ORTIKZODA | Resmi Sayfa

#kun_hikmati

-Gadoy bilan maddohning farqi bormi?
-Bor. Gadoy jo'n tilanchilik qiladi

"Dunyoning ishlari" asaridan... 📚

@Sherali_Ortiqzoda 😎

#ufa #futbol #mundial

Mundial sogʻinchi 👤

Milliy Terma Jamoamiz oʻyinlaridagi fikrlardan oldin jadval nuqtayi nazaridan yaqin taqibchilarimizga xiyla nazar tashlashni oʻrinli bildim.

Birinchisi Eron Milliy Terma Jamoasi 🇮🇷

Eron - juda chunki terma jamoa! O'z safiga juda kuchli xarakterga ega futbolchilarni yiqqan jamoa! Osiyo yetakchilaridan biri. Eron futboli nafaqat maydonda, balki maydon tashqarisida ham bizga azaliy raqib. Bilasizmi nega? 2014-yilgi Mundial saralashida Koreya MTJ murabbiysining intervyusi hech esimdan chiqmasa kerak: "Eron sizlarning Qatar bilan oʻyiningizni kuzatib harakat qildi maydonda. Agar sizlar Qatar MTJ'dan toʻp oʻtkazib yuborganingizda, Eron bizga yana gol urishga harakat qilardi va sizning oʻrningizda katta ehtimol bilan Qatar boʻlardi". Buni qarang oʻshanda ham Qatar bizdan keyingi oʻrinda boʻlgan va Eron bizni Jahon Chempionati saralashining xatto Play-off bosqichida koʻrishga ham qattiq qarshilik qilgan. Mana bu haqiqiy Eron Futboli deyiladi. Bu safar ham baxtga qarshi yana Eron bilan soʻngi bosqichda uchrashdik. Eronning xurmacha qiliqlarini sezgan FIFA Oʻzbekistonning Qirgʻiz Respublikasiga va Eronning BAA'ga qarshi oʻyinlarini bir vaqtga belgiladi. Ayyor futbol egalari Eron MTJ bundan ham oqilona foydalana oldi. Ozodi stadionida chiroq oʻchib qoldi va uchrashuvning birinchi boʻlimiga oz emas, koʻp emas 29 daqiqa qoʻshib berildi. Bu fursatda katta ehtimol Eron MTJ Oʻzbekiston oʻyinini kuzatib, natijani bilib, keyingina oʻyinni davom ettirdi. Bu nima berardi? Agar Oʻzbekiston Qirgʻiz Respublikasidan gol qabul qilib olganida Eron BAA'ga ataylab yutkazib berishi ham mumkin edi. Har holda tarixda bunday holatlar yuz bergan. Oʻyinlar yakunlandi. Eron ham, Oʻzbekiston ham gʻalaba qildi. Bizning oʻyindan soʻng bir jurnalist jamoamiz yetakchisi Masharipovdan flash-interview oldi. Eron klubida toʻp suradigan Jaloliddin Eronda umuman chiroq muammosi boʻlmasligiga guvohlik berdi. Bu ham yuqoridagi fikrlarimizga isbot. Shu kabi holatlarni hisobga olib, Eronni faqat va faqat magʻlubiyatga uchratish shart. Futbolchilar "Real Madrid" kabi charchab (o'lib qolar holat) boʻlguncha mardonavorlik koʻrsatishi shart! Shundagina Erondan shuncha yillik alam olinadi oz boʻlsa-da. Futbolchilarga uch kundan keyin boʻladigan oʻyinda omad tilaymiz!


👀🛡🧠

@Sherali_Ortiqzoda 😎

#kechikkan_post

Assalomu alaykum qadrli doʻstlarim! 😇

Ramazon oyining soʻnggi Jumasi va Navroʻzi olam muborak boʻlsin!

Kelasi shunday ulugʻ kunlarda ham sizlar bilan koʻrishish (g'oyibona) nasib aylasin!

