ҲАЙВОНОТ БОҒИДА

Қулоғини қашийди маймун,
Патларига тумшуқ урар қуш.
Кунчувоқда йўлбарс жим, ғамгин
Тўқайзорни кўриб ётар туш.

Боғчасидан таътилга чиққан
Гул қизалоқ термулар ҳайрон.
Онасининг қўлидан тутиб
Саволларга кўмар: “Онажон!

Нега тутиб турмиш буларни,
Ахир кўкда учмасми қушлар?
Нечун бунча маюсдир бари,
Эшитилмас озод товушлар?”

Бу саволлар — мангу бежавоб,
Она дилгир: “Кеч ҳам бўлгандир.
Ташқаридан қулфлаб келгандик,
Бетоб отанг... кутаётгандир.”

Шодмонқул  САЛОМ
@Shodmonqul_SALOM