Dilnur A'zamov

“Lolazor” podkasti uzoq muddatli tanaffusdan soʻng qaytdi

📹 https://youtu.be/UjVr8pwf7Sc

​​Nurobodda an’anaga aylangan “Umidli yoshlar” tashabbusli qo‘shimcha fan olimpiadasining 5-mavsumi va kitobxonlik tanlovi o‘tkazildi

Bizni kuzatib boradiganlar yaxshi bilishadi. 2021-yildan beri tashabbuskor doʻstlarimiz bilan homiylar koʻmagida Samarqand viloyati Nurobod tumanida “Umidli yoshlar” tashabbusli qoʻshimcha fan olimpiadasini oʻtkazib kelamiz.

Tashabbusdan maqsad – uka-singillarimizni bilim olishga ragʻbatlantirish, ularni qoʻllab-quvvatlash, salohiyatli, raqobatbardosh, bilimli yoshlar safi kengayishiga kichik boʻlsa-da hissa qoʻshishdan iborat.

Shu kungacha oʻtkazilgan 4 ta mavsumda matematika, ingliz tili, fizika, biologiya fanlaridan 50 dan ortiq oʻquvchilar gʻoliblikni qoʻlga kiritishdi. Begʻaraz homiylik asosiga qurilgan ushbu loyiha gʻolib oʻquvchilarning qoʻshimcha darslari (repititor) uchun 6 oylik xarajatlarini qoplab berishni ham davom ettirmoqda. Ushbu imkoniyatdan foydalanib, bugungi kunda uka-singillarimiz bilimlarini yanada mustahkamlashmoqda, xorijiy tillardan sertifikatlarni olishmoqda.

Loyihamizning 5-mavsumidan “Qishlogʻimiz kitobxonlari” tanlovini oʻtkazish yoʻlga qoʻyildi. Unda nafaqat yoshlar, balki yoshi kattalar ham qatnashishiga imkoniyat yaratildi. Jamiyatimizda kitobxonlikka ragʻbatni oshirish, mutolaa ixlosmandlari safini kengaytirish asosiy maqsad etib belgilandi. Kitob oʻqigan, mutolaani kanda qilmagan jamiyatda tafakkur qilish rivojlanadi, tafakkur qilgan inson oʻzini anglaydi, oʻzini rivojlantiradi, jamiyat taraqqiyotiga xizmat qiladi.
Ta’kidlash joizki, farzandlari bilan birgama-birga oʻzi kitobxonlik tanlovida, farzandi fan olimpiadasida qatnashgan ota-onalarning borligi, yoshlarning intilishlari, bilim olishga, kitobxonlikka qiziqishlari bizni juda xursand qildi.

Bu safar ham 200 dan ortiq ishtirokchi qatnashgan matematika, fizika, biologiya, ingliz tili fanlaridan oʻtkazilgan olimpiada va “Qishlogʻimiz kitobxonlari” tanlovida 30 nafari gʻolib va sovrindorlarga aylanishdi.

Ilm, mutolaa va tafakkur har qanday davlatning taraqqiyot yoʻlida ildam harakat qilishida zarur bo‘lgan asosiy omillardan sanaladi. Ilmiy izlanishlarni qo‘llab-quvvatlash, kitobxonlik madaniyatini rivojlantirish, erkin fikrlash va mustaqil tafakkur muhitini yaratish orqali jamiyat rivoj topib boradi.

Loyiha haqida batafsil: 👉 https://t.me/umidli_yoshlar_rasmiy

​​Bayramingiz muborak bo‘lsin, aziz ayollar!

Ayol kim? U onamiz – bizga hayot ato etuvchi, rafiqamiz – sadoqat va muhabbat baxsh etuvchi, opa-singil, xola-amma, buvilarimiz – samimiyat va mehr ko‘zgusi, qizaloqlarimiz – jajji farishtalarimiz ezgulik tarqatuvchi.

Sizning mehribonligingiz, sabr-qanoatingiz, chiroyingiz va oqilaligingiz hayotga ma’no beradi. Siz bor joyda quvonch, baxt va iliqlik hukm suradi. Bahorning eng go‘zal bayramida sizga cheksiz baxt, oilaviy farovonlik va yorqin tabassum tilayman! Har doim e’zozda bo‘ling, qalbingizdan quvonch arimasin!

Husni, chiroyiga suqlanadi gul,
Tangrim goʻzallikni berganda azal.
Tavsifdan charchamas, xonishda bulbul,
Shoir deganidek: “Oydan-da goʻzal”.

Qonida Toʻmaris gʻayrati, shahdi,
Barchinoy kelbatli, Kumush suratli,
Har jabhada chaqqon, epli, ibratli,
Shu emasmi, doʻstim, yigitning baxti.

Roʻmol yo naqshinkor doʻppi boshida,
Zulfi tovonini oʻpgan goʻzallar,
Sochingiz savdosi tushib boshiga,
Ne shoirlar bitmish qancha gʻazallar.

Atlas kiyib yurasizlar – yarashar,
Husningizdan kunning koʻzi qamashar,
“Qoshlar qaro, qilich qotil qaroshingiz”,
Koʻrgan borki, qarab yoʻldan adashar.

Sizni qancha kuylamaylik, shuncha oz,
Shuncha kamdir, qancha boʻlsak parvona.
Oʻzbekning hayosi, ibosi Siz rost,
Boʻlib qoling doimo oʻzbekona.

Qalbning tub-tubidan aytamiz tilak,
Qoʻshmayin ortiqcha dabdaba, bezak.
Toʻgʻrida, pariga bezak ne kerak,
Ilk bahoriy ayyom, bayram muborak!

©️Dilnur A’zamov