Андижон вилояти судлари | Расмий канал

Андижон вилояти судида меҳнат қонунчилиги нормаларини суд амалиётида қўллаш, меҳнат низоларига сабаб бўлаётган ҳолатларнинг олдини олиш масалалари юзасидан семинар ташкил этилди.

Тадбирда Андижон вилояти ИИБ маънавий-маърифий ишлар ва кадрлар билан таъминлаш хизмати, юридик таъминлаш гуруҳи, бошқа бир қатор соҳавий хизматлар ходимлари иштирок этишди.

Семинарда вилоят судининг фуқаролик ишлари бўйича судьяси Акмал Алижонов ҳамда фуқаролик ишлари бўйича Андижон туманлараро суди судьяси Шерзод Араббоев кун тартибидаги мавзу юзасидан маълумотларни тақдим этди.

Жумладан, кейинги пайтларда фуқаролик ишлари бўйича судларда меҳнат низолари билан боғлиқ ишлар салмоғи ортиб бораётир. Биргина 2024 йилнинг ўзида фуқаролик ишлари бўйича Андижон туманлараро суди томонидан бевосита ишга тиклаш билан боғлиқ 115 та, иш ҳақи ундиришга доир 45 та, ишга қабул қилишни ғайриқонуний равишда рад этганлик ҳолати юзасидан 1 та ҳамда бошқа меҳнат низоларига оид 29 та фуқаролик иши кўриб чиқилган. Мазкур низоларнинг 84 таси қаноатлантирилиб, даъвогарларга иш ҳақи учун 3 миллиард 322 миллион сўмдан зиёд маблағлар ундириб берилган. Шунингдек, меҳнат шартномасининг бекор қилиниши ортидан ходимнинг маънавий зарар ундириш билан билан боғлиқ талаблари бўйича 282 миллион сўмлик маблағлар ундириш юзасидан қарорлар қабул қилинган.

Семинарда меҳнат низолари келиб чиқишига сабаб бўлаётган ҳолатлар хусусида сўз юритилди. Айни турдаги даъволар бўйича судларга мурожаат этиш муддатлари, меҳнат ҳуқуқларини ҳимоя қилишнинг асосий усуллари, бу борадаги қонунчилик нормаларини тўғри қўллаш каби масалалар юзасидан фикр алмашилди ҳамда иштирокчиларни қизиқтирган саволларга жавоб берилди.

Сайт I Telegram

АНДИЖОН ВИЛОЯТИ СУДЛАРИ ТОМОНИДАН 2024 ЙИЛДА КЎРИБ ЧИҚИЛГАН ИҚТИСОДИЙ ИШЛАР ЮЗАСИДАН АХБОРОТ

2024 йилда биринчи инстанция судида жами 11 минг 851 та иқтисодий ишлар кўриб тамомланган.

Кўрилган ишлар сони 2023 йилга нисбатан 10 минг 375 тага камайган.

Сўз бораётган даврда кўрилган кредит шартномасига оид низолар 2023 йилга нисбатан 158 тага (22,7%), ижара шартномасига оид низолар 159 тага (61,2%), контрактация шартномасига оид ишлар ишлар 549 тага (32,1%) кўпайган.

Аксинча, банк операцияларини тўхтатиб туриш ҳақидаги аризалар 10 минг 173 тага (222,7%), тўловга қобилиятсиз деб топишга оид ишлар 1 минг 30 тага (3,2 бараварга), коммунал хизмат кўрсатиш шартномасига оид ишлар 503 тага (69,9%), ерга оид низолар эса 28 тага (59,6%) камайган.

2024 йилда жами 5 минг 421 та иқтисодий ишлар сайёр суд мажлисларида кўрилган бўлиб, бу жами низоли тартибда кўрилган ишларнинг 45,9 фоизини ташкил этади.

Ҳисобот даврида вилоят судининг иқтисодий ишлар бўйича судлов ҳайъатининг апелляция инстанциясида 237 та, кассация инстанциясида 173 та, тафтиш инстанциясида 125 та шикоят (протест)лар кўриб тамомланган.

Ушбу муддатда жами 555 та иқтисодий иш юқори суд инстанцияларида кўрилган бўлиб, шундан 422 таси бўйича суд ҳужжатлари ўзгаришсиз қолдирилган, 60 таси ўзгартирилган ва 73 таси бекор қилинган.

Иқтисодий ишларни кўриш жараёнида аниқланган қонун бузилиш ҳолатлари бўйича айбдор шахсларга нисбатан 249 та суд таъсир чоралари қўлланилди.

Шунингдек, ҳисобот даврида 110 та иш бўйича тарафлар медиация келишуви тузганлиги учун кўрмасдан қолдирилган бўлса, 70 та иш бўйича тарафлар ўзаро келишув битими тузганлиги сабабли иш юртиш тугатилган.

Сайт I Telegram