Prezidentimizning tegishli qaroriga asosan, aholi zich yashaydigan Denov tumanini ijtimoiy-iqtisodiy rivojlantirish bo‘yicha keng ko‘lamli dastur amalga oshirilmoqda. Xususan, yirik savdo majmualari, turar joy komplekslari, saylgohlar, 24/7 rejimda faoliyat yurituvchi turizm ko‘chalari, shuningdek, ishlab chiqarish va xizmat ko‘rsatish nuqtalari tashkil etilmoqda.

Bugun Surxondaryo viloyati hokimi Ulug‘bek Qosimov hududlarga tashrifini Denov tumanida davom ettirib, Sharof Rashidov ko‘chasining 1,5 km qismini 24/7 rejimda faoliyat yurituvchi turizm ko‘chasiga aylantirish va "Yoshlar" saylgohini barpo etish ishlari bilan tanishdi. Qizilsuv daryosi ustida qurilayotgan ko‘prik yakuniy bosqichda bo‘lib, saylgoh hududida zamonaviy attraksionlarni o‘rnatish ishlari olib borilmoqda.

Shuningdek, hokim qurilish va chorva mollari bozorini rekonstruksiya qilish, Qizilsuv daryosi atrofini obodonlashtirish va boshqa loyihalarning amalga oshirilish jarayonini ko‘zdan kechirdi.

Bundan tashqari, "Qo‘zichoqli" yoshlar sanoat va tadbirkorlik zonasidagi loyihalar bilan tanishilib, import o‘rnini bosuvchi va eksportbop mahsulotlar ishlab chiqarish jarayoni o‘rganildi. Mazkur zonadagi 59 ta lotda sanoat ipotekasi asosida yo‘lga qo‘yilayotgan loyihalar to‘liq ishga tushirilgach, 400 ga yaqin ish o‘rni yaratiladi. Mutasaddilarga bir hafta muddatda loyihalar joylashtirish ishlarini yakuniga yetkazish topshirildi.

Tashrif yakunida viloyat hokimiga "Sangardak turizm markazi"da master-rejaga asosan amalga oshirilayotgan 22 ta loyiha yuzasidan masʼullar axborot berdi.

Surxondaryo.uz | Telegram | Facebook | Instagram | YouTube | X5