чарчоқлари энди билиняпти шекилли , - деди Мастура опа бошига рўмолини чала ярим ўраб югургилаб чиқаркан, ҳовлида куймаланишиб юрган Ҳилолага ,- газдаги човгум қайнаб турганмиди ?

- Йўў... Йўўўқ , ҳали чой қўйганим йўқ эди,- деди Ҳилола талмовсираниб , - ўзингиз кечки овқат олти яримда деганингиз учун ...

- Додангиз ишдан келишлари билан қайноқ чой тутиш одатим бор эди. Мен эшикни очгунча сиз бир чойнаккина чой қўйиб юборинг.
Кейин ҳовлига чиқиб уларни салом бериб кутиб олинг, хўпми ?

- Хўп бўлади ,- Ҳилола шундай деб ошхонага чопқиллади.

Мирсаид ака дарвоза очилавермагач , машина сигналини асабга тегадиган қилиб атайдан рулдан қўл узмай чала бошлади .

Мастура опа дарвозани очгач , Мирсаид ака уйда янги келин борми-йўқми демай ўшқириб берди :

- "Юки енгил эшак ётоғон бўлади" деганлари рост экан. Нега эшикни вақтида очмайсанлар ? Тинчликми , ё ...


- Кўзим илиниб қолибди - а, дадаси .

- Номозшомдаям ухлайдими , хотин ? Келин қани ?

Шу пайт Ҳилола бошига ҳаррир ёпинчиғини ёпганча ҳовли юзида кўриниш берди:

- Ассалому алайкум , додажон. Ишга яхши бориб келдингизми ?

- Ваалейкум ассалом,- деди Мирсаид ака бирдан шаҳтидан тушиб , - раҳмат , яхши бориб келдим ишга .

Мирсаид ака шундай деб ўз хонасига йўл олди . Кийимларини алиштириб кичик меҳмонхонага ўтар экан, янги келиннинг дастурхоннинг чиройли қилиб безатиб қўйганини кўриб авзойи янада очилди.

- Мастура , ҳов Мастура ,- дея чақирди у аёлини ва Мастура опа хонага кириб келгач дастурхонга ишора қилди, - менга қара , мана бўларкан- у оила бошлиғини чиройли кутиб олса.

Мастура опа эрига индамади, у Ҳилола дамлаб келган чойни қайтариб қуяр экан, эшик ортидаги келинига сўз қотди :

- Ўзингиз ҳам келинг , Ҳилола.

Ҳилола остонада аста бўй кўрсатди:

- Бирор нарса керакми ? Таомларни олиб келаверайми, додажон?

- Майли , олиб келаверинг, - деди Мирсаид ака ва Ҳилола ташқарига чиқиб кетгач , Мастура опага юзланди ,- менга қара , эй ! Нимага бу келининг мени "додажон" деб чолларни чақиргандек чақиряпти ? Нима кўзига шунчалик қари бўлиб кўриняпманми ? Ҳеч бўлмаса сал ёшроқ одамга муомала қилгандек "Адажон"ми , "Дадажон"ми ёки шунчаки жон қўшимчасини қўшмай оддийгина "дада" деб чақириб қўяверсин.

@Xazon_Rezgi /31

👆👆👆👆 аввалги қисмлар

#КЎНГИЛ_ИФОРИ

11- ҚИСМ

- Кўричак бўлиб қолмадимикан? Шифохонага олиб боришимиз керакмикан ?

Мастура опанинг куюнчаклик билан берган саволига Ҳилоланинг холаси Иқбол опа босиқ оҳангда жавоб қайтарди :

- Ўзининг айтишича , кеча кун бўйи ҳеч нарса емаган экан. "Бирор нарса еб олсанг бўлмасмиди ?" деб уришсам , "Холажон, томоғимдан ўтмаса нима қилай?!" деди. Хуллас , тўйхонада ҳам айтарли таом тотимабди. Бу ерга келгач , кўнгли тилаб бир бокал кола ичибди. Оч қоринга тушган ичимлик эса туни билан тобини қочириб қўйибди.

