🕊Choliqushi kundaligi

4/30✨

"Ramazon – bu nafaqat taomdan tiyilish, balki yomon so‘zlardan, yomon niyatlardan va yomon ishlardan tiyilish oyidir. Bu – qalbning nur bilan to‘lishi va ruhning poklanish davri."

Aziz buvim va buvamga bag‘ishlov☘

Men kimman? Men sizning mehringizda ulg‘aygan, taftingizda katta bo‘lgan nabirangizman. Hayotimning ilk xotiralari—sizu biz birga o'tkazgan onlardan iborat. Qo'lingizdan tutib bog'chaga chiqqanim, ertaklaringizni eshitib uyquga ketganim, iliq bag‘ringizga bosh qo‘yib, yuragingiz urishini tinglaganim—bularning barchasi mening bolaligimning eng qadrli xazinasidir.

Sizlar mening bolaligimning eng yorqin yulduzlarisiz. Xotiralarimning har burchagida, yuragimning eng nozik joylarida sizlarning mehringiz bor. Sizlar menga nafaqat mehr berdingiz, balki hayotni tushunishni, odamiylikni, sabrni, mehnatni va halollikni o‘rgatdingiz.

Buvijonim, sizning duolaringiz har doim yonimda. Siz mehringiz bilan meni quchoqlaganingizda, eng katta boylik muhabbat ekanini tushunardim. Ertalab maktabga ketishdan oldin nonushtaga pishirgan issiq noningiz, yoqimli kulguingiz va qalbingizdagi cheksiz sabr men uchun eng qadrli xotiralardan biri.

Buvajonim, sizning dono so‘zlaringiz, bolalikdagi maslahatlaringiz haligacha qulog‘im ostida jaranglaydi. Har bir aytgan gapingiz hayotiy dars bo‘lib qolgandi. Qo‘lingizni ushlaganimda o‘zimni xavfsiz his qilardim, chunki sizning mehringiz, tajribangiz va sabringiz menga kuch bag‘ishlardi.

Men ulg‘aydim. Lekin qalbimdagi o‘sha mehribon nabira o‘sha-o‘sha. Siz bergan tarbiya, siz o‘rgatgan saboqlar yuragimda muhrlanib qolgan. Har qadamimda sizni his qilib yashayman. Siz bergan mehrni, siz o‘rgatgan sabrni, siz singdirgan insofni yo‘qotmaslikka harakat qilaman.

Sizlar bilan o‘tgan har bir kunim – men uchun eng katta sovg‘a. Endi katta bo‘lsam ham, sizlarning quchog‘ingizni, beg‘araz mehiringizni, iliq so‘zlaringizni qo‘msayman. Agar hayot menga yana bir bor bolaligimga qaytish imkonini bersa, men hech ikkilanmay, yana sizlarning yoningizga yugurardim.

Men uchun duo qiling, sizlarning tarbiyangizni asrab-avaylab yuray. Men sizlarni juda ham yaxshi ko‘raman. Sizlar har doim qalbimdasiz! Allohim umringizni uzoq qilsin, baxtimga doim sog' va omon bolinglar. Kelajakda mening farzandlarimning ham sevimli buvisi va buvasi bo'lish nasib etsin...!

Bugun angladim: nafaqat bo'yim, hayotga qarashim ham o'sibdi🌻

#kechinma🍃

Ba'zan yolg'izlik shunchalik chuqur bo'ladiki, atrofing odamlar bilan to‘la bo‘lsa ham, yuragingda faqat sokinlikni his qilasan.

Yolg‘izlik ba’zan seni hech kim tashlab ketmagandek, lekin yoningda ham hech kim qolmagandek his qiladigan tuyg‘u.

Yolg‘izlik – bu yuragingda aytishga so‘z topilmaydigan dard, lekin uni eshitadigan hech kim yo‘qligidan yanada og‘irlashadigan sukunat.

Ba’zan yolg‘izlik – bu seni unutishganidan emas, balki kimnidir unutolmayotganingdan kelib chiqadigan og‘riq.

Yolg‘izlik – bu atrofingda hech kim yo‘qligi emas, balki yuragingni tushunadigan bir insonning yo‘qligidir.

Yolg‘izlik – bu ichingdagi dardni hech kim sezmaydi, ammo u seni asta-sekin yemirib borayotganini faqat o‘zing bilasan.

#nazm

"Tushunmaysan"

Ma'yus kunim ko'zim tushsa,
Kuyar osmon, tushunmaysan.
Meni samo tushungaydir,
Sen, ey inson, tushunmaysan..

Kuyib ko'ksim o'tar bo'lsam,
Oqar bo'lsam, ketar bo'lsam,
Meni daryo tushungaydir,
Sen, ey ummon, tushunmaysan.

Men ham shaydo, men ham maftun,
Men ham hech kimi yo'q Majnun,
Meni Laylo tushungaydir,
Sen, ey jonon, tushunmaysan.

Mening yo'lim uzun armon,
O'zim dovon, o'zim karvon,
Meni sahro tushungaydir,
Sen, ey sarbon, tushunmaysan.

Mening borim erur ko'nglim,
Mening yorim erur ko'nglim,
Ma'yus tanho tushungaydir,
Sen, ey xandon, tushunmaysan...

Ma'yus kunim ko'zim tushsa,
Kuyar osmon, tushunmaysan.
Meni Olloh tushungaydir,
Sen, ey xoqon, tushunmaysan.

Ko'nglim gul, ko'zlarim guldir,
Yuzim gul, qo'llarim guldir.
Meni sabo tushungaydir,
Sen, ey toʻzon, tushunmaysan...

G'uborimdir bo'yi rayhon,
Minorimdir tilim biyron.
Meni dunyo tushungaydir,
Sen, ey nodon, tushunmaysan.


Muhammad Yusuf✍🏻