Oilamizdan stipendiya: “Koʻmak”Yaqinda feysbukda kichik bir orzum amalga oshdi deya yozib, muhr rasmini qoʻygandim.
Koʻpchilik muhrga qarab yangi ish boshladingizmi, biror media ochdingizmi deb soʻradi (nasib qilsa bularni ham qilarman), ulardan kattaroq ish qildim deya javob berganimga qiziqishlar yanada oshdi.
Gap shundagi haqiqatan anchadan beri oʻylagan ishimni rasman bugun boshladik. Ehhe, qancha kutdim bu kunni. Xullas, oʻzim oʻqigan maktabda oʻquvchilar uchun stipendiya joriy qildik. U haqida qisqacha maʼlumot berib oʻtsam: stipendiya 2 yoʻnalishda beriladi. Birinchisi, fanlardan eng yaxshi oʻqigan oʻquvchilar orasidan tanlanadi, gʻolib har oyda har xil fanlardan maxsus imtihon asosida tanlanadi.
Ikkinchi yoʻnalish, ehtiyojmand, kam taʼminlangan, oilaviy sharoiti ogʻir oʻquvchilarning har oylik qoʻshimcha darslari puli toʻlab beriladi. Bugun 1-yoʻnalish boʻyicha 6 nafar, 2-yoʻnalishda 5 oʻquvchi. Jami 11 nafar oʻquvchiga stipendiya berdik.
Dadam xotirasi uchun qilgan stipendiyamizni “Koʻmak” deb nomladim. Bilasizlar, bu jadidlar asos solgan, turkistonlik yoshlarning xorijda ilgʻor bilimlarni oʻqib kelishi uchun tashkil etilgan jamgʻarma nomi. Shu yerda kichik eslatma: Men oʻzim tashkil qilgan kichik bir stipendiyani bunday nomlab jadidlikka daʼvo qilmoqchi emasman. Shunchaki ular boshlagan gʻoya, harakatlar kichik koʻrinishda boʻlsa-da davom etishini istadim.
Stipendiyani yil boshidan boshlamoqchi edim, lekin 1-2 oy sal yigʻinib, hech qursa 6 oy, 1 yillik xarajatlarni kafolatlagandimdan keyin boshlash yanada toʻgʻri deb oʻyladim. Chunki moliyalashtirishga faqat oʻz mablagʻlarimdan sarflashni reja qilganman. Kelasi yil sentyabrni kutishga esa sabrim chidamadi. Erinmasdan maxsus logo qildirdim, muhr yasatdim, sertifikatlar chiqardim, pullarni konvertlarga taxladim. Anchadan beri bunaqa hayajonlanmagandim.
Bugun maktab jamoasi, oʻqituvchilar bu yangilikni oʻquvchilar, ota-onalar qanday qiziqish bilan kutib olgani, kelasi oydagi imtihon uchun tayyorgarliklar esa allaqachon boshlangani, hozirdanoq uyimizga rahmat aytib kelmoqchi boʻlganlar soni oshayotgani, dadam haqqiga qilingan duolarni koʻrib yuragim boshqacha boʻldi. Ishonaman, agar butun umrini farzandlarini oʻqitish, oyoqqa qoʻyishga sarflagan dadam tirik boʻlganida bu ishimni qoʻllab-quvvatlardi. Dadamning nomi har doim yaxshi ishlar bilan bogʻlanishini istayman.
Men doim taʼlim homiysi boʻlgan boy odamlarga havas qilganman. Hayotimizdagi oxirgi voqealar, ayriliqlar hayotiy qarashlarimga anchayin taʼsir qildi. Yaxshilik qilish uchun vaziyat, homiylik qilish uchun boy boʻlishni kutish kerak emas ekan. Hozir imkoningiz boricha yordam, yaxshiliklar qilavering, erta qanday boʻlishini bilmaysiz.
Bu kichik tashabbus menga taʼlim bergan maktab, hayotda taʼlim olishimda yordamini ayamagan yaxshi insonlarga hurmat belgisi, ular oldidagi burch. Ular haqidayam biror kun yozarman.
Rasmda 1-yoʻnalish gʻoliblari, ota-onalari. 2-yoʻnalishdagilarning rasmi shart emas nazarimda.
Inobat Bekmirza qizi
@pozitsiya