Мастура опа лабини тишлади. Бироз ўйланиб туриб аёлга деди :

- Ҳозир битта но-шпа таблеткасини бериб кўрайлик. Шакар чой билан нон едирсакмикан? Сизлар Ҳилоладан бохабар бўлиб турсанглар , мен озроқ илик шўрва соламан. Пишганда оз- оз сувидан ичирамиз . Худо ҳоҳласа яхши бўлиб қоладилар . Ошқозон озроқ қийналиб қолибди- да. Агар оғриқ босилмаса, унда шифохонага ўтиб келамиз...

- Барака топинг- ей, қуда хола. Келинингиз нақд ўтимни ёрди-я? Туни билан ота- онасига нима дейман деб юрак ҳовучлаб чиқибман- а ? -келин янганинг юзи зумда ёришди,- илоҳим Ҳилола хонадонингизга келин эмас, қиз бўлиб кириб келгани рост бўлсин .

Мастура опа унга жавобан "омин" дея жилмайган бўлди ва дори олиб чиқишини айтиб хонасига қайтди.

Чошгоҳга яқин Мастуба Ҳилоланинг яхши бўлиб қолганлиги хабарини айтиб опасининг кўнглини тинчлантирди.

Эртаси куни эса қуда тарафдан Ҳилоланинг опалари бир тоғора қовурдоқ , бир сумка патир ва яна аллақандай сарпо - суруқларни олиб йўқлаб келишди. Меҳмонларнинг иззати ўз ўрнига қўйиб кутиб олинди. Мастура опанинг ёнида қайинэгачиси Маҳина опа , опа -синглиси Зоҳида опа ва Мастубалар , шунингдек овсинлари ҳамда уларнинг қиз - келинлари ҳизматда шай бўлиб туриб беришди.

Келиннинг опачалари ва келин янгалари чиройли иззат , икром қилиб кутиб олингандан сўнг, кетар чоғларида Ҳилолани етаклаб чиқиб Мастура опага топширишди :

- Мана қуда хола , қизимиз, синглимиз - бугундан бошлаб сизнинг қизингиз . Билмаганларини ўргатиб, билганларини сайқаллаб юриш буёғига ўзингизга тан.

Орага Маҳина амма гап қўшди :

- Сизлар сира ҳавотир олманглар. Мастураой ёмонини яшириб , яхшисини оширадиган қайнона ойижон бўладилар , ин шаа Аллоҳ.

- Илойим , илойим ,- дея уни сўзларини қўллаб - қувватлаганча барча йиғилганлар дуога қўл очишди , Иқбол хола эса чиройли дуо ила уларни сўзларини давом эттирди , - илоҳи омин, келаси йил шу уйларда чақалоқ йиғилари эшитилсин. Бизларга ҳам "Алла , болам" лаб бешикларни олиб келиш насиби рўзи айласин . Амин... Аллоҳу акбар...

@Xazon_Rezgi /30

👆👆👆👆аввалги қисмлар

#КЎНГИЛ_ИФОРИ

10- ҚИСМ

Ҳамон хонадонида келин ва куёвнинг бошига тутилиши керак бўлган палакни қўйган жойидан топа олмай ҳуноби ошган Мастура опа эри тарафдан қилинган қўнғироққа йиғламоқдан бери бўлиб уланди :

- Алло...

- Эй , эсинг жойидами сен аёлнинг ? Шу пайтгача қаерда юрибсан ?

- Дадаси , келин-куёв тўйхонадан чиқиб уйга қайтар маҳал бошларига тутиладиган дуҳоба палак йўқ. Боягина ўзим назардан четда қолмасин деб ҳовлидаги ишкомнинг темирига илиб қўйгандим . Кийиниб чиққунимча йўқ бўлиб қолибди. Ярим соатдан бери қидирамиз,- Мастура опанинг диққати ошиб кетганидан овози бўғилиб қолгандек бўлди, - Икромжон, Гулруҳ, Мастубалар ҳам ҳамма ёқни тит - питини чиқариб ташлашди. ...

- Ҳе ўша палагингдан ўргилдим, тез бу ерга етиб кел. Қуда тараф аёлларини келганига қанча замон бўлди ?! Хуш келибсизлар дейдиган одам йўқ . Бу ёқда сенинг амма - ҳолаларинг ҳам бир тўп бўлиб туришибди . Уялганимдан ўзимни олиб қочиб юрибман.

