Tirik obunachilar jalb qilinsa - bu ham nakrutkami?
Biz dunyodan ayrim bilimlarda orqadamiz. Bu normal holat, chunki rivojlanyapmiz.
Infoqalloblar, motivatorlar,
nakrutkachilar,
savodxonlik, giveaway kabi o'griqlardan o'tayotganimiz, bu boradagi bahslar, tinimsiz tushuntiruvlar rivojlanib borayotganimizning misolidir.
Yuqoridagi post masalasida ayrim mulohazalar bildirildi. Masalan, ma’lum pul evaziga reklamasiz tirik obunachilarni jalb etish taklifi. Yoki “bu nakrutka emas, nakrutka botlarni jalb qilish bo'ladi” va boshqa fikrlar ayni postga sbab bo'ldi.
Chunki obunachilarning hammasi tirik foydalanuvchi ekanligi, nakrutka qilinganlik faktini bekor qilmaydi.
Nakrutka o'zi nima? Bu ma'lum to'lov evaziga, reklamasiz, sifatli materialsiz, kontent ustida ishlamay turib, o'z sahifasiga obunachilarni jalb etish. Muhim izoh, nakrutka qilingan kanalning kontenti sifatli bo'lsa - bu ham nakrutka faktini bekor qilmaydi. Aytilmoqchi bo'lgan narsa - nakrutka yuqoridagi ishlarni bajarmasdan turib ham, quruq pul evaziga obunachilarni xarid qilish.
Huddi ischetchik(hisoblagich)ni aylantirganda, raqamlar birdaniga o'zgarib qolganiga o'xshagani uchun - bu uslub nakrutka (aylantirish) deb ataladi.
Nakrutkaning turli xil, juda ko'plab usullari bor.
Rossiyada to'laqonli saytlar, firmalar, xizmatlar, "mutaxassislar" bor - sahifangizni nakrutka qilib beradigan. Saytga kirib, o'zingizga kerak tarifni tanlaysiz, to'lov o'tkazasiz. Ish bitdi. Pulingizga qarab, istasangiz botlarni, xohlang tirik foydalanuvchilarni, xoh Rossiyalik, xoh Amerikaliklarni jalb qilib berishadi. (skrinshotda misol keltirilgan)
Bu uslublar endi-endi O'zbekistonga kirib kelyapti. Bizda faqat botlarni nakrutka deb tushunib qolishgan. Tirik obunachilarchi?
"Tirik" obunachilarni nakrutka qilish - huddi Instagramdagi Giveaway'ga o'xshaydi.
Giveaway ham sizga tirik obunachilarni olib keladi. Ammo hech kimga foyda keltirmaydigan, noaktiv, sizdan yangi post kutmaydigan "tirik" obunachilar. Odamlar Giveaway zararli ekanini zo'rg'a tushunib yetyapti, shunda ham oxirigacha emas. Bu bilan Instagramning o'zi ham kurashib kelmoqda.Giveaway etik va professional nuqtai nazardan qanchalik yomon bo’lsa, telegramdagi “haqiqiy obunachilar” nakrutkasi ham shunchalik yomon.
Yana qanday yo'llari bor?
Ya'ni sodda xalqimiz "katta tajribali SMMchi, marketolog, mutaxassislar"dan yana nimalarni kutishi mumkin?
- Giveaway (buni aytdik)
- Bepul xizmatlarni taqdim etuvchi botlar orqali obunachilarni jalb qilish
- Botlarni sotib olish
- Obunachilar birjasidan obunachilarni xarid qilish
- Boshqa bir kanalni sotib olish
- Liketaym o'yinlarini o'tkazish
- Massfolloving, masslayking
Va boshqa biz bilmagan, ammo pul evaziga istalganicha innovatsiyalar o'ylab topadiganlar tomonidan ishlab chiqiluvchi uslublar.
Agar bu yo'llar bilan obunachi jalb qilish haqqoniy bo'lsa, unda istalgan kanalga istalgancha o'zimizning qora ko'zlarni obuna qildirish yo'li ochiladi.
Natijada, agar obunachilar soni "kanalning sifati, kontentni, qiziqarligi" tufayli emas, balki "tanlangan tarif"ga bog'liq bo'lsa, ularni bittada xarid qilish mumkin bo'lsa - unda kanal yuritishdan hech qanday mazmuni qolmaydi. Obunachilar esa "soqqa ishlash" yo'lidagi bir vosita bo'ladi xolos. Bunday majburan, yoki biron moddiy manfaat yoki bepul xizmatli bot orqali kelgan obunachilardan manfaat yo’q. Nakrutkalar foydalanuvchi va reklama berish istagidagi brendlar ko’zini aldaydi xolos.
Men bunday kanalning obunachisi bo'lish, u bilan ishlash, aloqador bo'lish, yurgazishni qabul qilolmasdim. Hozircha shu. Oxirigacha o'qigan bo'lsangiz, tashakkur. Kamchilik ko'rsangiz bizni o'nglang. Fikrlarga ochiqmiz.
Marketing o'zbek tilida —
@marketingbolimi
