Bored Panda

​​#review

"Surf's Up", 2007

Ushbu multfilm men uchun o'zgacha yoqqan doim. Ilk bor ko'rgan o'sha yosh bola bo'lgan davrlarimdayoq. Syujetni ham, mazmunini ham barchangiz yaxshi bilsangiz kerak. Shu sabab, u haqida shunchaki o'z fikrlarimni yozgim keldi.

Syorfingda eng muhimi — muvozanat.
Multfim ham o'z ma'nosida ambitsiya va ichki xotirjamlik o‘rtasidagi muvozanatni saqlash qanchalik muhimligi haqida. Muvaffaqiyat ketidan quvarkanmiz, hayotda har doim Kodi yoki Tankga o‘xshab faqat g‘alabalar va atrofdagilarning e’tirofi bizni baxtli qiladi deb o‘ylaymiz. Ammo multfilm shuni ko‘rsatadiki, baxt - bu moddiy yutuqlardan ko‘ra ko‘proq narsa. Faqat ambitsiya yetarli emas. Xotirjamlik muhim. Bu o‘z yo‘lingni topish, qilayotgan ishingni sevish va hayot hadya qilayotgan har bir lahzalarni qadrlashdir.

Syorferlarda eng muhim sifat — jasurlik.
Ayniqsa, Katta Zi obrazi menga juda yaqin. Bu hatto eng iste’dodli odamlar ham dunyo bizga bosim o‘tkazishni boshlaganida o‘zimizni yo‘qotib qo‘yishimiz mumkinligi haqida. Katta Zi tarki dunyoligida shunchaki yosh bolalar uchun emas, balki kattalar uchun ham katta ma'no bor. U go‘yo: "Baxtli bo‘lish uchun sen eng yaxshisi bo‘lishing shart emas!" demoqchi. Ayniqsa, men uchun bu muhim, chunki hayotda doim qandaydir standartlarga javob berishimga to'g'ri kelgan. Mendan doimo ko'p narsa kutishgan, eng zo'ri bo'lishimni istashgan, istaganman. Lekin oxir-oqibat eng muhimi - o‘zimga yaxshi bo‘lishi uchun yashashim kerakligini tushunganman.

Syorfingda his qilinadigan eng go'zal tuyg'iu — erkinlik.
Multfilm ochiq fikrli va ortga qaytmas bo‘lishning qanchalik muhimligi haqida. Bu ayniqsa bosh qahramon misolida qiziqarli ko‘rsatiladi. Misol uchun, Kodi Katta Zining saboqlarini darhol tushunib yetmaydi, o'zinikidan qolmaydi, bizga muvaffaqiyatning sirli maslalliqi yo'qligi yana bir bor isbotlanadi. Ammo uning yangiliklarga ochiqligi va xatolarini tan olish qobiliyati oxir-oqibat o‘sishiga imkon beradi. Ba’zan hayotimizga kirib keladigan odamlar, agar biz ularga imkoniyat bersak, bizni yaxshi tomonga o‘zgartirishi mumkinligini eslatadi.

Syorfing beradigan eng muhim saboq — hayotning ma'nosini jiddiy olib yubormaslik.
To‘lqinlar doimo mavjuddir. Agar siz syorfing orqali okeanni boshqara olaman desangiz adashasiz, biroq siz o‘z to‘lqinlaringizni tutishni o‘rganishingiz va bundan zavq olishingiz mumkin. Syorfing bu dunyoda "carpe diem"ni bizga eng yorqin tarzda tushuntira oladigan sport turi bo'lsa, ajabmas...

Ilhomlantiradigan mulftilm.

@boredpandablog