- Дадаси , ҳовлиқманг. Ҳамма тўйда ҳам шунақа бўлади. Тўй кечки олтида бошланади- ю , ҳали ярим соат вақт бор.

- Сени келгунингча қанча вақт ўтади яна ? Бўл тез, ҳализамон келин - куёв ҳам келиб қолади. Она бўлиб кутиб олмасанг , бир умрлик армон бўлади. Келавергин-чи , сен айтган ўша палакни бир иложини шу ерда қилармиз, - деди Мирсаид ака аёлини тез келишга қистаб .

- Хўп , дадаси , биз аллақачон йўлга тушдик ...

Палакни Маҳина амма саранжомлик қилиб ўзи билан бирга олволган экан. Мастура опа келиши билан унинг кеч қолиш сабабини билгач , хандон отиб кулди :

- "Памить"им қурсин, келинпошша, палакни олганимни айтдим деб ўйлабман.

У опа жавобга лаб жуфтлаган эди ҳам-ки , ташқаридан карнай - сурнайнинг шодон "ғат-ғата-ғу"си эшитилди .

Мастура опанинг атрофида қариндош аёллар саф тортиб туриб олиди :

- Қудалар кириб келишяпти...

Қудалар билан кўришиб бўлишгач , ташқаридан "Келин-куёв ҳам тўйхонага келганмиш" деган хабар келди, аммо уларнинг асосий залга кириши нима учундир кечикди.

- Бунча қолиб кетишди булар ? -Маҳина амманинг диққати ошиб сўради.

- Ташқи залда муллакам келин - куёвни етаклаб ёши улуғларга салом қилдириб юрганмишлар ,- деди Мастура опанинг кичик овсини Покиза жилмайиб , - қайноталик тахтига эгаллашга киришдилар шекилли.

- Ундоқ бўлса майли , - укасининг қилиб юрган ишларига дарровда кўнақолди Маҳина амма, - бу кунларни қанча кутди-я барака топгур укам , ҳозир нима қилса ҳам ярашади унга.

Тўй шуниси билан қизиқ. Сулаймон Ҳилолани етаклаб Мастура опанинг ёнига келганда , келин янга Ҳилоланинг юзидаги тўрни хиёл кўтарди. Шунда тўйхонадаги йиғилганлар бирдан "ввоооҳҳҳ" деб юбордилар. Сабаби Ҳилола Мастура опага икки томчи сувдек жуда ўхшаб кетган эди.
Ҳилола Мастура опага яқинлашиб уч бор салом қилди.

Мастура опа уни "Кўп яшанг , қизим" дея қучоғига олганда барча бирдан қарсак чалиб юборди.
Мастура опанинг кўзларидан тинмай севинч ёшлари оқар эди.

Тўйда ҳаммадан ҳам университетнинг тўртинчи босқич физика факультети талабалари яйрашди. Айниқса куёвга жўра бўлган Раҳматилла ва Салим давранинг ўртасига тушиб чир айланиб ўйнайвериб , тўйга бошқача файз киритиб юбордилар.

Тўй эгалари югур- югур , чоп- чоп , сўрашиш - исташиш билан никоҳ базмининг қандай тугаб қолганлигини билмай ҳам қолдилар.

Ваниҳоят ёр - ёр садолари остида Сулаймон Ҳилолани ўз уйиларига бошлади.

Келин - куёвдан аввал етиб келган ёши улуғ мезбон аёллар уларни дуо-и фотиҳа ва турли туман сочқилар билан кутиб олдилар .

@Xazon_Rezgi. / 28

Баъзи сўзлар тиғли бўлади – тегса, ўлдиради.

