Cinephile's Club 🎬

Maqsad o’zi nima edi?

Qachondir shu narsa to’g’risida ham post yozishim kerakligini bilardim. Hech o’ylaganmisiz bu kanal shunchaki taqrizlar yozishdan boshqa yana qaysidir maqsadda ochilgan bo’lishi ham mumkinmi?

Bugun shu haqida yozmoqchiman. Filmga bo’lgan muhabbat kanalni ochishdan oldin ham bor edi. Kinolarni ko’rgan paytim ulardagi yetkazib berilayotgan ma’nolar (message) aslida odamlar anglagandan ko’ra ahamiyatliroq ekanini tushundim va kimdir buni ochiqroq va hamma tushunadigan tilda yoritib bersa menimcha ikki taraf uchun ham yaxshiroq bo’ladi degan fikr keldi. Nega ikki taraf uchun? Hozir tushuntiraman.

Ba’zilar uchun kinolar haqidagi uzundan uzun postlarni o’qish zerikarli bo’lishi mumkin. Shu sababdan iloji boricha taqrizlarni qiziqarli qilishga va ma’nosini to’liq ochib berishga harakat qilaman. Bu orqali kimlarnidir qaysidir kinoni ko’rishga unday olaman, kimlarnidir esa yo’q. Natijada, shundog’am shu kinoni ko’rmoqchi bo’lgan odam, oldin taqrizni o’qiydi va kamida kinodan nima kutishni biladi. Kamida. Ko’rishdan oldin qanday hissiyot kutishni va nima olishi haqida tushunib olishi mumkin. Bular, kamida olish mumkin bo’lgan narsalar. Ko’piga to’xtalmayman. Balki oddiy narsani bo'rttirib foyda qilib ko'rsatayotgan bo'lishim ham mumkin.

Xo’sh, taqriz yozadigan odamchi? Unga nima uchun kerak uzundan uzun postlarni vaqtini ajratib yozish? Shunchalik zarurmi?

Qaysidir ma’noda, Ha. Kanalni ochgan paytim ancha tushkunlikka tushib qolgan paytlarimga to’g’ri kelgan. Depressiyani nimadir orqali chiqarib tashlash kerak edi. Va o’ylab qarasam, qachondir kimgadir o’zim muhim deb bilgan narsani ulashganimdagina o’zimni bu narsa (tushkunlik)dan sal bo’lsa ham chalg’ita olardim. Menda esa odamlarga qiziq bo’lishi mumkin bo’lgan, o’zim muhim deb hisoblaydigan va ulasha oladigan bitta narsa bor: kinolardan olingan messagelar. Har safar qaysidir film haqida taqriz yozilganida, bilingki nimadir muhim narsa ichimda qolib ketishini oldini olyapman. Ichimdagi ego bu narsani tashqariga chiqarib tashlashni va e'tirof qilinishni istaydi. Aynan shu narsa taqriz yozishga majburlaydi. Shu paytda eshitadigan odamlar borligi xursand qiladi. Shu sabab ham kanalning nomida “club” so’zi bor. Bu shunchaki kino haqidagi taqrizlar yoziladigan kanal emas, bu klub. Siqilganlar va o’z ermagini kinodan topganlar klubi. O’zi muhim deb hisoblaydigan tushunchalarni kino misolida taqrizlar orqali tushuntirib berishga harakat qilayotgan insonning klubi. Va bu klub hamma uchun ochiq. Taqriz tez-tez chiqyaptimi, bilingki depressiyadan qochishga maximum harakat qilyapman. Shunaqa gaplar kinochilar.

Klubga boshqalarni ham taklif qiling. Zora kim uchundir foydali bo’lsa.

@cinephilessclub

Bugun taqriz chiqadi.

Film nomini komentlarda taxmin qiling.

Qaysi kino (serial)ga taqriz chiqsin?

Variantlar juda ko'p. Qaysini tanlashni bilmadim. Auditoriyani ham fikrini bilgim keldi.

Yana bitta variant 500 Days of Summer. Bugun shu haqida taqriz chiqadi. Filmni ko'rishni maslahat bergan bo'lardim. Lekin uni albatta ko'ring.

Good Will Hunting (1997)

#taqriz #korishshart

Qachondir o’zingizni ichingizda qandaydir kuchli potensialni yashirib kelayotgandek qilayotgandek his qilganmisiz? Hikoyamizning asosiy qahramoni Will Hunting o’z hayotida shunaqa davrdan birini boshidan kechirayotgan edi. Ushbu film iste’dod, do’stlik, sevgi va insoniyatning psixologik murakkabliklarini ochib beruvchi shoh asar hisoblanadi. Afsonaviy Robil Williams va va porloq karerasi hali oldinda turgan Matt Damon bitta filmda.

