АТАМ УБАЙДУЛЛА БАҲАЎАТДИН УЛЫ — ХАНМАҚСЫМНЫҢ РУЎХЫЙ НӘСИЯТЛАРЫ

О, Қаңлының хан туқымы,
Қаныңда ағар қанларым,
Жүриўши болма жупыны,
Жалынсаң, Қудайға жалбарын.
Алды менен адам бол,
Адамшылық ҳадал бол,
Кеўил толы кир менен,
Буйырмайды төрлеген.
Елиңди сүй ярдан артық,
Байлығың жоқ ардан артық,
Хошаметтен ҳаўаланба,
Атақ бер деп шабаланба,
Шаңында қалма шабанның,
Ур қамшысын бабаңның,
Серлемесең оқпан көп,
Жүйриклерге қақпан көп,
Ядыңда тут мудамы,
Жигиттиң жаны – Ўатаны!
Айғырлыққа талас та,
Шайырлыққа таласпа.
Талай сүргин, даўылдан,
Мийрас Абыл, Қабылдан,
Болса да талай шоққысы,
Болатуғын бир Шоңқысы,
Қаҳарманы көп елденсең
Сатарманы көп елденсең.
Соның бәрин бил, балам,
Ата ақылы көл, балам.
Хан теклисең умытпа,
Ханлардай дәўран сүр, балам.

А. Дарменов,
08.02.2023.

Сүўретте художник Барлықбай Айтмуратов тәрепинен исленген «Ханмақсым» картинасы

@Allayar_Darmenov