Кекса ёшли киши институтнинг дарсхонасига кириб келди. Талабалар уни ўқитувчи деб ўйлашди. Лекин у талабалар қатори партадан жой олди. Дарс тугагач кекса киши савол назри билан қараган талабаларга юзланиб, шундай деди: Мен ишлик одамман – оёқ кийим сотаман. Еттита фарзандим бор. Бир ўғлим табиб, бири муҳандис, бири зобит, қизим эса дорихонада ишлайди. Бир куни болаларим илмий бир мавзуда суҳбатлашиб ўтиришган эди, мен ҳам уларнинг суҳбатига аралашдим. Шунда ўғилларимдан бири менга шундай деди: «Дада, гапга аралашманг, биз илмий мавзуда гаплашяпмиз, буни сиз тушунмайсиз. Ҳафа бўлманг-а!» Бу гап ич-этимни узиб юборди, лекин индамадим. Эртаси куни тўғри кутубхонага бориб, 9-синф китобларини сотиб олдим, ҳеч кимга билдирмай дўканимда ҳаммасини ўқиб чиқдим ва мактаб имтиҳонида қатнашиб, ҳаммасидан ўтдим. Буни ҳам ҳеч ким билмади. Кейин эса бакалврликка оид китобларни сотиб олдим. Уларни ҳам уч йилда ўқиб тугатдим ва имтиҳон топшириб, ҳаммасидан муваффақиятли ўтдим. Буни ҳам оиламда ҳеч ким билмади. Бугун эса институга қабул қилиндим. Иншааллоҳ, шу ерни битирсам, фарзандларимни чақираманда, уларга: «Болажонларим, мана бу дипломим. Энди сизларни тарбиялаган, ўқитган ва уйли-жойли қилган отангиз гапингизга аралашса майлими?», дейман!

@xazon_rezgi

#КЎНГИЛ_ИФОРИ

- Яхши , - деди Мирсобит ака қўлини дуога жуфтлай туриб , - қани тез отланақол бўлмаса. Ҳозир қудангникига кириб , ош масаласини келишиб оламиз, кейин айтганингдек, тўйхона- ресторанларни айланамиз. Хуллас , бугунга етарли бир дунё ишимиз бор экан, - у шундай деб ихчам ва чиройли дуо қилди ,- илоҳи омин , Аллоҳ файзимизни берсин. Аллоҳу акбар !

* * *

Душанба куни иккинчи пара тугагач , Сулаймон гуруҳдошларига эълон қилди :

- Тушликка ҳеч ким , ҳеч қаерга кетиб қолмасин ! Ошхонада сизларни ўзим меҳмон қиламан .

Барча йигит- қизлар унга дув ўгирилди .

Сулаймон уларнинг савол аломати балққан юзларига қараб тагдор жилмайди :

- Ўтган куни фотиҳам бўлди . Бирдан тўйга айтиш ноқулай , шунга олдин кичикроқ бўлса-да , бир меҳмон қилай. Сизлар ошхонага ўтиб , стол- стулларни жойлаштириб , чой ва пиёла олиб тураверинглар , мен ҳозир машинадан пакет ва қутиларни олиб келаман, - у шундай деб Раҳматиллага юзланди ,- юр оғайни кўтаришиб юбор.

Яхши хабар яхши-да. Аудиория бирдан қий- чув бўлиб кетди . Барча Сулаймонни эшикдан чиқармай бағрига босиб табриклай кетди , ҳатто баъзилар "Шу пайтгача индамадинг- а , ҳа писмиқ" дея елкасига енгил шапатилаб қўйишган бўлишди.

Сулаймон ташқарига чиқиб кетгач, йигитлар қизларга йўл беришди :

- Марҳамат , маликалардан бўлсин...

Фақат Раҳматиллагина йўлда Сулаймонга кўнглидагини айта олди :

- Менга қара , вей. Жуда ғалати бўлди-ку. Группамизнинг ярмидан кўпи сени Ҳилолани севсанг керак деб ўйлардик. Назаримизда у ҳам сенга бефарқ эмасдек туюларди . Сулаймон, бу ёғи неча пулдан тушди энди, оғайни ?

- Нимаси неча пулдан тушиши керак?- Сулаймон спаркини очиб ичидаги қутиларни Раҳматиллага узатар экан, -тўғри мен Ҳилолага оғиз солдим . У яқинда ўзининг ҳам унаштирилишини , отаси синглиси билан қуда бўлаётганлигини айтди. Ҳилола аммасининг ўғлига турмушга чиқаётганмиш.

- Эссизгина , икковинглар бир- бирингизга жуда муносиб жуфт бўлардингиз- да . Эҳ, афсус, афсус ,- Раҳматилла бошини чайқаганча олдинга тушиб кета бошлади.

