#toʻrtyuzsaksontoʻqqizinchikun(122²)
natyurmort
U…
Suratlardagidek baxtli yashaydi,
Sevolsa ham sevolmasa ham .

U butkul begona men va xayolga,
Balki oʻziga ham tuyilar shundoq.
Yuzidagi xoli oʻxshar dunyoga.

Men uning xoliga oshufta edim,
Hozir-chi, bilmayman xolining holin.
Husni koʻzlarimdan xoʻb qarzdor edi.

Vaqt bilan oʻynardi sochi hilpirab,
Mana hozirgina birov bilmadi,
Sogʻinchim soʻkilib ketdi ilvirab.

Bilaman, hech qachon chiqmas yoʻlimdan,
Tushda uni koʻrdim, bir Xudo bildi
Vaslining jiyagi qoldi qoʻlimda.

Bir parcha jiyagi… umrimga maʼvo,
Men uni ongimga tikib ham qoʻydim,
Endi chevarlikka qilaman daʼvo.

Tamom , tilim bilan ochdim orani,
Yoronlar koʻzimga ignani torting,
Koʻnglimga kiydiring angishvonani.

Toki tush koʻrmoqni istamam chogʻi,
Eng yovuz izhorga ketay burkanib,
Soyaning hajridan bitsin qulogʻim.

Men-ku bir beburdman, lekin u… lek U
Oyning qizalogʻi, juda ham erka,
Qaysarlik qaʼriga qilar takalluf.

Aning goʻzalligi bilmaydi adoq,
Faxsh botgan dunyoni surib, U haqda,
Oʻylamasam yashayman qandoq?

Oʻylasa ham oʻylamasa ham.
Lablari bir mudom… juda qirmizi
Boʻyasa ham boʻyamasa ham.

PyD