🌸🌸🌸

@Sherali_Ortiqzoda 😎

Endi kitob sotib olmaslikka bahona yoʻq! 📚

#debocha

Turkiy til, zamonaviy oʻzbek tili, Jadidlar va Abdulla Qodiriy

Butun dunyodagi oʻzbek zabon kitob ihlosmandlaridan qandaydir kitob tavsiyasi so'ralsa, ularning aksariyat qismi "Oʻtkan Kunlar"ni tavsiya qiladi. Buning sababi asar oʻzbekning birinchi romani ekanligimi? Bu asarning ayni qanday jihatlari asarning bu darajada ommalashishiga sabab boʻlgan?
Keling, siz bilan shu va shu kabi savollarga atroflicha javob topishga harakat qilib koʻramiz.

Tarixan olib qaralganda, Mamlakatimiz va umuman bizning yerlarda juda koʻp millatlar, sulolar, qabilalar va turli xil odamlarning hayot kechirgani barchamizga ma'lum. Ularning urf-odatlari, dini, irqi, turmush tarzi va umuman qadriyatlari bir-biridan tubdan farq qilib kelgan. Jumladan, ularning tili ham. Oʻrta asrlarga yetib kelgunimizgacha bizning olimlar va umuman dunyo tamaddunida katta figuraga aylangan olimlarning asarlari arab tilida bayon etilgan va nashr etilgan. Bu jarayon uzoq davom etib, faqatgina Navoiy davriga kelishgacha yetib kelgan. Navoiy ilm egallab, dunyo ulamolari ichida koʻzga koʻringunga qadar turkiy til boshqa tillarda soʻzlashadigan odamlar tomonidan kamsitilgan. Maʼlumki "Arabiya - shakar til, Forsiya - asal til, turkiy tili - bozor til" - deb yuritilgan. Buni qarangki, arab va fors tillariga berilgan maqom va turk tilining shunchaki bozorda foydalaniladigan qadrsiz til deb yuritilganini. Bu kabi kamsitish va aybsitishlarga javoban Alisher Navoiy oʻz nodiri "Xamsa"ni ayni turk tilida bayon etgan. Bu asar turkiy tilning nechog'lik javohir ekanligini tom maʼnoda isbot etgan va bu tilning qadri ortishiga sabab boʻlgan.

"Zamon odamlarni, odamlar esa yana yangi odamlar isteʼdodini yaratadi" - deyishadi. Toʻgʻri, insonni Alloh yaratadi. Bunga shak-shubha yoʻq aslo. Masalaning boshqa tomoni davrning va zamonning zalvori Navoiy kabi shaxslarni tarbiyat etadi va uni dunyo hamjamiyati uchun manfaatli etadi. Rusning chirkin turmush tarzi oʻz vaqtida Pushkinni oldinga olib chiqqan desak, Pushkin asarlaridan ilhomlanib Dostoevskiy va Tolstoy kabi yozuvchilar oʻz sohasida katta nomlarga aylana oldi. Bu kabi xoronika oʻzimizda ham juda koʻp bor kuzatilgan. Navoiy, Mashrab, Soʻfi Olloyor va undan soʻng jadidlar bu tizimda shu tartibda tiziladi. Mamlakatimiz hayotining eng oʻgir davrlari sifatida Sobiq Ittifoq mustamlakalik davrlarini koʻzda tutishimiz mumkin. Bu davrda tabiiyki katta maydonga oʻzbekning Jadidlari chiqa boshladi. Ular eski tuzum, eski qadriyatlar va konservatizmdan zamonaviy olamga 'sakrashga" harakat qila boshladi. Bu holat oʻzbek tili borasida ham muhim jarayon boʻlib koʻzga koʻrindi. Matbuot, adabiyot va teatr vositalarida zamonaviy oʻzbek tili ishlab chiqildi. Yangi oʻzbek tilining yaratilishida Jadidlarning va Abdulla Qodiriyning oʻrni beqiyos edi. Xoʻsh, siyosat va davlat idoralaridan ancha uzoq boʻlgan Qodiriy qaysi yoʻllar bilan oʻsha vaqtdagi odamlarning fikrlashiga taʼsir otkaza oldi?

