Фарзандларимизга лойиқ ота бўлишимиз керак!
Бир куни товламачилик қилгани учун махсус тадбир жараёнида қўлга олинган "тадбиркорни" идорага олиб келишди.
У ўзининг таниши бўлган бошқа бир тадбиркорни яланғоч ҳолатидаги видеоларини тарқатиш билан қўрқитиб, ундан ўзига тегишли фермахона биносини анча қиммат баҳода сотиб олишига мажбур қилган экан.
Иш ҳужжатлари орасида "тадбиркорни" қўлга олиш жараёнлари акс этган видео тасвирлар ҳам мавжуд эди. Компьютерга дискни жойлаб, видеони томоша қилишга тушдим.
Орган ходимлари "тадбиркор"ни қўлга олишгач, ундан ишлов берилган пулларни ҳужжатлаштириб олишади. Пуллар ишлов берилгани учун уни ушлаган одамнинг қўлларида махсус кукун излари қолиши муқаррар эди. "Тадбиркор"ни ИИБ биносига олиб келишаётганда унга қўлларини ҳеч қаерга теккизмаслигини, қўлларидан суртма олишлари лозим эканлигини тушунтиришади.
Ходимларнинг хизмат хонасига олиб келингач, "тадбиркор"ни хонадаги столга ўтирғизишади. Унинг бу ўтириши худди қўлларини кўтариб, дуога қўл очган одамни эслатарди.
Камера ишлаб турибди. "Тадбиркор"ни кузатишга фақат битта ходим қолган. Экспертни келишини кутишмоқда. Хонада сукунат.
Шунда ҳалиги одам секин йиғлашни бошлади. Қўллари кўтарилган-у, ўзи пастга қараган. Йиғлаб, бундай дерди:
"Мени кечиринг болаларим. Сизларга муносиб иш қилмадим. Сизларнинг ҳам ҳаётингизни синдириб қўйдим, ўқишингиз нима бўлади энди болам, мени кечиринг. Мен сизларга лойиқ ота бўлолмадим".
У анча узоқ йиғлаганди. Томчи ёшлар унинг кўзларидан эмас, қалбидан чиқаётгандек гўё.
Бу жуда буюк афсусланиш эди.
Қачонки фарзандларимни боғча ва мактабга олиб борар эканман, уларнинг ортидан қараб, ана шу воқеаларни эслаб тураман. Мен сизларга лойиқ ота бўлишим керак, болаларим, дейман ўзимга.
Бизларнинг хатоларимиз сабаб фарзандларимиз жабр кўришмасин.
Фарзандларимизга лойиқ ота бўлишимиз керак!
Манба:
@kadamugli_sarvarКаналга уланиш:
👉
@Advokat_Abdullayev
