Korrupsiyaga qarshi kurashishda Yevropa Ittifoqi bilan hamkorlik ko'lami kengaytiriladi

Korrupsiyaga qarshi kurashish agentligi direktori Akmal Burxanov va Yevropa Ittifoqining O‘zbekistondagi delegatsiyasi elchisi Toyvo Klaar o‘rtasida ikki tomonlama uchrashuv bo‘lib o‘tdi.

Agentlik direktori dastlab Toyvo Klaarni yangi lavozimda ish boshlagani bilan qutlab, faoliyatida muvaffaqiyatlar tiladi.

Muloqot chog‘ida A.Burxanov tomonidan korrupsiyaga qarshi kurashda elektron platformalar va sunʼiy intellektni joriy etish, mintaqaviy darajada qo‘shma loyihalar ishlab chiqish kabi qator masalalarda o‘zaro hamkorlikni kengaytirish bo‘yicha takliflar ilgari surildi.

O‘z navbatida, elchi T.Klaar O‘zbekistonda aksilkorrupsiya islohotlari samarali amalga oshirilayotganini eʼtirof etgan holda Yevropa Ittifoqi delegatsiyasi sohadagi takliflarni qo‘llab-quvvatlashga, Agentlik bilan bundan buyon ham faol hamkorlikka tayyor ekanligini maʼlum qildi.

Uchrashuv so‘nggida Agentlik va Yevropa Ittifoqi hamkorligida sohadagi xalqaro donorlar uchrashuvlarini tashkil etish yuzasidan kelishuvga erishildi.

Eslatib o‘tamiz: 2024-yilda Yevropa Ittifoqi moliyaviy ko‘magida Agentlik bilan hamkorlikda 7 mln yevro qiymatidagi texnik ko‘mak loyihasi ishga tushirilgan.
——————
Korrupsiyaga duch kelsangiz Agentlikning “Call-markazi” – 1253 orqali murojaat qilishingizni so‘raymiz.

Facebook|Telegram |YouTube|Instagram|Twitter|Veb-sayt