Davomi bor...

@Sherali_Ortiqzoda ✅

#ijodiyot

Bahordagi qish

Sovuqda dil bandi, erk yetmay turib,
Daraxtlar gullari koʻrk bitmay turib.
Qishning qahratoni tark etmay turib,
Bahorning o'ninchi kuni muborak!

Dudbo'ron qachonki buzilsa butkul,
Qachonki g'unchasin tugsa atirgul,
Shu vaqtda sayraydi shu gulda bulbul,
Bahorning o'ninchi kuni muborak!

Oftobda ishq oʻyin boshlolmayapman,
To'nimni sandiqqa tashlolmayapman.
G'oraning qornidan tishlolmayapman,
Bahorning o'ninchi kuni muborak!

Hashar yoʻq, ariqlar obod boʻlmadi,
Lobarlar sochlari ozod boʻlmadi.
Sumalak isidan dil shod boʻladi,
Bahorning o'ninchi kuni muborak!

Biroz sabr etgil, ey murgʻak yurak,
Biroz kut, daraxtlar yozadi kurtak,
Hali ham qahraton aytmoqda ertak,
Bahorning o'ninchi kuni muborak!

Kuyinchagim sovuqdan kuyinmagin ham,
"Bahor keladi" — deya suyinmagin ham.
Ahir otkinchidir yoz ham, bahor ham,
Bahorning o'ninchi kuni muborak!

Isyon etaverma Ortiqzoda bas,
Insonga azizdir har hashak, har has.
Sevganing bahorda sarpolar tilar,
Unutma bepulmas har bitta havas!

@Sherali_Ortiqzoda 🌓

Barselona haqida

2-qism.

...Xavi murabbiyligi uzoqqa choʻzilmadi. Xavi kelishuvga binoan oʻz lavozimidan ozod etildi.

Hansi Flik metodologiyasi. 2024-yilning may oyida Germaniyalik mutaxassis, Barsaning oʻsha mashhur 8:2 hisobidagi magʻlubiyati sababchisi Hansi Flik Barselona murabbiysi sifatida tanishtirildi. Flik koʻproq biz yuqorida ilgari surgan fikrlarimiz, ya'ni "akademiya futbolchilari haqida koʻproq oʻylashi" — mana shu fikrni oʻz oldiga maqsad qilib qoʻydi. Koʻproq akademiya futbolchilariga eʼtibor berib, jamoa uchun uzoq muddatli maqsadlar qoʻydi. Shaxsan oʻzim ham dastlab bu mutaxassisga ishonmay turgandim, ammo uning 2024-yilgi Realni 4:0 hisobida magʻlub etganidan keyingi harakatlari meni ishontirdi kelajak sari. Ya'ni bu oʻyinda uning imzosi yaqqol koʻringan edi. Muhimi u uzoq muddatli strategiya tuzgan va shu yoʻlda gʻalabali odimlamoqda.

Barselona bu yili Chempionlar Ligasida gʻolib boʻladimi? Barsa muhlislarini shu kabi savollar koʻp oʻylantirib qoʻyyapti, ishontirmoqda ham. Sababi bu gʻalaba ancha kutildi. Ammo men bu gʻoliblikni kutayotganim yoʻq toʻgʻrisi. Barsa bu sovrinni qoʻlga kiritsa-ku, foydadan holi emas, ammo Flik jamoaga endi keldi. Flik uzoq muddatli maqsadlarni koʻzlab turibdi, shunisi meni xursand qilmoqda. Mayli bu yili hech qanday sovrin qoʻlga kiritmasin xalqaro darajadagi, ammo yoʻqotilgan bu mavsum evaziga ketma-ket sovrinlar kelaversin jamoamizga. Shu mening tanlovim va orzuyim. Bugun Barsa ana shu turnirning nimchorak finali doirasida Benfika jamoasiga qarshi Portugaliyada maydonga tushadi. Jamoamizga omad tilayman.

