Faqat Futbol 13(#Manuchehr)

Eslaysizmi, Antonio Pintus kimligini? Bu “Real” jamoasining jismoniy tayyorgarligi bo‘yicha bosh murabbiyi — past bo‘li, baquvvat, sochi yo‘q amaki. U ko‘p yillar davomida jamoaga jismoniy baza yaratgan, oxirgi o‘n yillikdagi sovrinlarning katta qismi aynan uning davrida qo‘lga kiritilgan.

Ammo endi ma’lum bo‘ldiki, sentabr oxiridan beri Pintus mashg‘ulotlarni rejalashtirish va yuklamalarni hisoblash bilan shug‘ullanmayapti. Bunga sabab — futbolchilarning noroziligi. Mavsum boshida ular Anchelottiga Pintus ularni haddan tashqari zo‘riqtirayotganini aytishgan. Ichki ma’lumotlarga ko‘ra, futbolchilar Pintusning metodlarini “eskirgan” deb atashgan — ular hozirgi zich o‘yin taqvimiga mos emas emish. Anchelotti futbolchilarga quloq solib, Pintusning vakolatlarini qisqartirgan. Uning ta’siri ikki baravarga kamaygan.

Endi esa “Real”ning bu mavsumdagi jismoniy holati nega bu qadar ayanchli ekani noma’lum. Travmalar epidemiyasi, yugurish bo‘yicha eng yomon ko‘rsatkichlar, futbolchilar holdan toygan.

Bu yerda Mbappening ham omili bor — u tufayli Vinisius bilan Rodrigoning motivatsiyasi tushib ketgan. Ehtimol, Pintus ham aybdor — zamonaviy talabga moslasha olmagan, mavsumoldi tayyorgarlikda ortiqcha yuklagan. Yoki aksincha: balki u hammasini to‘g‘ri hisoblagan, faqat oxirigacha unga ishonish kerak edi. Anchelotti ham aybdor bo‘lishi mumkin — hamma tomonlarga yoqmoqchi bo‘ldi, muvozanat topishga harakat qildi, ammo bu ish bermadi.

Bu mavsumda “Arsenal” “Real”dan 11% ko‘proq yugurgan, javob o‘yinida 8% ko‘proq. “Zalsburg” — 10%, “Lill” — 9% ko‘proq. Agar raqib jamoa seni shunchalik ustun yugurib o‘tsa, g‘alaba qozonish imkoniyati juda kam bo‘ladi. Shu sababli, bu 4 ta o‘yinda “Real”da 3 ta mag‘lubiyat va faqat “Zalsburg” ustidan bitta g‘alaba bor.