Сулаймон ошхонага киргач , гуруҳдошлари учта столни бирлаштириб чой дамлатганча ўзларини кутиб турганлигига гувоҳ бўлди.

- Демак, ҳамма шу ердами ? - сўради Сулаймон қўлидагиларни столнинг бир четига қўяр экан,- бизга ликобча ҳам керак экан.

- Ҳилола билан Барно йўқ , - деди Нозима , - ҳозир келамиз деб бирдан йўқ бўлиб қолишди.

- Ҳозир келамиз дедикми , мана келдик, - орт тарафдан Барнонинг шодон овози янгради ,- дан- дан- даран! Группадошлар, бизда ҳам зўр янгилик ! Ҳилолани ҳам турмушга бераяпмиз.
Ҳилола ўзи келтирган пакетини бир йўла эрталабдан ошхонада қолдирган эди. Ҳозир сирдоши Барно билан егуликларни ичкаридан , таниш ошпаз аёлга миннатдорчилик билдирганча олиб чиққан эди.

Барнонинг эълонидан бутун гуруҳ энди Ҳилола тарафга ўгирилди :

- Нима ? Йўғ-ей ? Қачон ? - саволлар орасида кимнингдир саволи ўзгачароқ янгради ,- кимга ?

- Кимга бўларди ?! Яхши бир келишган йигитга- да! Қизиқ саволларни берасан - а , Салим?
Барнонинг сўзлари нима учундир Салимга қаттиқ ботди :

- Ҳа нима сўраб ҳам бўлмайдими? Ё сўраш жиноятми ? - деди у хафа бўлганини яшириб ўтирмай , - проста , Сулаймон иккаласи бир кунда патир , ҳолва - магиз олиб келишганига хаёлимга ...

Бирдан орага жимлик тушди . Ҳилола ўзи олиб келган "тугуни"дан кичкинагина халтача чиқариб , уни тутганча Салимга яқинлашди :

- Сўраш ҳечам жиноят эмас , - деди у Салимга кулимсираб ,- бу ерда куёв боланинг исми ёзилган .

Салим мўъжазгина патирча билан бирга ширинликлар солинган халтачани олиб, уни боғичига қистирилган ёзувни пичирлаб ўқиди . Сўнг кўзларига яқинлаштириб қайта ўқиди :

- Ўйлаганим ростми ? Хато ўйламаяпманми ? - деди у Ҳилолага кўзларини катта - катта очиб тикилганча .

Ҳилола кулимсираб бош силкиди :

- Ҳаа ! Мутлақо рост...

@Xazon_Rezgi /26

👆👆👆👆 аввалги қисмлар

#КЎНГИЛ_ИФОРИ

9- ҚИСМ

қиз томонда бериладиган ошга элликтача одам олиб боришинг керакмиш. Аммо ўзинг яхши биласан- ки , бунинг сира иложи йўқ. Мана ўзинг гувоҳ, ўғлим Камолиддиннинг тўйида келинникига ошга бориш учун айтилган битта автобус лиқ тўлиб , ярим махалла одам кўчада қолиб кетганди. Яхшиям автопарк директори Муҳсин танишим . Эркалигимни кўтариб яна битта қўшимча автобус ажратиб бермаганида шармандаликни зўрини кўрар эдик- да. Яна неча одам ўзининг енгил машинасида борганини айт.

- Ака , ўшанда бирам уятли иш бўлган эди- а ? Борганларга ош етиб-етмаганди. Тавба одамларга нима бўляпти, ҳайронман? Махаллангиздагиларни айтаман- да . Ошга айтса , битта хонадондан учта - тўртталаб чиққанлар ҳам бор-а ?

- Ҳа энди уларнинг эшиги бир бўлгани билан рўзғори бўлак-да...
Ўзи- чи қийин-қийин тўй қилганга қийин экан. Тўйингга бировни ҳоҳлаб айтсанг, яна бошқаси йўлингни кесиб чиқиб ўзини-ўзи айттирар экан. Ундан кейин Аллоҳга шукр , ўзимизга етарли обрўйимиз бор экан- ки , ҳурматимизни ўрнига қўйиш учун ҳам ташриф буюрадиганлар қанча ? Умуман айтганда ҳозирги тўкинчилик замонида ошга қорин тўйдириш илинжида борилмайди. Юқорида айтганимдек дўст , жигар , қариндош - уруғ олдидаги қарзни узиш , унинг шодиёнасига шерик бўлиш учун ҳам борилади.