"Visca el Barça i visca Catalunya!"

Darvoqe, hamma klubning magʻlub boʻlib, inqirozda yurgan vaqtida "Barsa muhlisiman" — deya olmagan vaqtda men sharaf bilan klub libosini kiyib yurganman. Bular alohida hikoyalar. Keyinroq aytib beraman. 😅

@Sherali_Ortiqzoda 🌓

Chempionlar Ligasi va Barcelona haqida.

Futbol - olimlar aniqlay olmaydigan va yechimi yoʻq soha (fan). Mana shunday gap koʻp yuradi futbol ommasi ichida. Bilasizmi nega futbolni olimlar tushuna olishmaydi? Buning sababi bitta, bu ham bolsa, futbolni insonlar oʻynashadi. Inson esa haligacha tushunib boʻlmas mavjudot boʻlib kelmoqda. Mendan futbol haqida va juda yaqin boʻlganim uchun Barselona haqida koʻp soʻrashadi. Keling shu mavzular atrofida biroz soʻz yuritsak.

Barselona - hissiyotlar jamoasi, hissiyotli odamlar jamoasi! Barselona futbol uchun juda katta narsalar (resurslar) bera olgan klub sifatida har doim e'tirof etiladi. Dunyo tarixida Terma Jamoaning asosiy tarkibida bir klubining 11 vakili qatnashgan oʻyinlar boʻlmagan deyarli. Bir marta boʻlgan - bu ham bolsa Ispaniya terma jamoasida. Bu terma jamoada bir oʻyinda asosiy tarkib oʻyinchilari sifatida Barsaning 11 a'zosi harakat qilgan. Eng qizig'i - bu futbolchilarining hammasi Barsa akademiyasi tarbiyalanuvchisi edi. Barselona tiki-taka uslubini dunyo futboliga taqdim etgan. Barselona Iniesta, Xavi, Messi, Buskets kabi nonlarni oʻz akademiyasi orqali dunyo futboliga taqdim etgan. Xullas gapirsak gap ko'p. Agarda shu matnni shu joyigacha qaysidir Real muhlisi oʻqiyotgan boʻlsa, biroz achchiqlandi. Bu normal holat, tushunaman. Sizning fikringizda jon bor, haqiqatan soʻngi oʻn yillikda Barsaning azaliy raqibi Real sovrinlar borasida Kataloniya klubidan ancha ilgarilab ketdi. Bu mening faraz yoki fikrim emas, bu shunchaki fakt, yoki aksioma! Realda ichki siyosat juda zoʻr ishlaydi. Florentina Perez — haqiqiy rahbar!

Barselona jamoasi va men. Bu klubga 2006-2007-yillarda oshiq boʻlishni boshlaganman. U vaqtda hali 10 yoshga qadam qoʻymagan bola boʻlganman. Juda koʻp kuzatayotgan va koʻrayotgan narsalarimni aqlan tushuna olmas edim ham, ammo negadir shuncha futbol komandalari ichidan Barselona menda juda issiq taassurotlar qoldirar edi. Hech esimdan chiqmaydi birinchi marta ham ongli ravishda shu jamoaning 2008-yilgi futbol formasini sotib olganman. Barselonaga haqiqiy mehr qoʻyganim 2008-09 yilgi Chempionlar ligasi finalida edi. Manchester Yunaytedning afsonaviy tarkibini 2:0 hisobida magʻlub etgan va Messi gollardan biriga mualliflik qilgan oʻyin oqshomi haligacha yodimda. Shu vaqtdan butun Kataloniya jamoasiga muxlislik qilib kelaman.

