𝗔𝗱𝗮𝗯𝗶𝘆𝗼𝘁 𝗢𝗹𝗮𝗺𝗶

Сени осон топмадим қизим.
Этим суягимдан узиб, топганман.
Оғриқли кунларда узун тунларда
Неча бор уйқумни бузиб, топганман.

Эски кийимларга ўралиб қолдим,
Сени маликадек юришинг учун.
Хавотирдан ўлдим кўчага чиқсанг,
Эсон-омон уйга келишинг учун.

Мен эмас-ми жонинг оғриганида
Жони чиққудайин тепангда турган.
Битта гул берганга бинолар қўйма,
Мен эмасми, сенга умрини берган.

Юзимизни ерга қаратма қизим.
Юзимиз офтобга кўриниб турсин.
Шундай ҳаёли бўл, шундай иболи
Битта қараганга билиниб турсин.

Қушдек оғзимда дон ташидим сенга,
Қушдек учиб кетсам чоранг йўқ болам.
Тош отсанг ҳам нон деб териб егувчи,
Сени яна бошқа онанг йўқ, болам.

Бахтимга бахтли бўл, доғингни кўрмай.
Қошимга ўсма қўй кўнглимни кўтар.
Бир овоздан десин сени кўрганлар,
Яхши қиз туғади, яхши оналар.

© Рислиғой Ҳотамова
https://t.me/Adabiyot_olami

ОНА

Мен узр сўрасам, сиздан сўрайман,
Қора сочингизни қор қилдим она.
Этак-этак фарзанд туғиб бермасдан,
Сизни набирага зор қилдим она.

Етаклаб юрмадим қўлингиздан мен,
Кўрсатмадим катта дунёни сизга.
Энди йиғлаганда кўзим ачишар,
Юрагимнинг ичи тўлгандир тузга.

Ҳажга элтай десам, етмади пулим,
Етганида, сизда қолмади мадор.
Яхши фарзандмасман, шу - катта айбим,
Бошқа айбим билан нима ишим бор.

Ташвиш эмас дунё камлари менга.
Қизиқмас баланди, жарлари менга.
Онам қаридилар, шу менинг ғамим.
Бир чақадир бошқа ғамлари менга.

Нафратим қўзғайди кирмаган ақлим,
Она сиз бахтимсиз, сиз мени завқим.
Ёнингиздан сира кетмай ўтирай,
Қулдек адо қилай, узулмас қарзим.

Жаҳаннам оловин ўчиринг она.
Менга ҳаёт сувин ичиринг она.
Боладек ҳиқиллаб, йиғлаб сўрайман
Бахтсиз фарзандингиз кечиринг она.

© Рислиғой Ҳотамова
http://t.me/Adabiyot_olami

Қошинг қора, кўзларинг қора,
Юлдузисан қайси осмоннинг?
Эслолмасанг ўзим эслатай,
Боласисан Ўзбекистоннинг!
Қачон келдинг бу ерга ўзи?
Не мақсадда дайдиб юрибсан?
Анчагина улғайибсан-ку,
Қорайибсан, озиб-тўзибсан!
Жилғаларсиз дарё қурийди,
Дарёйингни қўйма қуритиб…
Юр, барини эслаймиз бирга,
Айлантирай қўлингдан тутиб.
Ёдингдами бешигинг, ўғлим,
Ундан ҳали ҳидинг кетмаган.
Маҳаллангнинг йўлига қара,
Босиб ўтган изинг кетмаган.
Ана, онанг тандир ёнида
Ёпаяпти сен учун кулча.
Этагидан ажрамасдинг-ку,
Соғинтирдинг сен уни бунча?
Аканг билан учирган варрак
Боқ, осмондан тушолмаяпти.
Опанг сени соғиниб, йиғлаб,
Тишлаганин ютолмаяпти!
Охирги бор қачон эшитдинг,
Тўйлардаги ёр ёрни, ўйла!
Бор, хаёлан дўстларинг билан,
Ўртага туш, қулоч ёз, ўйна.
Ҳайит байрамини соғиниб,
Оқиздинг-ку кўзинг ёшини,
Сенга асраб чарчади янганг,
Арафанинг ширин ошини.
Қара, ўша таниш чойхона,
Чойлашиб гашт қилар кексалар.
Кўрдинг, отанг кулолмаяпти –
Йўлга қарар, сени ахтарар.
Амманг, холанг, амакинг, тоғанг,
Тарқатяпти сумалакларни.
Наҳот соғинмадинг, жон болам,
Наврўздаги камалакларни?
Қара, бувинг қадди букилиб,
Ушоқдайин бўлиб қарибди.
Бир кўришга улгурмикансан?
Хасталаниб, ётиб қолибди.
Болам, дейсан тилингда минг бор,
Қўлингда даст кўтаролмайсан.
Кечирса ҳам бир кун аёлинг,
Сен ўзингни кечиролмайсан.
Мусофирнинг қабри бўлмайди,
Мусофирнинг қадри бўлмайди!
Мусофирнинг мусофирликдан
Ўтадиган дарди бўлмайди.
Тиш қайрама, ёмон дема ҳеч,
Сени катта қилган Ватанни!
Ким дейдилар эшигин бузиб,
Бешигини тепган одамни?
Яшолмайди новда илдизсиз,
Томиринг сув ичган ерга бор!
Отанг қурган йўлларни яшнат,
Уй олдига яна бир уй сол.
Яхшилик қил, юртингни яшнат,
Қўлдан берма шундай имконни,
Сен ҳеч кимдан кам эмассан, бил,
Боласисан Ўзбекистонни.