Энди ука , ўзингдан қиёс. Пешонангда битта шу умри узоқ бўлгур Сулаймонинг бор. Шу сабаб тўйингга айтилмай қолиб кетганлардан менга ўхшаб "Кейинги ўғлимни тўйида албатта айтаман" деб қутила олмайсан.
Тўй дегани жудаям гиналик маросим бўлар экан- да . Ундан кейин шу ёшга киргунча ўзинг ҳам қанчадан - қанча ошга боргандирсан.

- Буни тушундим- ку , ака, лекин... - Мирсаид ака гапини давомини айтамай олмай тили тутилди.

- Нима лекин ? Нимага чайналаяпсан? - Мирсобит ака укасига саволомуз тикилди

- Ака , мен қайси бет билан бўлажак қудага "Сиз тарафда бериладиган ош учун элликта эмас, балки икки юзтадан ошиқ одам олиб бораман" дея оламан?! У ҳам минг профессор бўлгани билан , ойликка кун кечирадиган ҳалол одамлигини ўзингиз ҳам кўрдингиз- у ... Бизни келингача икки йилда иккита қиз чиқарган экан. Камига бу йил тўй қилиш нияти бўлмаган қизини "Бизга узатсанг ҳам узатасан, узатмасанг ҳам узатасан" деб иккита оёғимизни бир этикка тиқиб тихирлик қилиб фотиҳа қилдирган бўлсак...

Бошим қотиб қолди , ака ... Ёмон бошим қотиб қолди .

Мирсобит ака укасининг сўзларини бўлмай, гапиришига қўйиб берди . Сўнгра унга қатъият билан нигоҳ ташлади :

- Ука ,келишимнинг сабаби ҳам шу эди, яъни сенга шу тўғрида бир маслаҳат бермоқчи эдим.

Мирсаид ака жонланди :

- Эшитаман, ака. Гапираверинг қани ...

Мирсобит ака дона - дона қилиб гапира бошлади:

- Мен ўйлаб , ўйлаб бир қарорга келдим. Сен қудангга телефон қилибми ёки юзма - юз учрашибми бир маслаҳат соласан. Хуллас, унга барчасини кўнглига тегмайдиган қилиб ётиғи билан тушунтирасан. Айтасан-ки, "Мен ўғлимни уйлантирсам юртга ош бераман" деб ният қилгандим. Қолаверса, юртдан қарзим кўп . Тўй қилишимни пойлаган қариндош- уруғ, ёр- биродар , ошна- оғайниларим ҳам сероб . Шу сабаб иккимиз бир бўлиб бир ресторанни кун бўйига ижарага олсак. Эрталабки ошни баҳамжиҳат ўтказсак, сиз ҳам , мен ҳам бир - биримиздан тортинмай ўз меҳмонларимизни беҳижолат кутиб олаверар эдик Сўнг ортиб қолган маҳсулотлар билан кечки никоҳ оқшомини ҳам ўтказиб олар эдик . Шу фикрга қандоқ қарайсиз ? " дейсан. Қуданг жуда ўқимишли одам, вазиятга тўғри баҳо беради.

- Акаа ... Шу гапларни қудага ўзингиз гапирсангиз-чи ? Мен сиздака топиб - топиб , кифтини келтириб гапира олмайман- да ! - Мирсаид ака акасига ўтинчли боқди .

- Майли , - акаси тезда кўнақолди , - бироқ бу ҳолда уларникига яна бир қайта боришга тўғри келади. Мени телефонда гаплашишим одобдан эмас. Қудангга катта кетган, менсимаган бўлиб кўриниб қоламан. Сени йўлинг бошқа эди- да телефонда гапириш учун.

- Хўп ака , сиз нима десангиз шу . Аммо бу ишни тез ҳал қилиб олишимиз керак . Чунки ҳали тўйхоналарни айланишимиз ва бўш кунини топиб жой буюртма қилишимиз керак бўлади.

@Xazon_Rezgi /25