БАЙРОҚНИ БЕРМАСДАН

Кўпчиликми юрт деб чопадиганлар,
Очилса устини ёпадиганлар?
Яна бу ғамдийда, қора тупроқни,
Онасин юзидай ўпадиганлар?

Худо кўрсатмасин,
Мабодо, агар
Минглаган ёв келса тўзиб пар каби,
Улар яширинмасми пана-панага,
Хавф сезган каламуш,
Сичқонлар каби?

Гўдакдай кўзларин кетмасми ёшлаб,
Чекиниб тўқлари, гадолари-да?
Йўлбарсдай лашкарни кетарми бошлаб,
Барсий ўкириқ-ла, садолари-ла?

Мозий-ку Ватанга юзлаб шон берди,
Борми бу кунлар ҳам шон берадиган?
Мабодо ёв келса
Кубролар янглиғ
Байроқни бермасдан...
Жон берадиган?!
Борми?!

© Халима Худойбердиева
https://t.me/Adabiyot_olami