© Рислиғой Хотамова
http://t.me/Adabiyot_olami

* * *

Олдин, уйлар тор эди,
Тандир, ўчоқ бор эди.
Лекин шу тор уйларда
Ҳамма бахтиёр эди.

Ўлса, номус ор учун
Ўлар эди йигитлар.
Дўстликни жой-жойига,
Қўяр эди йигитлар.

Ота-она олдида,
Бола эркаламасдик.
Бировнинг гуноҳини
Ёпардик, пулламасдик.

Қарздор ёнидан атай,
Ўтмас эди, қарз берган.
Талабадан калтак еб,
Бош эгмасди дарс берган.

Меҳмон келиб қолар, деб
Ёпилмасди эшиклар.
Пул учун, шуҳрат учун,
Айтилмасди қўшиқлар.

Эди дедим, дедиму
Юрак бағрим эзилди.
Бу суратлар эскирди,
У тасмалар узилди.

Қайтмас энди у дамлар.
Аямайди аламлар.
Одамлигин унутиб,
Бормоқдадир одамлар.

© Рислиғой Ҳотамова
https://t.me/Adabiyot_olami

ШУБҲА

Яйраб ўтган экан, аслида, билсам,
«Йилдан йил баттар» деб
Ҳасрат этганлар.
Ўтмишга бугунни бир қиёс қилсам,
Бизга қийинроқдир —
Кундан-кун баттар.

Энди минбарларга талпинма, тамом,
Миллий масалани қўзғама, сира.
Ўлса ўлиб кетар ўзбеки калом,
«Улуғлар» кўнглини қилмагин хира.

Яссавий, Ҳазиний қўлёзмасин от,
Тез эсдан чиқаргин
Фитрат, Чўлпон...ни.
Нимасин англардинг?
Яхшиси — йўқот,
Сақлашдан не наф бор уйда Қуръонни.

Ҳали имонсизлар сафи зич, қалин,
Пасткаш, майдакашнинг
Қилмиши — йирик.
Ўлди деяпсанми?
Қаҳҳор Сталин
Икки бор кўмилган бўлса ҳам тирик!

Шартта айтаверма тилга не келса,
Бошга бало бўлар исёнкор шеърлар.
Бир пайт «халқ душмани»
Дейишган бўлса
Бу кун «қайта қуриш душмани» дерлар.

Имкон туғилсаёқ қасос олишар,
Уларнинг пайт пойлаб туришгани чин.
Балки нишонлашни истаб қолишар
Машъум қатли омнинг олтмиш йиллигин?

Жонингни оғритар бу ҳадсиз хўрлик,
Ақлингни бир бора ишлата билсанг:
Бу қандоқ кўрлигу
Бу қандоқ зўрлик —
Кўрсатма бўйича эътиқод қилсанг?!

Йўқ, йўқ,
Хато кетма. Бу гаплар қалтис,
Замон кўтармайди уларни, ахир.
Энди икки ёшда қизинг Тўмарис,
Бешикда ётибди ўғилчанг Темур.

Менга нима бўлди?
Қўрқяпман нечун
У оғир йилларни кўрмаган бўлсам?
Бадном этилмаган, ўлмагани чин
Уруғ аймоғимдан биронта одам.

Шунда ҳам нимадир тилимни тийиб,
Ерга оёғимни босар маҳкамроқ.
Шу боис юраман бошни сал эгиб,
Қора тун негадир туюлади оқ.

Бу лаънати кучни енгмасам бўлмас,
Йўқса боса келиб, енгар муқаррар.
О, унда йилдан йил,
Кундан кун эмас,
Ҳар лаҳза лаҳзадан бўлади баттар!

© Аъзам Ўктам
https://t.me/Adabiyot_olami