​​Гоҳи кўп сайраймиз, гуё андалиб,
Бобо-момолардан гуноҳ ахтариб,
Улар жазо олган, Ерга ҳайдалиб,
Одамни айбламанг, Ҳаввода айб йўқ!

Хайрми, савобми, диёнат учун,
Мисқоллаб йиғилгай қиёмат учун,
Ўзингиз қасд этган хиёнат учун,
Одамни айбламанг, Ҳаввода айб йўқ!

Сабрлиман дейсиз, кериб кавсингиз,
Бу асли, фақирлик, ё фирдавсингиз,
Тоғдай сабрингиз бор, ғордай нафсингиз,
Одамни айбламанг, Ҳаввода айб йўқ!

Қаҳрнинг майдони - дашту-ёбонлик,
Муҳаббатнинг маҳри - тору-тобонлик,
Асли феълингиздан - номеҳрибонлик,
Одамни айбламанг, Ҳаввода айб йўқ!

Бирда буюксизу, бирда бечора,
Қадамлар шахдаму, амал ночора,
Ўзни ёқламокка тополмай чора,
Одамни айбламанг, Ҳаввода айб йўқ!

Улар Жазо олган, Ерга ҳайдалиб...

Ўлмасбек Самарқандий.

@Samarqandiy77