Barselona inqirozi. Soʻngi 10 yillikda Real klubidan farqli ravishda Barsada inqiroz yillari va tushish holatlari yuz berdi. Klub chempionlar ligasining juda koʻp oʻyinlarida achchiq magʻlubiyatlar qurboniga aylandi. Hatto bir mavsum daraja nuqtasi nazaridan Yevropada ikkinchi oʻrinda turadigan Yevropa Ligasi musobaqasida ham Ayntraxtga oʻz maydonida magʻlub boʻldi va ancha katta tanqidlar daryosiga g'arq boʻldi. Bu kabi holatlar Barsaning yorqin oʻyinlari, tiki-taka kabi uslubni, Messi, Xavi va Iniesta kabi futbolchilarni dunyo futboliga bergan klub uchun juda daxshatli holatlar edi.

Xavi murabbiyligi va inqirozning davom etishi. Barsaga Xavi kelganida juda koʻp klub ishqibozlari xursand boʻlishgan, sababi bu futbolchining futbolchi sifatida klub uchun qilgan ishlari beqiyos va betakror edi. Ammo men bunday holatda emas edim, sababi Xavi u vaqtda (balki hozir ham) Barsa kabi klubni boshqarish darajasidagi murabbiy emas edi. Kelgan mavsumida Ispaniya Chempionligini qoʻlga kiritgan Xavi missiyasi kutilganidek natija bermadi. Chempionlar Ligasidagi omadsizlik davom etdi. Katta mablagʻlar evaziga qabul qilingan futbol yulduzlari klub xohlagan ishlarni qilib bera olmadi. Oʻsha payt men bir fikrni ilgari surgan edi. Ya'ni, "Barsa moliyaviy inqirozini hisobga olib, chetdan emas, balki oʻzining Messi, Xavi va Iniesta kabi futbolchilarni yetishtirib bergan "zavodi" La-Masyadan futbolchilar olib chiqishi kerak. Shundagina Barselona qadriyatlarini kelgindi futbolchilardan koʻra yaxshi his etadigan yigitlar klubning eski nufuzini tiklay oladi. Bundan tashqari ular katta pul soʻrashmaydi. Yana plus tarafi Klub uzoq muddatli strategiyani amalga oshiradi" fikrlarim shunday edi taxminan.

@Sherali_Ortiqzoda 🌓

#kun_hikmati

Ilm yoʻlidan borgan odam oxiri jannatning eshigi oldidan chiqadi.

"Iymon" asaridan...

@Sherali_Ortiqzoda 🌓

#kun_hikmati

"Faqirlik odamning gʻururini sindiradi"

"Yashamoq" asaridan...

@Sherali_Ortiqzoda 🌓

#bir_asar_haqda

— Yashamoq ne, yashamoq?
— yashamoq — sinovlardan oshamoq!

Yuy Xuaning "Yashamoq" asari haqida.

Hayot — bu ajoyib tilsimot, inson — ajib mavjudot! Umr — hayotdagi insoning yashashi uchun sinov! Ohirat — imtihondir! Inson hayoti davomida turli mashaqqatlarni yengib oʻtishga, hayotda oʻz oʻrnini topishga qattiq bel bogʻlaydi. Kimlardir bu vazifani kutilgani kabi ado etsa, kimlardir armon ila dunyodan oʻtadi... Sizlarga soʻzlab bermoqchi boʻlgan asarim ham aynan shu kabi falsafiy qarashlarga qaysidir maʼnoda yechim beradi. Bu asardan hamma oʻz fikr doirasi chegarasida hikmat oladi!

Muallif haqida.
Yuy Xua — xitoylik sobiq stomatolog, amaldagi mashhur yozuvchi. 1960-yilda tugʻilgan. Besh yil mobaynida stomatolog boʻlib faoliyat olib borgan, va bu kasbni butkul tashlab, oʻzini adabiyotga bag'ishlagan. "Yashamoq" asari muallifga katta muvaffaqiyat keltirgan. Ushbu asar dunyo boʻylab, yigirmadan ortiq tillarga tarjima qilingan. Buyuk Britaniya, AQSh, Italiya, Fransiya, Germaniya kabi mamlakatlardagi nufuzli mukofotlarga loyiq koʻrilgan. AQSH'da "yashamoq" asari booklist'larda bir necha yil yuqori pogʻonalarni band qilib kelgan.

