Ҳалолдан қўйма, Aллоҳ!

Майли, ноним қотса ҳам,
Тўшак белга ботса ҳам,
Томдан чакка ўтса ҳам,
Ҳалолдан қўйма, Aллоҳ!

Чопонимда бор ямоқ,
Eмайман кунда қаймоқ,
Ор этса-да хеш-аймоқ,
Ҳалолдан қўйма, Aллоҳ!

Мингта улфат керакмас,
Бошга кулфат керакмас,
Битта чин дўст бўлса бас,
Ҳалолдан қўйма, Aллоҳ!

Мингта танноз санамча,
Қошга тортган қаламча,
Бўлмас битта маҳрамча,
Ҳалолдан қўйма, Aллоҳ!

Барака бер, уним бер,
Ҳаловату тиним бер,
Кулба бўлсин - қўним бер,
Ҳалолдан қўйма, Aллоҳ!

Назаринг олма эрдан,
Оёқ узилмай ердан,
Ризқ бер пешона тердан,
Ҳалолдан қўйма, Aллоҳ!

Ҳаром ичимда ачир,
Aмалга хосдир ажр,
Миниб юрсам ҳам хачир,
Ҳалолдан қўйма, Aллоҳ!

Беш кунлик дунёни деб,
Қўймайин виждонни еб,
Охиратга берай зеб,
Ҳалолдан қўйма, Aллоҳ!

Саждага бош эгилиб,
Кўзлардан ёш тўкилиб,
Ҳузрингга борай кулиб,
Ҳалолдан қўйма, Aллоҳ!

Буюрмас ўзга нони,
Кўр қиларкан ҳаёни,
Суриб ёлғон дунёни,
Ҳалолдан қўйма, Aллоҳ!

Ҳалолнинг заҳмати бор,
Лек, ажиб лаззати бор,
Беҳишту жаннати бор,
Ҳалолдан қўйма, Aллоҳ!

Вафо Мўмин

@VafoMumin — холис фикр минбари

✅ Telegram | 🌐 Instagram | 📹 Youtube