ЖАННАТГА ЎТ ҚЎЙМОҚЧИ БЎЛГАН АВЛИЁРивоят қилишларича, бир куни Робия ал Адавия бир қўлида бир челак сув, иккинчи қўлида ёниб турган машъала кўтариб Басра кўчаларидан югуриб ўтаётган экан. Йўловчилар ҳайрон бўлиб ундан сўрашипти:
- Бунчалар шошилиб қайларга йўл тутдинг, эй Робия?
Робия қўлидаги челакка ишора қилибди:
- Дўзахдаги ўтни ўчирмоқчиман.
Йўловчилар ёқаларини тутиб, “астағфируллоҳ” деганча, сўрашибди:
- У ҳолда қўлингдаги машъала нечун?
- Бу машъала билан жаннатга ўт қўймоқчиман.
Йўловчиларнинг юзларидан қони қочиб қичқиришибди:
- Оллоҳдан мағфират сўраб илтижо қил, эй бадбахт аёл, акс ҳолда кофир қавмларидан бўлиб қоласан.
- Йўқ, азизларим, сизлар мени нотўғри тушундинглар. Мен кофир эмасман. Оллоҳ таоло билан бандалар ўртасидаги бу икки пардани йўқотмоқчиман холос, токим бандалар Оллоҳ таолога дўзах ўтларида куйишдан қўрқишгани ёки жаннат иқболидан умидвор бўлишгани учун эмас, балки Унинг Оллоҳ эканлиги, Биру Борлиги ва Боқий гўзаллиги учун ибодат қилишсин.
"Ҳикматлар"дан.@at_tavfiquz •
@Jiddauz