Syujet.
Asar oʻtkan asrning ikkinchi yarmidagi Xitoy mamlakati odamlarning hayoti haqida hikoya qiladi. Asar qahramoni Fugui oddiy dehqon obrazida namoyon boʻladi. Fugui maishatbozlik va qimor kabi illatlar tuzogʻiga oʻlja boʻlib, otasidan qolgan yerlarni va yashab turgan uyini boy beradi. Shu orqali Fugui birdaniga hammasidan: hamma janob deb hurmat qilishidan, oilasining nufuzidan, to'kin hayotdan ayriladi, hamda qashshoqlikning tub-tubiga sho'ng'iydi. Fugui oʻsha davrdagi Xitoy hukumati olib borgan adolatsiz siyosatning qurbonlarini oʻzi koʻzi bilan koʻradi va qaysidir maʼnoda oʻzi ham shu siyosat qurboniga aylanadi. U birin ketin yaqinlarini tuproqqa qoʻyadi!

Men qanday tushundim?
"Yashamoq" asarini oʻqir ekanman, voqealarning oddiy dehqon hayoti orqali tushuntirilishidan menga koʻproq Oʻtkir Hoshimovni eslatdi. Asardagi voqelikning oʻtkir sur'atda davom etishi esa shaklan Jovliyevning "Qoʻrqma"siga oʻxshab ketadi. Asarda inson va har bir fuqaroning hayotida siyosat naqadar ahamiyatli ekanligi tasvirlangan. Asar qahramoni Fugui oʻzining metin irodasi bilan yoʻlida turgan barcha toʻsiqlarni yengib oʻtadi. Fuguining juda koʻp hollarda koʻz yoshi bilan nafas olishi va yaqinlaridan birma-bir ajralishi oʻquvchini chuqur mulohazaga chorlaydi. Ochigʻi oʻzim ham "qachon Fugui hayotiga yorugʻ kunlar kelar ekan ? - deya rosa kutdim, taassufki, yorugʻlik koʻringandek surat koʻzga koʻringani ortida qaygʻu quvib kelaverdi. Asarni oʻqigan oʻquvchi oʻzida borki neʼmatlarga shukronalik hissini tuyishni boshlaydi. "Hayot — besh kunlik sinov" ekanligini tushunib yetadi ham. Asarning har bir qatorida, har bir sahifasida, har bir bobida olam-olam maʼno xazinasi yashiringan. Bu xazinani topish esa oʻquvchining qalb ko'ziga bogʻliq.

Xulosa. Asar oʻquvchini chuqur mulohazaga, har bir ne'matga shukronalik qilishga, yorugʻ kunlarga intilib yashashga oʻrgatadi. Bu yoʻlda metin iroda, sabr-qanoat qoʻlini tutgan insonlargina muddaosiga yetajak! Zero, asarda aytilganidek: "Bir falokatdan qutulgandan keyin ortidan albatta yaxshi kunlar keladi!"

Asarni tavsiya qilaman, kitobini sotib olganingizga esa maroqli mutolaa tilayman!

@Sherali_Ortiqzoda 🌓

#kun_hikmati

"Oʻzingni baxtli his etsang, kambagʻal boʻlish uyat emas"

"Yashamoq" asaridan...

@Sherali_Ortiqzoda 🌓

Oliygoh, Ustozlar va talabalar...

Dunyo tarixiga nazar solsak, Ustoz, Muallim, Oʻqituvchi kabi soha vakillari har doim e'zozlangan va ardoqlangan. Nigohimizni uzoq yerlarga emas, yaqinroq boʻlgan oʻz yerlarimizga qaratsak-da, bu kabi "soha ustalari"ni nechog'lik ahamiyatli ekanligini tushunib yetamiz. Bunga, "Ustoz - otangdek ulugʻ" kabi xalqimiz tomonidan aytilgan maqollar ham yaqqol musol boʻla oladi. Shunday qilib, bu safargi maqolada ushbu kasb egalarining tarixini emas, hozirgi vaqtda qanday darajada ekanligi atrofida soʻz yuritamiz. Shu bahona sizlar bilan to hozirga qadar oliygohda oʻtkan yillarimdan misol keltiraman. Bularni qismlarga boʻlib chiqaman Xuddiki, ibn Xaldunning "Muqaddima" asari kabi. (Ustozning yoʻlini bersin). Demak boshladik.