Filmning boshlanishi Willning oddiy hayot tarzi va uning o’zini butunlay yashirishga bo’lgan urinishlari bilan boshlanadi. Lekin unga birgina narsa kerak — unga ishonadigan inson. Ushbu ishonchni unga Dr. Sean Maguire olib keladi. Robin Williams tomonidan mahorat bilan ijro etilgan ushbu obraz sizni hayratda qoldiradi. Will va Seanning suhbatlari — filmning “yurag”i. Qachonki siz Willning hayot falsafasi va Seanning hayot tajribasi to’qnash kelganini ko’rsangiz, filmni pauza qilib fikrlarni hazm qilishingizga va chuqur o’ylashingizga majbur qiladi.

Filmdagi yana bir kuchli jihat — bu dialoglar. Har bir aytilgan so’z chuqush bor. “It’s not your fault” (Bu sening aybing emas) kabi oddiy jumla qanchalik kuchli bo’lishi mumkinligini bu film orqali tushunasiz. Sean bu so’zlar orqali Willga uning bolaligidagi travmalar va o’tmishdagi azob-uqubatlar uchun o’zini aybdor his qilmasligi kerakligini yetkazishga harakat qilgan. Will bolaligida o’z otasi tomonidan zo’ravonlikka uchragan, bu esa uning shaxsiyati va qarorlariga katta ta’sir ko’rsatgan. Will doim o’zini himoya qilishga urinib, o’tmishidagi og’riqlarni inkor qilib kelgan, ammo bu jumla uning himoya devorlarini buzib tashlaydi.Sean Willni ishontirishga harakat qiladi: u boshqalarning noto’g’ri munosabati va zo’ravonligi uchun javobgar emas, bu uning aybi emas. Bu so’zlar Will uchun chuqur emotsional tozalash nuqtasi bo’lib, uning o’tmishdagi og’riqlardan xalos bo’lishiga va oxir-oqibat o’z iste’dodlarini qabul qilishiga yordam beradi.

“Good Will Hunting” nafaqat iste’dod va psixologik kurash haqida hikoya qiladi, balki har bir insonning ichida yashirin imkoniyatlar va chuqur og’riqlar mavjudligini, va buni hech kim inkor qila olmasligini ham ko’rsatadi. Film bizga shuni o’rgatadiki, haqiqiy o’sish va ozodlik faqat o’zimizni tushunish va anglash, o’tmishimizni qabul qilish va boshqa odamlarning bizga bo’lgan ishonchiga javob qaytarish orqali amalga oshadi. Will Huntingning o’z yo’lini topishi, bizni o’z hayotimizdagi to’siqlarni yengish va ichki kuchimizni kashf qilishga ilhomlantiradi. Ushbu film — bu hayotning murakkabligi va inson psixologiyasining qanchalik chuqurligi haqida yozilgan ajoyib “dars”dir. Qalbga quloq solish, ichki murosa, kelishuvga erishishgina odamni yoshlikdagi halovatini qaytarishi va erkin yashashga imkon berishi mumkin. Miya esa bu yo’ldagi (muhim) vosita xolos.

Filmdagi men uchun eng emotsional sahna bu uning yaqin do’sti bilan bo’lgan suhbati: “Agar bundan 20 yildan keyin, sen haliyam men bilan, shu joyda, qurilishda ishlayotgan bo’lsang, men seni o’z qo’llarim bilan o’ldiraman. Hazillashayotganim yo’q. Senda hech qaysi birimizda yo’q narsa bor, buni nimaligini bilmayman. Muhimi bu ham emas. U bor. Sen bu narsani qilishga o’zingni majburmasdek tutishing mumkin. Buni hatto o’zinga qarzdek ko’rishing mumkin. Yo’q bu seni o’zliging oldindagimas, meni oldimdagi qarzing. Men ertaga, ko’z ochib yumguncha 50 yoshga to’laman va ishonchim komilki men haliyam shu ishda ishlayotgan bo’laman. Sendagi o’sha mavjud narsani ega bo’lish uchun men har narsa qilishga tayyorman. Kunimning eng yaxshi qismi qaysiligini bilasanmi? Mana men senga aytaman. Bu o’sha 10 soniya. Mashinamdan tushib sening eshiking oldigacha borgunimda bo’lgan vaqt. Chunki faraz qilaman, balki hozir eshikni taqqilatgan paytim hech kim javob bermas? Hech qanday xayrlashuvlar yo’q. Ular kerak ham emas. Sen shunchaki ketgan bo’lsang. Ko’p narsani bilmasligim mumkin. Lekin shu narsani aniq bilaman, Will.”.

@cinephilessclub

#CinephileBeingLazy

Bilaman kanal faolligi ancha tushib qoldi. Final (sessiya)lar tugasin. Bir ajoyib kinoga taqriz chiqadi ⏳.