Dovud Khujakulov

Азиз юртдошлар!

Барчангизни муқаддас Рамазон ойи билан табриклайман!
Ушбу мўтабар ойда хонадонларингизни қувонч ва файзу-барокатга, бахт ва байрамона кайфиятга тўлдирсин. Яқинларингиз доим ёнингизда бўлишлиги, муҳаббат ва ўзаро ишонч ҳислари эса қалбларингизга нур бағишлашига тилакдошман.

Моҳи Рамазон барчангизга муборак бўлсин!

Ҳурмат ва эҳтиром билан
Довуд Хўжақулов

Ҳозирги кунда "Тушда кечган умрлар " асарини мутолаа қиляпман. "Ўткир Ҳошимов портрет ва пейзаж тасвирлари устаси" деган эди университетдаги устозимиз. Бу фикрга мана шу асарни ўқиб амин бўлдим.
"Дунёнинг ишлари" дан фарқли ўлароқ бу асарда воқеалардан — сюжетдан кўра пейзаж ва табиат манзаралари тасвирларига кўпроқ ўрин берилган.
Воқеалар бир-бирига боғланмаган, яхлит ҳолда эмас. Асарнинг бир бобини ўқиб содир бўлган воқеага бироз тушунгандек бўласиз, навбатдаги боб умуман бошқа воқеа ҳақида... Мен бундай усулни Чингиз Айтматов асарларида кўрганман.

Асар ҳақидаги дастлабки тушунчаларим — мана шундай. Ўқиб чиқайликчи балки фикримиз ўзгариб қолар. Тағин ким билсин...

(Ҳозир Рустамнинг армияга келган жойидаман...)

http://t.me/dovudkomilovich

O‘ZBEK NAVOIYNI O‘QIMAY QO‘YSA

O‘zbek Navoiyni o‘qimay qo‘ysa,
Oltin boshning kalla bo‘lgani shudir.
Bedil qolib, Demyan Bedniyni sevsa,
Qora sochning malla bo‘lgani shudir.

O‘zbek Navoiyni o‘qimay qo‘ysa,
Dod demoqqa palla bo‘lgani shudir.
Ma’rifatdan ayru o‘ynasa, kulsa,
Aza chog‘i yalla bo‘lgani shudir.

O‘zbek Navoiyni o‘qimay qo‘ysa,
Aldangani, alla bo‘lgani shudir.
Yulg‘ich aziz bo‘lib, bilgich xor bo‘lsa,
Paytavaning salla bo‘lgani shudir.

El komil bo‘lmasa, yurt bo‘lmas ulug‘,
Beqadr mahalla bo‘lgani shudir.
Qalb to‘la nur xalqning rizqi ham to‘lug‘,
Ombor to‘la g‘alla bo‘lgani shudir.

O‘zbek o‘zligini anglasa bekam,
Uning “Barakalla” bo‘lgani shudir.
Olamga Navoiy nasliman degan
Ovozi baralla bo‘lgani shudir.

Erkin VOHIDOV

https://t.me/Dovud_Komilovich

Каналда илк пост ёзилган сана Ҳазрат Мир Алишер Навоийнинг таваллуд топган кунига тўғри келди.
Фурсатдан фойдаланиб бутун халқимизни мутафаккир бобомиз таваллудининг 584 йиллиги билан табрик этаман. Ул зотнинг қолдириб кетган бебаҳо маънавий мероси биз учун жуда катта таълимий-тарбиявий, илмий-маърифий аҳамиятга эга.

Ҳазратнинг руҳлари шод, жойлари жаннатда бўлсин!

09.02.2025

https://t.me/dovud_komilovich