Biror-bir maqola yozishda koʻpincha shaxsiy qarashlarimdan kelib chiqaman, ya'ni barchasi subyektiv fikrlar boʻladi. Bunda tabiiyki, Jurnalist Ustozim: "Jurnalist uchinchi shaxs pozitsiyasida boʻlishi kerak!" - deya koʻp takrorlaydi. Ammo - bu juda mushkul vazifa. Shu sabab, Ustozga aytamanki, bu safar ham meni maʼzur tutsin. Qarashlarim adekvat boʻlishiga harakat qilaman, lekin talaba boʻlganim uchun gohida ikkinchi shaxs vazifasida turishimga toʻgʻri keladi. Toʻgʻri tushunasiz.

Oliygohga 2022-yili qabul qilinganman. Shu vaqtlarda darsga koʻrgan ilk haftamdan boshlab, birinchi boʻlib bor eʼtiborimni qaratgan nuqtam albatta dars jarayonlari boʻlgan. Koʻpchilik singari men ham katta auditoriya, koʻngilga xush yoqar mavzular, oʻzimning tik turib barcha talabalarga va'z o'qishim va meni hamma eshitishini, oʻqituvchilar mening fikrimni inobatga olishini tasavvur qilganman. Keyinchalik el qatori - bu tushunchalar shunchaki Utopiya ekanligini tushunib yetganman.

Birinchi bosqich. Ilk bosqichda maktab fanlarining mantiqiy davomi: Amaliy matematika, Ingliz-tili, rus-tili kabi fanlar qoʻyilgandi. Menimcha hamma oliygohlarda shunaqa. Bu biroz oʻylantirgan edi meni. Sababi, men shaxsan kollej tizimida oʻqiganman. Bu fanlarni 9 yil maktabda, 3 yil kollejda oʻqiganman. Buni qarang, kollejda ham yonalishim iqtisodiyot edi. Natijada, uch yil kollejda mutaxassislik fani oʻtib, institutda bir yil maktab fanlari oʻtganman. Keyin soʻrab bilsam, men bilan oʻqishga topshirgan va qabul qilingan 2004-yillar avlodi 11 yil maktabda oʻqigan ekan. Ularga bir yil kamligi uchun institutda ham davom ettirishgan ekan bu fanlarni. Men esa olti yillik tanaffusdan soʻng oʻqishga kirganim uchun kabi gʻalati holatlarga duch kelgan ekanman. Ochigʻi birinchi semester vaqtida oliygoh atmosferasini his qila olmaganman. Kunlarim zerikarli, rangsiz va odatdagidan ham g'alatiroq oʻtardi. Sabr qilishga va hammasi iziga tushib ketishiga ishonishga harakat qilganman.
Fikrlashga urgʻu beradigan fanlarni rosa kutganman. Psixologiya, falsafa, jamiyatshunoslik (sotsiologiya) kabi sohalarni oʻrganishga, aytish mumkinki, Ustoz bilan oʻrganishga ishtiyoqim baland edi...

Davomi bor...

@Sherali_Ortiqzoda 🌓

#kun_hikmati

Dunyodagi aksar narsalarning yaratilgan ilk davri eng yaxshisi boʻladi. Xususan tabiat ham. Shu sababli insoniyatning ilk davrlarida inson uzoq umr koʻrgan, va bu holat yillar oʻtkan sayin qisqarib borgan. Tabiat yomonlashib borishi bilan bir insoning uzoq umr koʻrishi ham oʻzgarib boradi.

Muqaddima asaridan...

@Sherali_Ortiqzoda 🌓